Ehangano li na sha nomilandu domeendjila ledina Road Authority (RA) otali lundilwa kutya ola fininikila epangelo oproyeka yokulonga ondjila yOpuwo-Epupa puhe na epitikilo okudja koministili yoshimaliwa noministili yoyeendifo.
Ovaningi veindilo lotendela ei ova ti kutya otendela ei oya yandja omauwa kehangano ledina Otesa Civil Engineering, tava popi oshimaliwa shi fike peemiliyona N$90 odo da pumbiwa moproyeka omu.
Ehangano loRoad Authority okwa li la shiivifa otendela ei ya teelika i pate momafiku 10 Oktoba odula ei opo kulongwe ondjila yomamanya yeekilometa di li 75 pokati kOpuwo nEpupa.
Oproyeka, oyo ya tameke kodoolopa yaPuwo fiyo okOtjivize, oya eta omanyenyeto okudja kovaningi vomaindilo Ovanamibia ovo tava ti otendela oya dopa okumona endiminino loministili yoshimaliwa nosho yo oministili yoilonga.
“Omadiminino avali aa a tumbulwa apa oo a pumbiwa tete keshe moproyeka tai futwa kepangelo,” Odjo i li popepi noshikumungu eshi osho ya ti ngaho.
Ovanhu vamwe ova nyenyeta kutya kakwa li pu na omutengenekwafaneko woproyeka ei.
Vamwe ova lombwela oThe Namibian kutya elombwelo la dja koministili yoshimaliwa okwa li la yandjwa momafiku 03 Marsa 2023 koRoad Authority opo epangelo liha tulwe momaudafanoilonga puhe na ediminino la dja kombelewa yokuungaunga noshikefa shoshimaliwa shepangelo nokoministili yoilonga noyeendifo.
Oministili yoshimaliwa oye likanyuna kutya inai yandja nande omalombwelo koRoad Authority.
“Kakwa li nande pu na omalombwelo a yandjwa koministili yoshimaliwa oo a ngabeka oRoad Authority ile ehangano keshe lepangelo opo liha ye moinima ya pamba oipumbiwa yepangelo puhe na endiminino la dja koministili yoilonga noyeendifo.
“Elombwelo li li ngaho otali kala itali tu kumwe nokatendo kokukonga oipumbiwa yepangelo komudo 2015, oko ka popya kutya keshe ehangano lepangelo oli na oshinakuwanifa shokukonga oipumbiwa yalo pakuluufa kwaasho tashi popiwa kokatendo,” Oministili osho ya ti ngaho.
Ehangano lomilandu domeendjila oshivike sha dja ko okwa li le likanyuna omapopyo oo.
Ehangano, li li koshi yomukulunhuwiliki Conrad Lutombi, oli na ondjokonona yokukwatela epangelo meeproyeka deendjila puhe na ediminino okudja kombelewa yokuungaunga noshimaliwa shepangelo.
Momudo 2018, oThe Namibia okwa li ya lopota kutya oministili yoshimaliwa oya ya dja ombedi koministili yoyeendifo eshi kwa li ya fininikila epangelo motendela yondjila yongushu yoshimaliwa shi dule peebiliyona N$2 omanga kwa li inai udafana noshikefa shoshimaliwa shepangelo.
Omupedu minista mukulu woyeendifo Sankwasa James Sakwasa momudo 2018 okwa ti eetendela dokulonga eendjila dile odi yadi okudengela odi peisho.
EENDJILA NOPOLITIKA
Ehangano lOtesa Civil Engineering oli li limwe lomomahangano oo a mona omauwa koshinima shoRoad Authority osho hashi ifwanawa ‘Harambe Roads’, osho sha pula epangelo oshimaliwa shi dulife peebiyona N$5.
Otesa, ehangano lomunangeshefa Elmo Kaiyamo, monakudiwa ola kala nokulundilwa kutya ola kala nokuningilwa nawa pominghulo koRoad Authority pefimbo laLutombi.
Momudo 2016, Okabinete yapelesidente Hage Geingob okwa li ya yandja elombwelo koRoad Authority opo i hoolole Otesa Civil Engineering opo i longe oshikako oshitivali shondjila oyo i li pokati kOvenduka nOkahandja puhe na okushiivifa otendela oyo i na ongushu yobiliyona.
Paife, opu na omalipulo kutya oRoad Authority oya tula oipumbiwa yokulonga otendela oyo pamukalo oo Otesa oyo ashike tai dulu okulonga ondjila yaKunene, oo wa kala yoo nokutongola mo omahangano akwao epangelo eedula edi. Ovaningi veindilo lotendela ei otava ti kutya osho tashi pulwa otashi pitike ashike omahangano avali, Otesa Civil Engineering noNexus Group oo a ninge omafiyafano.
Oshinima shimwe osho tashi pulwa osheshi kutya ovaningi veindilo motendela omu nava kale ve na eemiliyona N$90, osho sha kufa mo omahangano ahapu aNamibia.
Oshinima shikwao osheshi kutya omuningi weindilo na kale ehangano laNamibia eepelesenda 100, ta longele kumwe neengeshefa dishona nodopokati daNamibia. Ovaningi veindilo natango otava pulwa opo va kale ve na oshimaliwa shi fike peemiliyona N$35 keemuma.
TE LIPOPILE
“Omukalo ou kwa li wa longifwa omukalo wopashiwana wa yeuluka, oo tau longele kumwe nokatendo kokukonga oipumbiwa yepangelo komudo 2015. Omilandu adishe okwa li da landulwa,” Omupopiliko woRoad Authority Hileni Fillemon osho a lombwela oThe Namibian ngaho oshivike sha dja ko.
Fillemon okwa weda po vali kutya oproyeka yOpuwo-Epupa oproyeka yakula yopashiwana nokwa li ya diminwa kominista yoshimaliwa momafiku 31 Marsa 2023.
Ehangano Road Authority natango ole likanyuna omapopyo olwaamambinga oo a kwatela mo Otesa Civil Engineering.
Omupopiliko wehangana lOtesa Civil Engineering Uejaa Kazondunge oshivike sha dja ko okwa ti ehangano, ongohalikwata eetendela, kali na oshinakuwanifa shokutokola omikalo doipumbiwa yepangelo.
“Oproyeka oyo tai popiwa fiyo opapa oya mangulukila ovaningi veindilo lopashiwana ngaashi okatendo kokukonga oipumbiwa yepangelo komudo 2015 taka pula. Keshe omuningi weindilo ota dulu okukufa ombinga,” Osho a ti ngaho.
Road Authority oshivike sha dja ko okwa ti ehoololo lOtesa Civil Engineering lokulonga ondjila yopokati kOvenduka nOkahandja okwa li la kolekwa komutumba wovakulunhuwiliki muDesemba 2016.
Fillemon okwa ti eshi okwa li sha ningwa opo ku kwashilipalekwe kutya oproyerka oya manifwa meendelelo moule wefimbo olo kwa li la tulwa po.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
