Ina wanifa po omaudaneko aye okufuta oshimaliwa shombaanga yoSME

Omunambaanga waZimbambwe novakufimbinga vashona ovo va kwatelwa metekepo lOmbaanga yoSME Enock Kamushinda okwa li a itavele tete opo a fute oshimaliwa shombaanga shi fike peemiliyona N$140 sho moshimaliwa shi fike peemiliyona N$247 osho sha vakwa mombaanga.

Ashike nee, Kamushinda okwa futa ko ashike eemiliyona N$3 ndee ta tameke okupula ongushu yomukandadimino wokufuta eemiliyona N$140 novanhu ovo tava ungaunga noshinima eshi shetekepo lombaanga, okwa ti kutya okwa li ashike a shaina omukanda oo shaashi okwa li a tila okumangwa po, eshi osha hololwa komikanda odo da dja komhangau yopombada yaZimbambwe.

Kamushinda okwa ti kutya okwa li a ningilwa omatilifo kutya ota mangwa po opo a ka shaine eudafano olo.

Ashike nee,David Bruni, omunambelewa umwe oo ta ungaunga noinima yombaanga ei, okwa nukila pomutenya kombinga yomapopyo atya ngaha.
“Ohandi anye omapopyo aa neenghono,” Osho a ti ngaho.

Kamushinda ina yandja nande oumbangi umwe opo a yambidide omapopyo aye nokwa dopa okuyandja omatilifo meyukililo nokupopya ou e mu ningila omatilifo atya ngaho.

Okwa fiya po Namibia pahalo laye omanga Ombaanga yaNamibia inai kufa po Ombaanga yoSME muMarsa 2017 nokakwa li aa lukila mo vali okudja opo, ovanambelewa ovo tava ungaunga noinima yOmbaanga yoSME osho va ti ngaho.

Ovanambelewa ovo tava ungaunga noshinima eshi ova ti Kamushinda oye omukwateli komesho woumbudi woshimaliwa shi fike peemiliyona N$247 odo da vakwa mOmbaanga yoSME pokati kaDesemba 2013 naDesemba 2016.

“Nande ngeno Kamushinda okwa li a tila okumangwa po,ita dulu kutya ekwatepo olo kali li paveta. Oumbanda wokumangwa po shi li paveta itau dulu okukala etomeno lokukala ina wanifa po eudafano lokufa oshimaliwa shombaanga,” Bruni osho a ti ngaho.

Eimaila nomikanda domhangu oda ulika kutya oilonga nomapopyo aKamushinda otaa kondjifafana.

Eudafano lokufuta oshimaliwa okwa li la pulwa kuKamushinda yeemwene, okupitila muhaende waye mukulu Francois Bongamwabo.

Edafano okwa li la shainwa koHarare momafiku 18 Desemba 2020, konima yeedula nhatu eshi Kamushinda a fiya po Namibia.

Okwa li la shainwa kuKamushinda, ovakulunhuwiliki vakulu vOmbaanga yoSME Tawanda Mumvuma naChiedza Goromonzi, ookwa li omunailonga koshikondo shoimaliwa.

Konima eshi omukandaudafano wa ningwa omukanda womhangu mo25 Januali 2021, Kamushinda okwa kala nokudimina ongushu yomukandaudaudafano eshi a kala ta pula opo a wedelwe ko omafiku yee a dule okufuta eemiliyona N$140, eeimaila odo da leshwa koThe Namibian osho da ti ngaho.

OMAUDAFANO

Kamushinda, okupitila mu Bangamwabo, momafiku 03 Novemba 2020 okwa li a tula po eudafano lokufuta oshimaliwa shi fike peemiliyona N$120 tadi futwa poshikando “okuxulifa po oshinima eshi lumwe aluke noxulifa po omatamaneko oo e li metifa”.
Oshimaliwa eshi okwa li tashi futwa ngeno moule womafiku 30 konima eshi kwa shainwa eudafano.
Oshinima eshi okwa li sha anywa kovanambelewa ovo tava ungaunga noshinima shi li ngaha momafiku 05 Novemba 2020 shaashi ove shi tala ko sha fa shi li pedu unene.

Momafiku 9 Novemba 2020, haende waKamushimba okwa li a pula opo va fute ko eemiliyona N$130 moule womafiku 60 konima eshi va shaina eudafano.

Kamushinda okwa li a hala ovanambelewa opo va ekeleshi oshibofa. Oshibofa osho sha tulilwa mo Kamushinda navakwao vamwe shi na sha noumbudi woshimaliwa shi fike peemiliyona N$247 odo kwa li da vakwa mOmbaanga yoSME.

Eembinga adishe mbali okwa li da udafana opo ku futwe oshimaliwa shi fike peemiliyona N$140, eudafano olo kwa li la shainwa kuKamushinda, Mumvuma naGoromonzi moHarare momafiku 18 Desemba 2020.

Pefimbo olo tuu olo, Kamushinda okwa li natango a shaina edafano li na sha nomahangano aye omoNamibia Crown Finance Corporation naHeritage Investments Holdings.

Ashike nee, Kamushinda navakwao inava futa nande oshimaliwa ngaashi kwa li sha udafanwa.
Ponhele yokufuta, ova kala ashike nokuninga omaudafano.

Kamushinda okwa li ashike a futa oshimaliwa shi fike peemiliyona N$3 ndee okudja opo okwa mwene osho.