Eetendela nadi kale hadi pewaomahangano e dulife pulimwe – Katjimune

Omutotiveta Maximalliant Katjimune okwa ti eetendela nadi kale hadi pewa omahangano e dulife pulimwe, unene ngaa ngee otendela tai pula eemiliyona dihapu.

“Kashi wa ngee eetendela oda kala hadi pewa omahangano ahapu?” Osho a pula okakomisi kopaliamente oko ke na sha nokuungaunga noinima ya pambamba omaxupilo ngaho Etitatu.

Katjimune okwa hala okakomisi ka konakone omaupyakadi oshimaliwa oo a taalela eengeshefa dishona moNamibia. Okakomisi okwa li ka ninga oshoongalele shopashiwana Etitatu opo ka konakone oshikumungu eshi, omo kwa li Katjimune oye ta wilike ovatotiveta vakwao.

Okwa ti eepelesenda dihapu deengeshefa dishona ohadi dopa okuya komesho konima ashike eshi opo da totwa molwomumbwe yoshimaliwa.

Katjimune okwa hala opaliamente opo i talulule omukalo wokuyandja eetendela opo ku kale haku kwatelwa mo eengeshefa dishona dihapu, ponhele yokuyandja ashike otendela yeemiliyona dihapu komunhu umwe ile ke hangano limwe.

“Ohatu pula opo eetendela di kale hadi tukulwa opo kuyandjwe omhito komahangano ashona a kufe ombinga nokuyandjwe omhito yakula yokukufa ombinga nokumona omauwa.

“Luhapu ohatu mono otendela yeemiliyona di dule poN$600 ya pewa ovanhu vavali,” Omutotiveta osho a ti ngaho.

EEMILIYONELA DISHONA

Ehangano lokukonga oipumbiwa yepangelo ledina Central Procurement Board of Namibia (CPBN), nande ongaho, ola hala okakomisi kopaliamente ka konakone ngee ounona vashona nava pitikwe ngaa va kale ve na omahangano.

“Epulo la fimana ole li ngee ounona vashona nava pitikwe ngaa kokatendo komahangono, va kale ve na oipambuliko momahangano,” Omunashipundi wewilikongudu Amon Ngavetene osho a ti ngaho Etitatu. Okwa li ta popi ehangano olo okaana keedula nhano ke na oipambuliko kwa li ka mona otendela younamiti i na oshimaliwa shi fike pomiliyona oshinghwanyu nhatu.

Okaana oko oke na mo eepelesenda 51 doipambuliko mehangano, olo la pewa otendela yepangelo yokulanda oikwanoipangifo oyo hai longifwa okuhakula okaangela nomaudu yoo akwao. Otendela ei otai ningi oule weedula mbali. Okangudu kopaliamente otaka pula eenghundafana kombinga yomapulo oinima aishe oyo tai imbi okuyandja otendela.

EEMHATA

Ngavetene okwa ti oCPBN kai na alushe oshinakuwanifa shoipumbiwa yepangelo.

“Ngee oshi li koshi yeemiliyona N$25, kutya nee oipumbiwa youpaunamiti, otashi i koministi yoshimaliwa nomaliko oshiwana,” Osho a ti ngaho.

Odula ya dja ko, ominista youndjolowele nomayakulo opanghalafano Kalumbi Shangula okwa ya dja ombedi kokatendo koipumbiwa yepangelo molwomumbwe yomiti moipangelo yepangelo.

Shangula okwa li a pulwa kombinga yoshikumungu osho koshilyo shongudu yoPopular Democratic shomopaliamente Elma Dienda muNovemba odula ya dja ko.

Okwa li a popya oshikando shimwe momutumba wopashiwana kutya okatendo koipumbiwa yepangelo otaka pula opo oministili i yandje omikanda doipumbiwa koministili yoshimaliwa, tadi ulike osho oministli ya pumbwa moipangelo yayo.

