Kotokela ookalyamupombo

… omuprima minista a kengelelwa oshimaliwa shi fike poN$159 000

Omuprima minista Saara Kuugongelwa-Amadhila oshivike sha dja ko okwa li a lombwela opolifi nghee a kengelelwa kukalyamupombo oshimaliwa shi fike poN$159 000 momukalo oo mwa kwatelwa ombaanga yomonakadona.

Kuugongelwa-Amadhila, oku li omunapolotika e shiivike nawa nokwa kala ominista yoshimaliwa oule weedula12 omanga ina ninga omuprima minista. Okwa li a lombwela opolifi kombinga yoshinima eshi Etitatu, konima eshi kalyamupombo e mudengela ongula yefiku olo.

“Metitatu lomafiku 05 Juni. . . okwa li nda dengelwa komulumenhu ta ti oha longo mombaanga koshikondo shedina First National Bank Private Wealth, oo kwa li a hala okuvatela nge opo a tumine nge okakalata kape kombaanga,” Osho a ti ngaho.

Omuprima minista okwa ti, omunambaanga ou okwa pula opo a yandje omauyelele aye okumbaanga pamalungula.

“Tete onda nukila pomutenya ndee handi mu lombwele kutya inandi manguluka okushininga pangodi. Okwa ti kutya ota vatele nge,” Osho a ti ngaho.

“Onde mu lombwela kutya kandi mu shi nokapu na nande osho tashi holola kutya yee omunailongo woFirst National Bank,” Osho a ti ngaho.
Kuugongelwa-Amadhila okwa ti omufeekelwa okwe mu udifa ko kutya oha longo shili mombaanga.

“Omulumenhu okwa pula opo ndi mu pe onomola yange yopaumwene yokupatulula ombaanga yange ndee ta pula opo ndi patulule ombaanga yange pamalungula, okwa tu mina nge nee onomola, oyo a pula opo ndi mu tumine vali,” Osho a ti ngaho. “Okwa tameka okupula nge kombinga yombaanga yange yoNedbank, ashike onda anya okumupa ouyelele kombinga yayo, onde mu lombwela kutya kandi na ouyelele wayo. Okwa kala nokupula nge opo ndi mu pe ouyelele, ashike onde shi anya shaashi okwa li nda tameka okufeekela kutya osha nyika oumbudi,” Omuprima minista osho a ti ngaho. Konima ashike yongodi, ongodi yomuprima minista oya lopota kutya oshimaliwa shi fike poN$127 000 osha dja ko kombaanga yaye. Natango oshimaliwa shi fike poN$720 nashimwe shi fike poN$31 290 okwa li vali sha kufwa kombaanga yaye.

Oimaliwa ei okwa li ya tuminwa kombaanga yomonakadona waKuugongelwa-Amadhila, Ndapanda Amadhila.

“FBN oya holola kutya oshimaliwa osho kwa li sha tuminwa kombaanga yomonakadona wange okudja kombaanga yange, okwa li vali sha tuminwa keembanga dimwe.

“Oimaliwa imwe okwa li ya tuminwa koBank Windhoek. Eshi nde va dengela, ova koleka kutya oshimaliwa shi fike poN$50 000 okwa li sha nanwa ko komufeekelwa.

Kuugongelwa-Amadhila okwa ti, oBank Windhoek inaI popya ngee oshimaliwa shikwao osho shi fike poN$50 000 nasho osha nanwa ko ile inashi nanwa ko, ashike oya holola kutya oya pata ombaanga oyo opo kuha dje oshimaliwa vali.

“Omushangwa oo we ya kongodi yange okudja kombaanga owa ulika kutya oshimaliwa shi fike poN$127 999 okwa li sha dja kokakalata kange kokulanda, kumwe okwa dja oshimaliwa shi fike poN$31 290 nakukwao okwa dja ashike oN$720.

“Oimaliwa aishe okwa li ya tuminwa kombaanga yaNdapanda Amadhila. Ombaanga ei okwa li ya ningwa kwaame eshi kwa li mushona, ashike eshi a wanife eedula 16 okwa li a ya kombaanga opo e ke i tule kedina laye filufilu ashike okwa li a lombwelwa kutya ina pumbwa okuninga ngaho shaashi ombaanga oye shi ninga nale yoovene,” Omuprima minista osho a ti ngaho. Okwa ti omonakadona ina dengelwa nande ile a yandja omauyelele aye ombaanga komunhu.
‘KAPU NA EPITIKILO’

Ashike nande ongaho, ombaanga oya ti oimaliwa oyo kwa li ya tuminwa kombaanga yaye okwa li va li ya tuminwa keembanga di lilile ile kwa li ya nanwa ko pamikalo da yooloka. “Kapu na nande ou a pitika oshinima osho pokati ketu nokaana kange. . . oshiningwanima eshi okwa li nde shi lopota tete koFirst National Bank konima eshi ongodi yange ya lopota kutya kombaanga yange okwa dja oshimaliwa ndee handi pula opo va pate ombaanga yange ndee tava alula oshimaliwa osho sha kufwa ko,” Osho a ti ngaho. Kapu na nande omunhu a mangwa po mekwatafano noshinima eshi fiyo opapa. Ashike okwa didilikwa kutya edina lomuprima minista ola kala nokulongifwa mominyeka doludi eli kookalyamupombo.

Momudo 2022, ombelewa yaye okwa li ya yandja ekunghililo kombinga yeengodi tadi dengwa tadi pula evatelo loshimaliwa taku longifwa edina laye.