Ehangano ledina Namibia Breweries Limited (NBL), olo paife la ninga loHeineken, inali hala vali okukala tali yambidida oshipaana yetanga lokeemadi yaNamibia yedina Brave Warriors.
Pelesidente wehangano letanga lokeemadi ledina Namibia Football Association Robert Shimooshili okwa koleka oshinima eshi shipe koDesert Radio oshivike sha dja ko.
Okwa ti omuyambididi mukulu woshipaana okwa yandja etomeno kutya ota xulifa po okuyambidi oshipaana yopashiwana shaashi ihai danene omaudano ayo meumbo.
“Eyambidido lambuulaye okupitila moTafel Lager kali po vali. Ombuulaye oya kanifa ohokwe yokuyambidida oBrave Warriors shaashi ohai danene omaudano ayo omeumbo puushindalongo South Africa,” Shimooshili osho a ti ngaho.
“Osho shi li oshinima shoshili, sho osho hatu pula ovaleli vetu vopashiwana opo tu kale tu na okapale kokudanena omaudano opashiwana meendelelo.”
Eyambidido eli ola tameka nale nola kala tali tyapulwa koshipaana yetanga yopashiwana oule weedula tadi ka hanga pomulongo.
Ashike nee, exulifepo leudafana eli paife otali ulike kutya oBrave Warriors oya yuka moudano wekopi lomanyakwa aAfrica ihe na omuyambididi wopambelewa.
“Oinima yoludi eli oi na oidjemo ii nai koshipaana yopashiwana nokuNamibia alishe ongoshilongo,” Shimooshili osho a ti ngaho.
Pelesidente wehangano lokatanga kokeemadi kaNamibia okwa ti Namibia, okupitila moBrave Warriors, paife ota twala omayakulo koSouth Africa, ta yandje oilonga yopakafimbo nota longifa eemiliyona dihapu neenghono moshilongo omo.
MINISTA A UDA NAI
Minista yomaudano, ovanyasha nomayakulo oshiwana Agnes Tjongarero okwa lombwela oThe Namibian kutya okwa ngwangwanekwa koshikumungu eshi nokwa ti opo ashike ta udu oshinima shi li ngaho lwotete monghalamwenyo yaye.
“Efimbo li fike peni va kala tava yambidida oBrave Warriors? Ova kala ve shi shi kutya omaudano otaa ningilwa moSouth Africa. Kandi shi udite ko oshinima eshi ashishe. Otashi udifa nai unene ngee omunhu oo kwa li he ku pe oimaliwa a tokola opo ehe ku yambidide vali. Oshi li omupya munene notashi udifa nai,” Tjongarero osho a ti ngaho.
Minista okwa udaneka opo a ka popye noNFA opo a mone kutya oshike sha eta oshinima shi li ngaha omanga ina tya ko sha moule koshinima oku.
OTASHI UDIFA NAI
Omundjandjukununi wetanga womoshilongo Olsen Kahiriri okwa ti otashi udifa nai okuuda kutya omuyambididi woshipaana yopashiwana okwa xulifa po eyambidido laye.
Kahiriri okwa ti oshidjuu okuuda ko okukala u na oshipaana yopashiwana ihe na omuyambididi.
“Tafel Lager ola ninga edina lokulandifa ndee ngee omunhu ta popi oBrave Warriors, oto mono ashike to dilaadila Tafel Lager,” Osho a ti ngaho.
“Tafel Lager okwa li a fimana ashike okwa ya shaashi okwa kanifa ongushu, sha hala kutya ngee oBrave Warriors tai danene meumbo, okapale ohaka kala ke yadi omapandela oTafel Lager, okudja ngaa kohuke imwe yokapale fiyo okwiikwao neenhele dokulihafifa okwa li hadi kala di hadi eebiila noukunwa va talala okwa li hava landifwa,” Kahiriri osho a ti ngaho.
Okwa weda po kutya omuyambididi mukulu okwa li ha landifa nawa ngee oBrave Warriors tai danene meumbo ashike paife ova dimbuluka kutya itava tyapula vali ouwa wa faafana.
“Omuyambididi okwa mona kutya ova nyekwa omauwa oo, eshi kwa li okapale haka kala ke yadi edina lavo.
Osha fimana opo ovo ve li melelo va kwashilipaleke kutya oBrave Warriors oya tameka okudanena omaudano ayo meumbo,” Kahiriri osho a ti ngaho.
“Ohandi yandje ombedi koNFA nepangelo ongovakufimbinga vetanga lokeemadi medina longhalo ei ya dundakana.
Omahangano aa avali okwa dopeka omuyambididi.”
Okwa li kwa ningwa eenghendabala kupopiwe noHeineken Etine loshivike sha dja ko ashike inai nyamukula nande omapulo oo kwa li ya tuminwa paimaila.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
