Omahangano omoshilongo otaa ti inaa kwatelwa mo motendela yokapale yongushu yeemiliyona N$60

Oministili yomaudano, ovanyasha nomayakulo oshiwana oya taalela omalundilo kutya inai kwatela mo omahangano omoshilongo motendela yokuwapaleka okapale kedina Independence Stadium mOvenduka.

Oilonga ei otaku tengenekwa i na ongushu yoshimaliwa sheemiliyona N$60.

Epangelo otaku tiwa vati ola lundulula oshimaliwa osho kwateelelwa omunhu oo ta ka longa oilonga ei a kale e na, okwa li taku tiwa omunhu na kale e na oshimaliwa shi fike peemiliyona N$200 ashike paife oshimaliwa eshi osha ningwa eemiliyona N$500.

Ehangano e li tali ka findana po otendela ei olaa teelelika li kale li na oshimaliwa shi fike pomwaalu ou.

Ewapaleko lokapale, ola tengenekwa li ka pule oshimaliwa okudja peemiliyona N$500 fiyo opo800, oshinima eshi osha eta omalipulo ahapu, mwa kwatelwa nomanyenyeto okudja komupedu pelesidente Netumbo Nandi-Ndaitwah.

Nandi-Ndaitwah okwa li a yandja oushima kominista yomaudano Agnes Tjongarero exuliloshivike e li la landulwa kwaa li la dja ko eshi ehe na eshi a ninga po natango kombinga yokuwapaleka okapale fiyo okeluwa eli.

Edopo lokuyambula po okapale koIndependence ola fininika oshipaana yopashiwana yetanga lokeemadi opo i danene pondje yoshilongo omaudano ayo opashiwana oule weedula nhee.

Minister okwa li a ninga eshiivifo loilonga yokapale aka muSeptemba momudo 2023.

Otendela ei oya nana omahangano ahapu kwa li ashike oilonga okwa li ya iwa moshipala.

Otendela okwa li ya shiivufululwa oshikando oshitivali muJuli odula ei, naasho kwa li tashi pulwa okwa li nee sha lundululwa okudja poshimaliwa shi fike peemiliyona N$200 fiyo opeemiliyona N$500. Omahangano amwe otaa ti oshinima eshi oshiholelwa nghee oministili ya kelela omahangano ahapu omoshilongo oha kufe ombinga moilonga ei.

Oministili otai kwatelwa komesho komukulunhuwiliki Erastus Haitangela.

“Omulandu ou wa ningilwa ashike okukufa po omafiyafano nokukelela omahangano omoshilongo a kufe ombinga,” Omuningi weindilo motendela omu osho a lombwela oThe Namibian ngaho.

OKUHOOLOLA MO
Omikanda odo da monika koThe Namibian oda ulika kutya ehangano ledina Marley Tjitjo Architects Inc, olo kwa li li na oshinakuwanifa shokutunga etungo lakula loHome Affairs mOvenduka longushu yoshimaliwa shi fike pobiliyona imwe, oli li limwe lomomahangano avali oo a hoololwa mo a longe oilonga ei.

Ehangano likwao olo la hoololwa mo olo hali ifanwa Kerry McNamara Architects, olo hali longele kumwe nomunangeshefa Toivo Nuugulu.

Tjongarero Etine okwa ti kakwa li e na ouyelele kombinga yoinima oyo ya kundukida otendela oyo.

“Opo ashike nda fiki okudja kokapale keedila. Okwa li nda ya koudano woParalympics koFrance. Omunhu ou ta dulu okukala e shi shi omukulunhuwiliki. Opo ashike ndi udite oinima aishe oyo ya ningwa po,”
“Dengele nge mongula ngee inomu mona shaashi opo handi lilongekida manga,” Osho a ti ngaho.

Ashike nande ongaho, Haitangela kakwa li nande a nyamukula omapulo oo kwa li a tuminwa Etine loshivike sha dja ko. Ashike omapulo okwa li a leshwa ndee inaa nyamukulwa.

Nandi-Ndaitwah okwa li a yandja oushima kuTjongarero Etitano linya la landulwa kwaali la dja ko eshi oministili yaye ya dopa okutameka noilonga yokuwapaleka okapale koIndependence Stadium. Omupedu pelesidente okwa ti Tjongarero okwa li a popya momushangwa kutya oilonga yokuwapaleka otai tameke momafiku 28 Auguste neuliko lomukwati wotendela, ashike vati okwa dopa okuwanifa po eudaneko laye eli.

“Onda udifwa nai kuminista. Paife ngaha, otu na ovanhu vetu vomaudano hava ka danena pondje yoshilongo, shaashi katu na okapale moshilongo.

“Ova lombwela nge kutya otava tameke noilongo yokuwapaleka momafiku 08 Auguste, ndee eshi nda pula kutya oilonga oya ya fiyo openi, kakwa li pu na eshi shi li po,” Osho a ti ngaho.

Haitangela mOshoondaxa okwa ti oministili otai liufa kwaasho tashi pulwa kuNandi-Ndaitwah shokutameka oilonga yokuwapaleka okapale.

Okwa ti muJuni ovanhu vavali ovo kwa li va findana po otendela ova ka lundulula omilandu, osho sha eta omapuko mokukonga oinima oyo ya pumbiwa.