Omukulunhuwiliki woministili youndjolowele nomayakulo opanghalafano Ben Nangombe, okwa ti moshipangelo shepangelo shaKatutura kamu na nande omumbwe yeembete, nande okwa itavela kutya kamu na eenhele.
Oshinima eshi oshe ya konima yeelopota dovadali vahapu ovo va tambulwa moshipangelo va lombwela oThe Namibian kutya okwa li tava nangala pedu nounona vavo shaashi moshipangelo kamu na eembete da wana.
Ashike nande ongaho, Nangobe okwa ti oshipangelo oshi na eembete da wana dovanaudu.
“Oshipangelo oshi na eembete da wana dovanaudu. Oupyakadi ou tau hololwa kehokololo loye oweenhele inadi wana moshipangelo,” Osho a ti ngaho.
Nangobe okwa ti oshiwana osha ninga shihapu, osho tashi eta oshipangelo shi kale shi yadi.
“Ngaashi naana tashi dulu okupandulwa, omwaalu wovanhu moshilongo owa ya pombada osho tashi eta moipangelo mu kale mu yadi.
Molwetomeno eli, oshihopaenenwa, oshipangelo shipe otashi tungwa mOvenduka opo kuxwepopalekwe omwaalu wovanhu moipangelo oyo i li po paife,” Osho a ti ngaho.
Nangombe okwa ti epangelo ola yandja oshimaliwa shi fike peembiliyona N$16 okutula moilonga oinima yonumba ngaashi okuwapaleka, okuwedela nokutula omaukwatya omatungo pamufika, okukuta ovanailonga vouhaku moikandjo ya yooloka, nokulanda oikwa noipangifo.
“Ondunge ei otai lalakanene okunghonopaleka eyandjo lomayakulo moitopolwa ya yooloka moshilongo. Oshinima shimwe okwaandjakaneka vali omashina okupanga eefiyo moshilongo, nosho yo omipepo moipangelo aishe yomoshilongo. Etulomoilonga loinima ei otali ka eta omayakulo popepi novanhu opo vaha kale vali tava ende oinano ile va ka mone omayakulo. Oshi li ombinga yokuxwepopeka oundjolowele mounyuni,” Osho a ti ngaho.
Nangombe okwa ti molweenhele odo inadi wana elelo loshipangelo ola tokola opo li kufe mo manga oumbete ovo hava dulu okupangululwa mo unene hava longifwa kounona meenduda opo li dule okumona onhele yomatalashe ovanaudu.
“Eenduda edi di li momawalanda omu otadi wana ashike okambete kamwe kokaana. Ashike nee, eshi hatu kufa mo oumbete vounona, otapa kala onhele yovanaudu vahapu. Oshinima eshi otashi kwashilipaleke kutya ooina younona inava tumwa komaumbo, ashike ove li popepi nounona vavo ovo ve li meembete opo va dule nokunyamifa, shaashi oshi li sha fimana koukolele wounona ovo vehe udite nawa.
“Okutopola ounona nooina pefimbo eli lidjuu itashi vatele ounona va veluke novakale ve na ekwatafano liwa nooina. Kashiwa koukolele wounona,” Osho a ti ngaho.
Petameko lomwedi ou, oThe Namibian okwa li ya lopota kutya oomeme ve li 60 nounona vavo otava nangala pedu, omanga kwa li ovanaudu ve li 50 kwa li tava nangala meetenda.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
