Eengunga depangelo oda ya pombada

Eengunga depangelo oda ya pombada shi nyanyalifa moule weedula heyali da pita.

Ominista yoshimaliwa Iipumbu Shiimi omafiku aa okwa li ya lombwela oNamibia Media Holdings ‘Evening Review’ kutya eengunga doshilongo okwa li hadi kala peepelesenda 20, ashike paife oda ya pombada fiyo opeepelesenda 70.

okwa ti eshi osha etwa keliko olo la nghundipala nokoipumbiwa oyo itai kufwa tai i ashike pombada.

Moshimaliwa shomudo ou, Shiimi okwa li a tula oshimaliwa pomunghulo shokufuta eengunga shi fike peebiliyona N$10.

“Ngee eliko loye tali u pedu kashi shi alushe shipu okuteta oipumbiwa yoye, shaashi oshimaliwa oto shi longifa moipangelo nomovanailonga vepangelo,” Osho a ti ngaho.

Shiimi okwa ti eshi ohashi eta okweehela kuhapu opo kufitikwe eemwaka odo.

“Onghee nee eliko oli na okuwa pedu, ashike oipumbiwa natango oi li ashike pombada. Omwaka oo oto u fitike ngahelipi? Ou na okweehela shihapu. Ndee osho osho sha kala nokuningwa okudja momudo 2015 nonale,” Osho a ti ngaho.

Shiimi okwa ti omwaalu wovanailonga vepangelo owa wa pedu, osho shi li onghendabala yepangelo yokushonopeka oshimaliwa osho hali longifa.
“Omalweendo epangelo okwa li haa pula oshimaliwa shi fike peemiliyona N$600 nale ndee paife oshimaliwa osho oshe ya pedu neenghono fiyo opeemiliyona N$300,” Osho a ti ngaho.

Shiimi okwa ti, oshinima eshi itashi eta eemhito doilonga dihapu, shaashi eliko otali shuna konima ngaashi la li nale petameko lokolona, nande otali kulu. “… shaashi eli eyopombada likulu tali aluka,” Osho a ti ngaho. Eshi otashi ti ovo kwa li va kanifa oilonga yavo pefimbo lokolona otashi dulika va ka mone oilonga yavo, oshiholelwa, ngaashi koshindo shomatalelepo, osho a ti ngaho. Shiimi okwa ti epangelo ola kala tali longo mo okuhalongifa oshimaliwa shihapu eshi la kala tali tete oipumbiwa yalo nande opa kala pu na oshimaliwa tashi ya kepangelo.
Okwa ti oministili oye lipyakadila tai kongo omikalo dokuyambula po Epangelo Mining Company.

“Epangelo oli na oipambuliko moSwakop Uranium ndee ohashi pula oimaliwa opo u kale u na oipambuliko. Eshi osha hala kutya epangelo oli na okutula oshimaliwa moinyangadalwa ashike osho kashi shi lela oilonga yepangelo,”Shiimi osho a ti ngaho.
Okwa ti ehangano ole lipyakidila tali talulula oilonga yalo.

“Omatuvikilo amwe olo la ninga omido da pita,ngaashi moNavachab mine, otaa tameke okweeta oshimaliwa, osho tashi etele Epangelo oshimaliwa,” Minista osho a ti ngaho.

Epangelo ehangano lopaumwene omo epangelo olo li na mo oipambuliko ihapu. Ehangano eli oli na eepelesenda 10 moSwakop Uranium.

EENGUNGA KADI SHI OUPYAKDI

Omunawino moikwamahupilo Omu Kakujaha-Matundu okwa ti eengunga doovene kadi shi oshinima shi i, she likolelela kutya oshimaliwa otashi longifwa shike.

Okwa ti eengunga diwa ododo hadi longifwa meeproyeka dokweeta oshimaliwa. “Mupya munene eengunga dihapu dopokolona okwa li da longifwa moikulya. Nande oda vatela, eengunga edi itadi lifutu,” Osho a ti ngaho.