Hamushangandjai woSwapo Sophia Shaningwa nosho yo oshilyo shongudu Reinhold Shipwikineni okwa li ve liula oitya idjuu mexuliloshivike.
Eshi oshe ya eshi va yuka komhangu shi na sha nokuninga oshoongalele shokuhoolola pelesidente wongudu.
Shipwikineni okwa lombwela oThe Namibian Oshoondaxa kutya omukanda oo wa yandjwa komhangu yopombada kuShaningwa kau li mondjila nou yadi oitwa ihe na mwango.
Swapo okwa yandja omukanda komhangu tau popile etokolo lokuhaninga oshoongalele kuka hoololwa pelesidente wongudu.
Ongudu kai na pelesidente fiyo opapa nghee pelesidente Hage Geingob a xulifile muFebuluali.
“Onda itavela kutya ohatu ka findana po oshibofa eshi sha fimana nosho yo omukanda wavo uhe li mondjila wokomhangu, nosho yo eindilo olo li li omige naame, otau kanyamukulwa nawa,” Shipwikineni osho a ti ngaho.
Okwa ti Swapo ke na nande okandidate komahoololo oupelesidente ke li paushili.
“Opu na ovaleli vamwe voSwapo, ovanhu ovo va mona omauwa moFishrot nosho yo ovaungaungi noifuta oyo tava pukifa oshiwana nokushipweela oveta,” Shipwikineni osho a ti ngaho.
Shaningwa okwa ti Shipwikineni oha ningi omatokolo meendelelo, omupiyaaneki yee ota lalakanene okumona omapuko melelo longudu.
“Oha popi oipupulu nawa nosho yo okuyandja ouyelele uhe li mondjila kombinga yelelo longudu.
Okwa itavela kutya ngee ta ningi omatukano oufemba waye wokupopya eshi a hala.
“Omunapolitika wokukonga omapuko oo e na ohokwe yakula yokukakeka ovaleli va fimana vongudu,” Shaningwa osho a ti ngaho.
Shipwikineni, Peter Shituula, Joshua-Vaino Martins navakwao vamwe otava kondjifa oSwapo opo i ninge oshoongalele shokuhoolola pelesidente.
Ovakalelwa po kuRichard Melcalfe.
Omundjadjukunini woikwapolitika Ndumba Kamwanyah okwa ti ongudu nai popile omukalo uwa opo oilyo yayo i dule okukala tai yandje omaliudo ayo puhe na okuhandukilwa.
“Pakuninga oshinima osho, ongudu otai dulu okukwatela po oukumwe omanga tai yambula po omilandu doudemokoli.
Eshi kwa li ta popi noThe Namibian Oshoondaxa, omundjadjukununi woikwapolitika Ben Mulongeni okwa ti elelo longudu nali lihonge okuungaunga noinima yomeni longudu nawa.
“Omunhu okwa pumbwa okukala e udite ko omakondjifafano oo e li pokati kongudu novanhu. Ngee ovaleli vongudu otava ningi omatilifo, otava tuku ile okutaataya oilyo oyo itai tu kumwe navo, otashi dipaya ongudu,” Osho a ti ngaho.
Mulongeni okwa ti eshi Swapo a taataya Panduleni Itula, ovalanduli vahapu vongudu ova shikula ko ndee tava toto ongudu yoIndependent Patriots for Change.
“Lipula ashike ngee owa taataya keshe oshilyo osho itashi tu kumwe naave, ovanhu vangapi tava ka shaala mo mongudu?” Osho a pula ngaho.
Okwa ti oshinima eshi shomakulukuto mongudu yoSwapo nomukalo wokushilonga mo osha eta ongudu i kanife oipundi ihapu momutumba wopashiwana nosho yo movaleli vopaitopolwa ovo va kalela po ongudu.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
