Epangelo ola kaleka eekota deeshi dOukwanyama

… ohamba yOukwanyama inai kala nokumona oipambuliko yayo

Oministali yeeshi noinima yomefuta oya pula elelo lehangano omo elelo lOukwanyama li na mo oipambuliko konima yomapopyo kutya opwa kala pu na oimaliwa tai tuminwa koohandimwe.

Oministili okwa li ya endelela opo i kaleke okuyandja eekota deeshi kehangano konima la dopa okuwapaleka okuhalonga pauyuki oko taku popiwa, mwa kwatelawa okulundululila oipambuliko kehangano olo la kwatela mo ovanhu ve shiivike nawa nomuleli wongeleka umwe.

Elelo lopamufyuulilwakalo lOukwanyama oli na mo eepelesnda 20 mehangano ledina Queen Kaleinasho Fishing, ehangano olo kwa li la totwa opo ouhamba wOukwanyama u dule okumona mo omauwa.

Ohamba yOukwanyama Martha Nelumbu oi na mo omauwa mehangano eli.

Ashike nee, opu na omalimbililo kombinga nghee oiyemo okudjas mehangano ya kala tai longifwa nonghee oipambuliko ya kala nokutwalwa komahangano amwe.

Otaku tiwa vati ohamba yOukwanyama inai kala nokumona oipambuliko yayo keshe efiku, inamu kwatelwa oimaliwa nohauto oyo kwa li a landelwa konima yeedula omulongo da pita.

Eenamanana edi oda tamekele muDesemba 2023 eshi oministili yeeshi kwa li ya dengela ehangano eli shi na sha noshinima eshi.

Nande ominista yeeshi Derek Klazen okwa li ya talela po ombala yaUkwanyama odula ei momafiku 27 Mei, oshikumungu eshi natango inashi kandulwa po nomapulo natango otaa i komesho.

Omukulunhuwiliki moministili yeeshi Annely Haiphene okwa li a shangela omukulunhuwiliki wehangano Queen Kaleinasho, Gerson Nehemia, muMarsa odula ya dja ko.

Momukanda, Haiphene okwa li a pula Nehemia opo a yandje omukanda oo tau popile elunduluko moipambuliko noinima aishe oya tai linyenge mehangano konima yefyo laHilya Nelulu nomukanda wexulifepo loilonga yaNestory Denis moministili.

“Ya ndja oumbangi womunhu oo a kolekwa ongomukalelipo woipambuliko yelelo lopamufyuululwakalo lOukwanyama,” Haiphene osho a shanga ngaho.

Natango okwa pula oumbangi wekoleko loipambuliko wa dja kominista yeeshi noinima yomefuta.

Haiphene okwa ti ehangano nali kundafane nomutwe wa kula welelo lOukwanyama George Nelulu, oo oye eli omutonateli woipambuliko oyo i li mehangano eli yomukulukadi waye.

Okwa ti ngee okwa li pu na omumbwe yokuninga omalunduluko moipambuliko, ehangano oli na okulombwela nokukonga ediminino okudja kominista tete.

Okwa ti vali ngeno omikanda odo da shainwa kovanhu aveshe ovo ve na mo oipambuliko nadi kale di li pamwe nomukakanda oo tau koleke oshinima eshi.

Haiphene okwa li a nyolela kehangano ledina Queen Kaleinasho muDesemba odula ya dja ko, te va lombwele kutya otava ka mona eekota deeshi dohorse mackerel domudo 2024, ngee ehangano la wapaleka oikumungu ei nongee la yandje olopota moule weemwedi nhatu.

Elelo lOukwanyama okwa li li na mo oipambuliko i fike peepelesenda 20 mehangano, ashike, oipambuliko ei okwa li ya tetwa fiyo opeepelesenda 10.

Pefimbo opo, oipambuliko yelelo lOkwanyama kwa li ya tetwa, oipambuliko yovanhu vamwe mehangano okwa li ya wedelwa. Ovanhu ava ongaashi nee Apollos Kaulinge oo kwa li ha mono eepelesenda 9 nale ndee paife oipambuliko yaye oya wedelwa neepelesenda mbali.

Eepelesenda dimwe okwa li da pewa ehangano ledina Edward Family Trust navakwao vahapu.

Omunashipundi wehangano, Indila Edward, okwa ti oipambuliko kakwa li ya vakwa po, shaashi elelo lOukwanyama oli na vali oipambuliko mehangano limwe ashike kakwa li la pumbwa okukala li na oipambuliko momahangano avali.

Okwa ti omanga elelo lopamufyuululwakalo lOukwanyama li na oipambuliko momahangano avali, omalelo akwao opamufyuululwakalo kae na omauwa asha.

“Ohatu vatele elelo lOukwanyama nameekulu Nelumbu,” Edward osho a ti ngaho. Okwa pula kutya omolwashike ovo tava nyenyeta kombinga nghee nakufya Hishongwa e ya mehangano tava nyenyeta ashike paife konima yefyo laye.

“Oshike itava popi oinima iwa oyo twe va ningila, ngaashi okulandela meekulu Nelumbu oshihauto?” Edward osho a pula ngaho. Okwa ti mwene womukunda mukulu Hadino Hishongwa oxekulu yanakufya Nestory Denis.

Nestory Denis okwa li e na mo oipambuliko mehangano. Okwa xulifa momudo 2014, omanga Hishongwa a xulifa odula ya dja ko.

“Nelson omukwateli ashike komesho. Okwa hala oipambuliko yaNestory, Nestory ke na ounona vaye vene?” Edward osho a pula ngaho.
Okwa lundila vali Nelson kutya oku na oipamabuliko mehangano limwe leeshi.

Nelulu naye okwa ti konima yefyo lomukulukadi waye momudo 2017, okwa li ashike a futwa oipambuliko yomukulukadi waye oikando itatu.

“Inava pange sha, eedula nhee paife,” Nelulu osho a lombwela oThe Namibian ngaho. Okwa ti shaashi kakwa li vali ta mono omauwa oo, okwa li a hala okulandifa po oipambuliko oyo i li mehangano omo.