Hamushanga welelo lOndonga Frans Enkali ota londoda oshiwana kutya nashi xulife po okulikufila oveta sha landula oshiningwanima omo Paulina Kwedhi (67) kwa li a ningilwa omahepeko kongudu yovanamukunda ovo tave mu lundile kutya oha yandje oudiyo kovalandi vaye.
Kwedhi okwa li a dengwa kongudu yovanhu komukunda Iikango C moshikandjohoololo shaNiipa moshitopolwahoololo shaShikoto Etitano la dja ko.
Okwa monika mokavidio omo ta dengwa shi nyanyalifa noiti.
Enkali okwa ti ngee oshiwana osha kala tashi likufile oveta, otashi eta omapiyaano noshiwana shihe na oveta.
“Ngee otwa pitike okuhena oveta ku wilike, nena ame onda kumwa. Kandi shi kutya oshiwana shokomongula otashi ka kala ngahelipi,” Osho a ti ngaho.
“Kandi wete ngee opu na omunhu e na oufemba wokupa mukwao oudiyo, shaashi okukufa ovanhu eemwenyo osha indikwa. Otu li le po ovanhu apa, ndee ngee ovanhu ova pewa omaudiyo, ohatu ka kala tu na elelo li li ngahelipi? Ohatu ka lela olyelye?” Enkali osho a pula ngaho.
Ovanhu vahetatu ova mangwa po nale mekwatafano loshiningwanima eshi.
Okwa li va holoka momhangu yamagestrata mOndangwa nokwa li vaanyenwa okulifutila mo.
Ova tamanekelwa oshibofa shokudenga nelalakano lokweehameka, okuxwika po oinima noumbudi.
Omukulunhu woshikondo shopolifi shokukonakona oimbuluma kOshikoto omupedu komufala Titus Ekandjo Omaandaxa okwa ti ongudu inai denga ashike Kwedhi, ashike oya xwika po nokandingosho kaye.
Omukalimo umwe womomukunda omo okwa li a lombwela oThe Namibian kutya Kwedhi natango okwa li e li moshipangelo, shaashi okwa li a tewa okaoko nokwa li a lemanekwa kokanya.
OSHA NINGA SHIHAPU
Petameko lodula ei, ovakalimo vomomukunda Elondo moshikandjohoololo shaTsandi okwa li va fanekwa tava denge omulumenhu, tava mange omaulu aye nomaoko ndee tave mu mangele kosheendifo voo tave mu kokolola.
Omulumenhu ou okwa li a hangika a hondama mokaanda, oko kwa li ka hanaunwa po kongudu yovanhu ava ndee tava twikila okumudenga.
Omukulunhu wopolifi koshitopolwahoololo shaMusati kofula Ismael Basson okwa ti omulumenhu ou okwa li ta feekelelwa oumbudi woimuna.
“Okwa li a hangika a hondama mokaanda konima eshi a dopa okuya koihokolola ngaashi kwa li she likundwa,” Basson osho a ti ngaho pefimbo opo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