Omikanda odo ohadi landulwa komilandu doipumbiwa yepangelo tadi wilikwa koCPBN.

Omilandu, odo da kwatela mo okutalulula ovo va ninga omaindilo noinima ikwao ya pumbiwa okuningwa ohadi pula oule wodula opo di manifwe.

“Osha yela kutya etulomoilonga lokatendo koipumbiwa yepangelo ola eta oipangelo i kale ihe na omiti noilongifo ikwao yopauhaku.

“Oipumbiwa yomiti moNamibia ohai kwata efimbo lile,” Shangula osho a ti ngaho Etitatu momutumba wopashiwana.

Petameko lodula ei okwa li a tya ovaningi vomaindilo ve li vatano ova kala noministili okudja momudo 2017.

Etitatu, Ngavetene okwa li a pateneka oshibofa shewilikongudu, ta ti opu na oinima imwe i na okutalika.

“Ou na okumona ongushu yoshipumbiwa ndee to tale ngee oshi li momake ewilikongudu ile omomake ehangano lepangelo.

“Fyee ongomutumbawiliki, ihatu ningi omatokolo keemumbwe dongeshefa yehangano loshiwana. Ehangano loshiwana loovene olo hali popi kutya ‘she likolelela koveta yetu, koilonga yetu ongehangano loshiwana,otwa pumbwa okuninga eshi naashi, ndee opo tu ninge ngaho omwaalu ou twa tengeneka tashi pula ou fike apa.

“Oshi li kondje yoilonga yetu, onghee nee oipumbiwa ei nai longwe mo komutumbawiliki,” Osho a ti ngaho.

Ngavetene okwa ifana ovo kwa li tava kelele otendela yeengumi, ovo kwa li tava ti omutumbawiliki otau lande eengumi koshimaliwa shihapu, omanga oluhepo laNamibia li li pombada.

“Otwa kala hatu shekwa eshi twa koleka okulanda eengumi. Ashike katu na oufemba wokutya oministili youndjolowele inai pumbwa eengumi, omanga ovanhu vamwe tava fi ondjala. Oshinima osho osha pumbwa okutokolwa kehangano loovene,” Osho a ti ngaho.

Ngavetene okwa ti ehangano lepangelo ngee ola holola kutya oli na oshimaliwa, nena ove na okulongela kumwe nalo,” Osho a ti ngaho.

Ngaha okwa li ta popi kombinga yotendela yepangelo yeedula mbali yoshimaliwa shi fike peemiliyona N$650 oyo ya findanwa po kehangano lomunangeshefa Shapwa Kanyama, olo li na ashike ovanailonga vatatu tava kalelele, ya findanwa po omwedi ou. Otendela ei okwa li yoo yokulanda eengumi.

OIBOFA YOKOMHANGU

Ngavetene natango okwa li a popya kombinga yoibofa i li 18 oyo ehangano loCPBN la findana, oyo kwa li ya tala kombinga yomilandu dokulanda oipumbiwa yepangelo novaningi vo maindilo eetendela da pita.

Oibofa ei va findana oyo moibofa 28 ya tulwa mo okudja momudo 2017.

Ehangano lokulanda oipumbiwa yepangelo ola ka nifa oibofa i li inhe.

Natango, oshilyo shongudu yoNamibia Economic Freedom Fighter Michael Amushelelo okwa li a popya nokakomisi kopaliamente, te liamene kombinga yomapopyo oshimaliwa osho e na shihe na eedjo. Okwa ti eshi oidjemo ashike yokulongifa omadilaadilo aye.

“Epangelo eli ola pumbwa ovanhu ve na eendunge. Kashi shi ovanhu ovo hava vake,” Osho a ti ngaho.

Amushelelo nomutamanekwa pamwe naye Gregory Cloete, ova kala tava tamanekelwa oibofa youkengeleledi noshibofa shavo osha undulilwa komesho.