Kepaya otaku di koo taku i

Meekandiate domahoololo oupelesidente oo taa ka kala ko muNovemba neudo omwa wedwa vali okandidate imwe ye lifikamena po yoovene.

Omuunganeki wongudu yoRepublican Party (RP) koshitopolwa shaKunene Lisbeth Kaumbi (42) okwa ti ota ningi Namibia oshilongo shaputuka moule weedula nhano ngee okwa hoololwa a ninge pelesidente.

“Efeni ndi mu lele ndee handi kwashilipaleke kutya onda lundulula Namibia okudja koshilongo inashi putuka okuninga oshilonga sha putuka,” Osho a lombwela oThe Namibian ngaho Etitatu.

Pelesidente woRP okwa ti okwa ehamekwa nai ketokolo laKaumbi.

“Osha nyika oulai neenghono! Ngee ovanahu ngaashi yee otava dulu ashike okupenduka netokolo li li ngaho lokukufa ombinga moupelesidente, omunhu oto lipula ashike kutya oshike sha puka moshilongo omu,” Mudge osho a ti ngaho.

Okwa ti Kaumbi omushona yee ke na owino.

Kaumbi oo a waimina okandidate youpelesidente yoSwapo Netumbo Nandi-Ndaitwah neekandindate di li nhatu de likalele po doovene, Rosa Namises, Lydia Kandetu naAlly Angula, ongekandidate dovakainhu, okwa ti okwa hala okuxulifa po omafindilo kongudi nokuxwaxwameka ovakainhu va ninge ovaleli.

“Ondi wete omumbwe yokulundulula oshilongo shetu oshiholike nokweeta epangelo li na omilandu diwa deliko, ongahalafano, oukwamuhoko nomudingonoko u na ouyuki,” Osho a ti ngaho.

Kaumbi okwa ti okwa hala okuyambula po nokuyambidida ovanyasha, ta ti vali okwa hala okukelela lungalitapula nokatongotongo meembelewa depangelo noshoyoo oinima aishe ya pamba okatongotongo.

Fiyo opapa, ovanhu vahamano ova koleka kutya ove na ehalo lokuninga eekandidate de lifikamena.

Ashike nee nande ongaho okatendo oka5 komudo 2014 kokakomisi komahoololo kaNamibia otaka ti okadidate ye likalela po yoovene oya pumbwa okukala tai yambididwa kovanhu ve li 500 ve linyolifa omahoololo keshe moshitopolwahoololo.

OTASHI KUMWIFA

Omundjandjukununi woikwapolotika Ben Mulongeni okwa holola onghumwe yaye komwaalu weekandidate de lifikamena po doovene oo tau ningi uhapu.

Okwa ti kape na eudeko la ya moule lopolotika.
“Vahapu ove na ashike omadilaadilo e lifa. Omolwashike itava i kumwe novanhu ovo ve na omadilaadilo a fa avo, opo va dule okumona enyamukulo limwe?”

“Ovanhu ova udifwa nai keengudu.

Vamwe otava longo noudjuu okumona eemhito momalelo meengudu, novamwe ova hala eemhito defimano, sho osho u wete va mona kutya ngee ova kala kuvoovene otave di mono noupu,” Osho a ti ngaho.

Mulongeni okwa ti oshinima eshi otashi eta omawi opo a topaulilwe ovanhu vahapu, osho tashi eta ashike opo eengudu odo dakula odo ashike di mone omawi awa.

Omundjadjukununi woikwapolitika Johannes Coetzee okwa ti omu na omumbwe yovaleli voshili moNamibia
“Ngee ovanhu otava dilaadila kutya otwa pumbwa ovakufimbinga vahapu momahoololo oupelesidente, va efini ve lifende mokukufa ombinga momahoololo oupelesidente,” Osho a ti ngaho.

INAVA HAFELA OVALELI

Coetzee okwa ti ovanhu inava hafela ovaleli vopolotika.

“Inave lineekela ovaleli vopolotika. Paife efimbo lokulundulukila keekandidate odo inadi kalela po nande ongudu yopolotika younumba.” Okwa ti okumona omawi 500 okuyambida eekandidate edi oshipu.

“Ondi wete kutya naame ohandi shi dulu osho medina ashike lokudanauka nomulandu oo wa tulwa po kovanhu ovo inave udilaadila nawa,” Coetzee osho a ti ngaho.

Omundjadjukununi umwe wopolotika Ndumba Kamwanyah okwa ti oshinima eshi otashi dulu okudanena oidjemo yomahoololo oyo tai dulu okweete omukufimbinga oo ina halika oye a findane.

Ashike, nande ongaho, okwa ti ovanhu ova hala elunduluko olo eengudu odo di shiivike nawa itadi eta moshilongo.

Natango, Kaumbi okwa ti ongokandidate ye lifikamena po yoovene eekambaina daye otadi ka kala da nafangwa molwomumbwe yoshimaliwa.

“Onda tameka nale novakwapata, ookaume novanashamalia opo va yambidide neekambeina, onda itavela kutya otava ka vatela. Paife, okambaina otai lotoka nomapandja omalungula a yooloka ashike omanyamukulo oo handi mono otaa tu omukumo neenghono,” Osho a ti ngaho.