Muharukua okwa wainima Swapo

… ongudu oyo a kala ta ti otai longifa oikulya opo i nane ovahoololi

Omunapaliamente mukulu wongudu yoPopular Democratic Movement (PDM) Vipuakuje Muharukua okwa wainima ongudu yoSwapo pambelewa, ongudu oyo kwa li a kala nokulundila kutya otai longifa omavatelo oikulya yoshikukuta opo i mone ovahoololi.

Okwa li yoo va li a lombwela opaliamente kutya Swapo ota popile lungalitapula shaashi otaa mene oFishrot.

“Ngee ombudi tai ku lombwele kutya inai vaka, kala ashike u shi shi kutya oya vaka lela. Minista mukulu wouyuki [Shanghala] okwa li e li omutumba penya. Oye naana kwa li taamene lungalitapula moSwapo. Ashike nena oku li modolongo. Ovanamibia ihava kufa ko oitya yoSwapo ngee tashi ti kashi na oulingilingi. Ohatu kufa ondjokonona yoSwapo ongoumbangi wokuninga lungalitapula,” Muharukua osho a ti ngaho.

“Epangelo e li otali yandje oikulya yoshikukuta tali ti oinima yoSwapo nonghee nee ovanhu nave shi hoolole. Ndee osho omukalo wokufuta ombumbo. Ovanailonga vepengelo ohava i ndee tava ka lombwela ovanhu kutya ei oikulya yoSwapo, ndee hoololeni oSwapo,” Muharukua osho kwa li a popya ngaho momudo 2022.

Muharukua okwa shiivifa oukwashilyo waye koshoongalele shoikundaneki sha li mOvenduka Etivali.

Okwa ti oshe mu pula eehani 16 opo a ninge etokolo a waimine Swapo, osho a ninga momafiku 20 Juni.

“MuDesemba 2022, okwa li nda hangwa komumbwe yokutokola ngee nandi twikile ngaa okukala oshilyo shopaliamente,” Osho a ti ngaho.

Muharukua okwa ti Namibia okwa kala nokutyapula eliko li li ponghatu iwa oule weedula 34, oshinima osho puhe na nande omunandunge te shi pataneke.

“Pemanguluko momudo 1990 eliko letu okwa li la fikama peebiliyona U$2,79, momudo 2023 okwa li la tengenekwa li kale peebiliyona U$30. Otwa kala tu na eliko tali i pombada nawa moule weedula 34,” Muharukua osho a ti ngaho.

Okwa ti okutala kashona opo eliko loshilongo la dja naapa la fika paife, otashi popile elineekelo laye.

“Momahoololo omudo 2024 ohandi ka yandja ewi lange kupelesidente ou ndi wete kutya ota dulu okulonga oilonga, Netumbo Nandi-Ndaitwah.

Ota ka yandja omayakulo. Omawi etu naa ninge Namibia lakola, omo keshe umwe ta kala a hafa,” Muharukua osho a ti ngaho.

Okwa ti omunhu ngee okwa kufa po oinima youkwamuhoko noitopolwahoololo, okwa itavela kutya Nandi-Ndaitwah oku na osho sha pumbiwa okulundulula Namibia.

Omupedu hamushangandjai woSwapo Uahekua Herunga, okwa ti omutotiveta mukulu oku na mo ovakwapata vahapu mongudu.

“Muharukua, omunhumenhu umwe a kola. Eyambidido laye koSwapo otashi dulika nokuli li dule lange molwowino waye apa naapenya.

Exwaxwameko laye apa naapenya. Onghee nee, hamunhu e mu shindi ile e mu luke omadina,” Herunga osho a ti ngaho.

KULIPI KU NA

Omundjandjukununi woikwapolotika Rui Tyitende okwa ti opu na okuhakwatafana kwa kula pokati kaashi Muharukua ta popi nena naasho kwa li a popya eedula 9 da pita ongoshilyo shoPDM mopaliamente.

Tyitende okwa ti pefimbo Muharukua kwa li oshilyo shopaliamente shoPDM, okwa li ta kelele lungalitapula nomilandu depangelo loSwapo odo dihe li pamufika ndee okwa li e wete oPDM kutya oyo tai shikula ko koshipundi nota ka ndana onghandangala mepangelo layo.

“Oshike sha lunduluka? Okwa tameka okukala e hole Swapo naini? Ova tameka okukala ve na ekwatafano naini? Ohole oyo i li pokati kavo oi li ngaa eembinga adishe? Oshike she mu tondifa oPDM? Okwa li omalipumo mumwe kombinga yomayooloko omilandu?” Osho a ti ngaho.

Tyitende okwa ti opolotika oshinima ashike shokumona omauwa opaumwene paife ndee kashi shi vali oshinima shomauwa oshiwana.

“Eshi otashi monika sha fa okukambaina kwa longekidwa ndee kandi wete ngee otashi denge ngaa oPDM pomutima shaashi Muharukua ke na oshimaliwa osho tashi dulu okuyambidida Swapo, kakele ashike kewi laye,”Osho a ti ngaho.

Omukonakoni wopolotika Kae Matundu-Tjiparuro okwa ti efiyepo laMuharukua loPDM nali ete omalipulo kombinga yomilandu deliko pokati keengudu edi mbali.

“Omunhu ke na eshi ta dulu okuninga, ote lipula ashike okunghonopeka osho tashi popiwa kombinga yeliko koshi yepangelo loSwapo kuMuharukua,” Osho a ti ngaho.

Matundu-Tjiparuro okwa ti Muharukua otashi dulika a kala ta shindwa moPDM.