EULIKO longuduwiliki ipe yehangano lomahooli lopashiwana ledina Namibia Petroleum Corporation of Namibia (Namcor) okwa teelelika li ka kwatela komesho omalunduluko mehangano, mwa kwatelwa oilonga yomukulunhuwiliki wehangano.
Omalunduluko a fimana omwa kwatelwa okumanifa oihokolola yetulopedu lomukulunhuwiliki wehangano Immanuel Mulunga nepopilo laao e li omukulunhuwiliki wopakafimbo paife Ebson Uanguta opo a twikile nokukwatela komesho ehangano.
Oinima ei ipe otaku tiwa oya teelelika i manufululwe komesho yewilikongudu lipe, tali kwatelwa komesho ku Florentina Amuenje, tai mombelewa mefiku 01 Juli. Oshikako shewilikongudu olo li li ko paife, tali wilikwa komunashipundi Jennifer Comalie, otali xulu omwedi ou.
Ashike nee, ovayambididi vaMulunga otava ti ewilikongudu olo tali di ko otali fininike omunashipundi wokangudu kokuungaunga noihokolola mehangano opo a yandje osho a tokola omanga omwedi ou inau fya.
Mulunga, oo a kala a tulwa pedu oule weehani 14, okwa taalela oibofa yokutuma oshimaliwa shi fike peemiliyona N$100 inashi pitikwa yehangano lomahooli laAngola naashi kwa li vati a kwatelwa mokutuma oimaliwa i fike peemiliyona N$53 yehangano lovakwaita ledina Enercon. Oihokolola yaMulunga oya kwatelwa komesho komhupanguli mukulu womhangu ya shiya ko e li moshipundi shetulumoko Gerhard Maritz.
Maritz ina monika nande opo a tye sha.
Comalie okwa ti: “Inandi longa nale nomhupanguli nokandi na onomola yaye. Dengela ovawiliki.”
Omukalelipo wopaveta waMulunga Jermaine Muchali okwa ti ewilikongudu olo tali di ko kali na oufemba wokufininika omunashipundi a manife oihokolola.
“Osha fimana okuuda ko kutya pefimbo opo oihokolola yomunhu wetu i li metifa, inashi fimana vali koilyo yewilikongudu olo li li pokufiya po oNamcor,” Osho a ti ngaho.
“Omunashipundi okwa ninga omukwateli komesho woihokolola. Onguduwiliki ei i li ko paife naayo tai uya ko kai na oufemba wokufininika omunashipundi kutya onaini ile ongahelipi oihokolola i na okuuya pexulilo.”
Muchali okwa ti oku na omukumo kutya omunashipundi woihokolola ota kala e na ouyuki nokwa itave la kutya ita ka endelelifwa.
“Omunashipundi omhupanguli mukulu omunawino womhangu ya shiya ko e li moshipundi shetulumuko, oo ehe na efiku a fininikwe komunhu ile kehangano lopaveta,” Osho a ti ngaho.
Muchali okwa ti oihokolola yaMulunga oya kala nale ihe li pauyuki noya kala i li olwaamambinga. Muchali okwa ti, oihokolola i li pauyuku oya kwatela mo kutya omunashipundi oku na oufemba wokuninga etokolo moule wefimbo la wana pakutala kutya oihokolola yaMulunga oya kula.
“Okufininika omunashipundi payukililo ile pahenu opo a ninge etokolo koihokolola ihe li pauyuki. Otwa tongola mo omunhu wetu moshinima eshi kutya omunashipundi na yandje etokolo omanga oshikako shewilikongudu olo li li ko paife inashi fika pexulilo. Otu udite kutya omunashipundi na ninge etokolo ngee e wete kutya okwe lilongekida okushininga.”
Odjo oya ti Mulunga okwa teelelika a fiye po Namcor kehalo laye ile pakuxulifapo eudafanoilonga.
Eedula da dja ko, ehangano ola kala li li koshi yeengunga nai, ekondjelo lelelo, omalundilo oingangamwifi, okulongifa oshimaliwa papuko, ovakulunhuwiliki tava kufwa moilongo nomapopyo a lungalitapula.
Paife eshi Uanguta oye ta wilike, ehangano paife otali longo mo omikalo diwa dokuya komesho. MuApilili, Namcor okwa li a kulilwa mo kepangelo noshimaliwa shi fike pobiliyona imwe oshinghwanyu mbali opo a xwepopaleke oilonga yaye.
NAMCOR OKWA HALA UANGUTA
Uanguta oo a kala omukulunhuwiliki wopakafimbo woNamcor okudja muJanuali, okwa teelelika opo a ka twikile natango pakafimbo.
“Tete oulefimbo weemwedi hamano otau wedelwa nekoleko longudwiliki yaNamcor noministi ya kwatelwa mo,” Omupopiliko woNamcor Paulo Coelho okwa li e shi koleka koThe Namibia omwedi wa dja ko.
“Uanguta ota twikile noilonga ei fiyo otashi ka shiivifwa komesho. Keshe etokolo kombinga yewedelo loshikako shaye ile keshe elunduluko lasha kombinga yoilonga yaye otali ka popiwa diva,” Coelho osho a ti ngaho. Coelho natango okwa ti Uanguta okwa eta elunduluko moNamcor ashike okwa popya kutya ehangano itali dulu okuhoolola omukulunhuwiliki umwe ta kalelele fiyo oihokolola ya pwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
