Ehangano lomahooli laNamibia ledina Namcor ola kulilwamo kepangelo noshimaliwa shi fike poN$1,2 biliyona

… oshimaliwa eshi osha futwa sha yukilila kovalandifi

EPANGELEO ola kulila mo ehangano lomahooli laNamibia noshimaliwa shi fike pobiliyona imwe oshinghwanyu mbali, ashike nee oshimaliwa eshi kakwa li nande sha yandjwa kehangano eli ndele okwa li ashike sha futwa sha yukilia kovalandifi vomahooli oko ehangano hali lande omahooli alo.

Oshimaliwa osho sha nuninwa okuxwepopaleka onghalo omo ehangano lomahooli li li, okwa li sha futwa omwedi wa dja ko.

Ehangano loNamcor ola koleka oshinima eshi Etivali.

Oshinima eshi osha vatela oNamcor opo i fute eengunga dovalandifi di fike poN$1,2 biliyona odo da dja nale muSeptemba momudo 2023, paife ehangano otali dulu okuya komesho nawa noitali ka xulifa po oilonga.

“Namcor okwa mona evateleo loshimaliwa shi fike poN$1,2 biliyona. Ashike ohandi shi yeleke kutya oshimaliwa eshi inashi futwa sha yukilila koNamcor. Omahangano oshimaliwa okwa futa oshimaliwa eshi sha yukilila kovanhu ovo kwa li tu na eengunga davo naavo hatu lande omahooli kuvo, eshi osha ningwa mokati kaApilili 2024,” Omupopiliko woNamcor Utaara Hoveka osho a koleka koThe Namibian ngaho.

Opu na eudafano kutya ngee Namcor okwa nyengwa okufuta eendjo daye, epangelo oli na okuuya mo moshinima omu ndee tali futu oshimaliwa osho.

Eshi oshikando oshitivali epangelo tali kulile mo ehangano loNamcor, epangelo ola futile noshimaliwa shi fike po peemiliyona N$260 momudo 2010.

Oshimaliwa eshi inashi futwa ngaashi ikwao hai futwa, oshimaliwa shokukulila mo ehangano eli neudo osha futwa sha yukilila kovalandifi nokwaavo kwa li ehangano li na eengunga davo.

Oshinima eshi osha ningwa nelalakano lokuxwepopaleka onghalo yoshimaliwa yehangano omangha tali futu eengunga dalo nokuvatela oilonga yalo yefiku keshe.

Ehangano eli ola kanifa oshimaliwa shi fike peemiliyona N$700 momudo 2022/23.

“Oshinima eshi osha fimana mokuvatela Namcor a ye komesho noilonga yaye. Otwa mona kutya opu na ounghundi wokutonatela oshimaliwa shoo osho ehangano tali kanifa oshimaliwa shihapu neenghono, nonghee nee ohatu kendabala tu xwepopaleke eenghatu delelo opo tu kelele oshinima eshi shiha ningwe vali,” Osho a ti ngaho
Omunashipundi wewiliko lehangano Jennifer Comalie Etivali okwa ti omukuli ou owa fimana neenghono mokuvatela ehangano momafimbo aa adjuu.

“Osha eta oipumbiwa oyo kwa li ya pumbiwa neenghono, oshe tu vatela moudjuu woshimaliwa, mokuya komesho noilonga nokukaleka po eemhito doilonga,”

OMAUPYAKADI MEHANGANO

Namcor okwa kala nomikundu dihapu.

Eedula da pita, ehangano ola kala li li meengunga dakula, ekondjelo lelelo, omalundilo oingangamwifi, okulongifa oimaliwa nai, etulopedu lovakulunhuwiliki nomapopyo oulingilingi.

Odula ya dja ko muSeptemba, Namcor okwa li e na eengunga deebiliyona N$1,9 ashike omwaalu ou okwa li u li xwepo okuyeleka neengunga odo ehangano kwa li li na muMei 2023 u fike peebiliyona N$2,5.

Ovalandifi vamwe vomahooli okwa li tava ningile ehangano omatilifo kutya otava landifa po omaliko alo opo va dule okumona mo oshimaliwa shavo osho ehangano lomahooli li na.

Omangha epangelo kwali inali li dopa mo moshinima omu, ewilikongudu loNamcor okwa li la yandja omaudaneko komahangano oko hali lande omahooli kutya otali ka futa eengunga dalo omangha omafiku 30 Novemba 2023 inaa fika.

ETAMUKULULO

Omupedu ngoloneya woBank of Namibia, Ebson Uanguta, okwa li a ninga omukulunhuwiliki wopokafimbo woNamcor okudja muJanuali fiyo omuJuni odula ei. Uanguta okwa li a etwa mehangano omu opo e li pe edjuululeko liwa unene ngaa kombinga yekulileko loshimaliwa.

Koshi yelelo laye, ongudu oya kala tai tofa mo omaunghundi oo a kala nokweeta oshimaliwa shi kane, nokwa kala nokuxwepopaleka elelo lehangano opo oinima ei iha holoke vali.

“Okudja ashike eshi Uanguta e ya, oinima oya kala nokuningwa ya yooloka. Okwa lambalala keshe umwe opo a mane oilonga yaye. Eelopota nadi manwe. Ou na okushininga kutya nee otashi pula u longe mexuliloshivike. Okwa tula moilonga omikalo nomilandu dokunghonopaleka nokulonga pauyelele,” Odjo osho ya ti ngaho.