Omupedu minista woilonga noyeendifo Veikko Nekundi okwa itavele kutya Swapo ota ka mona oipundi i li 96 mopaliamente konima yomahoololo aNovemba oupelesidente nomutumba wopashiwana.
Nekundi okwa li a xupifwa komupedu pelesidente woSwapo Netumbo Nandi-Ndaitwah, oo kwa li a weda edina laye momusholondodo weekandidate di li omulongo odo a hoolola, konima eshi a dopa okushipondola okudja mombiya yoSwapo omo mwa dja ovanhu ve li 96, ovo tava ka dula okuya mopaliamente.
Nekundi okwa pingena po omukulunhuwiliki woministili yomaudano Erastus Haitengela momusholondodo womupedu pelesidente.
“Ondi na omukumo kutya Swapo ota ka mona oipundi 96 mopaliamente,” Osho a ti ngaho.
Omupopiliko woSwapo wopashiwana Hilma Nicanor okwa ti eenghono daNekundi ode mu pefa onhele momusholondodo waNandi-Nadaitwah.
“Oshi li pambelewa, Nekundi okwa hoololwa momusholondodo weekandidate domupedu pelesidente. Okutambula ko eendunge daye, okwa hoolola ongudu yovanhu ve lineekelwa ovo elelo lavo la pandulwa neenghono kongudu,” Nicanor osho a ti ngaho.
Nekundi okwa ti okwe lilongekida alushe okuvatela oSwapo ikule, kutya nee omopaliamente ile kashi fi mopaliamente.
“Swapo oku na ovayambididi ve li lwopomiliyona, atushe itatu i kopaliamente,” Osho a ti ngaho.
Haitengela okwa ti kapu na sha nande sha puka kombinga yetokolo laNandi-Ndaitwah.
“Onda kala nale ndi na okakalata koSwapo okudja nale manga oshilongo inashi manguluka nondi li omuhoololi a nyolifwa. Onda kala nokuhoolola okudja pemanguluko,” Osho a ti ngaho.
“Ohandi ka hoolola omufimanekwa, Netumbo Nandi-Ndaitwah wetu moupelesidente, nosho yo ongudu yetu ya fimana yoSwapo momafiku 27 Novemba,” Osho a ti ngaho.
Omundjadjukununi woikwapolitika Ndumba Kamwanyah okwa ti okupingena po ovahoololwa otaku eta omalipulo ahapu a fimana.
“Omunhu owa kumwa nee kutya oshike Nandi-Ndaitwah ina teelela konima yomahoololo opo a hoolole Nekundi a ninge umwe womoilyo yopaliamente ihetatu oyo ihai hoolola. Epingenepo lomeendelelo eli, manga omahoololo inaa ningwa, ola fa inali monika nale,” Osho a ti ngaho.
Kamwanyah okwa ti, eshi ovayambididi vaNandi-Ndaitwah inave shi pondola nawa mombiya yoSwapo, otashi eta omalipulo ngee epingenepo eli otali ulike omakondjifafano omeni ile ekondjelo leenghono tali ningwa konima yomivelo.
Eshi otashi dulika tashi ulike omukalo wa longekidwa u li konima yetokolo eli kashi fi ashike okuhadeka onhele oyo, Kamwanyah osho a ti ngaho.
Oshinima shimwe otashi dulika onghatu ashike yokuvatele Nekundi a mone omhito, oo ine shi pondola okuya momusholondodo wotete wovanhu ve li 70 okudja mombiya yoSwapo.
“Noipundi yoSwapo yopaife mopaliamente i li 63 otashi monika sha fa shidjuu opo Nekundi a ye kopaliamente puhe na euliko eli. Onghee nee, ou otashi dulika ashike omukalo wokukwashilipaleka kutya oilyo yongudu ya fimana oi na onhele mopaliamente ngee inai shipondola okudja momahoololo akwalukeshe,” Osho a weda po ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
