Omukalelipo woSwapo momahoololo oupelesidente Netumbo Nandi-Ndaitwah okwa kala nokushekwa eshi a lombwela Ovanamibia kutya ota ka wedela opendjela yovakulupe okudja poN$1 600 fiyo opoN$3 000.
Omuleli wongudu yoPopular Democratic Movement (PDM) McHenry Venaani okwa ti ota danauka novakulupe tava mona ngaa oixuna shili.
Nandi-Ndaitwah eudaneko eli okwe li ninga poshoongalele shoshiwana shi na sha nokufimaneka pelesidente mukulu Hage Geingob kOngwediva Olomakaya.
Venaani okwa ti, Nandi-Ndaitwah oo e li natango omupedu pelesidente woshilongo, ota kendabala ashike okumona omawi.
Okwa ti okwa fyuulula po oupelesidente konima eshi Geingob a xulifa.
“Omolwashike e na okukala pelesidente opo a wedele opendjela fiyo opoN$3 000? Oshike ashike iteshi ningi paife?” Osho a ti ngaho. Venaani okwa ti omukalo ashike ou u li po tau dulu okuwedela opendjela yovakulupe fiyo opoN$3 000 ongeenge ashike epangelo la talulula eenghundafana kombinga yomahooli.
Okwa ti eshi otashi dulu okuvatela oshilongo opo shi ongele oshimaliwa shihapu, osho tashi dulu okuvatela opo opendjela yovakulupe i ye fiyo opoN$4 500.
“Ina danauka momaliudo aGeingob, omufi novakulupe ovo tava mono oixuna,” Osho a ti ngaho.
Omunapaliamente mukulu wongudu yoSwanu Tangeni Iijambo naye ota lundile Nandi-Ndaitwah kutya ota dana opolotika.
Okwa ti Swapo okwa udanekela Ovanamibia oinima ihapu, ashike okwa dopa okwiifimaneka.
“Otava ka kwashilipaleka ngahelipi kutya otava ka fimaneka eudaneko eli?’ Osho a pula ngaho.
Okwa ti Swapo oku na ehalo lokuhoolululwa neenghono.
‘ITASHI DIMBIWA’
Minista woshimaliwa Iipumbu Shiimi muMarsa okwa li a lombwela omutumba wopashiwana kutya epangelo itali dulu okuwedela opendjela yovakulupe momutengenekwafaneko womudo.
“Eudaneko eli opo li wanifwe otali pula epangelo oshimaliwa shi fike peebiliyona N$5,2 tashi wedwa keebiliyona N$4,8 odo epangelo hali longifa paife ndee ashishe kumwe tashi ka ninga eembiliyona N$10,1 kodula,” Osho a ti ngaho.
Omundjadjukununi woikwapolotika Rui Tyitende okwa itavela kutya eudaneko lomupedu pelesidente etukano koshiwana shaNamibia.
“Onghee, oshinima eshi shomawedelo osha tanauka ngahelipi?’ Osho a pula ngaho.
Okwa ti omapopyo aNandi-Ndaitwah okwa holola kutya ongudu tai pangele otai ningi keshe shimwe opo i kale melelo natango.
“Omapopyo aa okwa ulika kutya Swapo okwe lilongekida opo a mbangolotife oshilongo opo ashike a dule okukala ta pangele natango. Epulo ole li kutya: otashi pula shike?’ Osho a pula ngaho.
‘KA LIWA’
Omunapaliamente mukulu Mike Kavekotora okwa ti epopyo laNandi-Ndaitwah ka liwa.
“Kakwa li liwa nandenande eshi nakufya pelesidente kwa li a shiivifa oshinima eshi ndee natango otashi longifwa ongomukalo wopolotika eshi tashi endululwa kuNandi-Ndaitwah,” Osho a ti ngaho.
Okwa ti okuwete kutya Shiimi okwa li a nyika “ouvaya” eshi kwa li ina lombwela Geingob kutya ehalo laye itali dulu okuningwa.
“Okwa li a pumbwa okulombwela pelesidente kutya opa pumbwa okutulwa moilonga oinima imwe meliko loshilongo opo oshinima eshi shi dule okulonga,” Osho a ti ngaho.
Kavekotora okwa ti ongudu tai pangele ohai ningi omaudaneko iheshi ngee oinima otai dulu ngaa okuningwa.
“Oupyakadi woSwapo ohashi popi oinima inashi tala tete ngee onghalo yeliko loshilongo otai shi pitike ngaa,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
