Omalelo eedoolopa okwa kunghililwa opoaha kwatele oinima yopolitika moilonga

Minista womayambulepo eedoolopa noitopolwa yokomikunda Erastus Uutoni okwa pula ovaleli vomalelo eedoolopa opo va tule omayooloko avo opapolitika pomunghulo moyoongalele ndee tava yakula oshiwana shavo.

Oshiima eshi Uutoni okwe shi pula Etitatu loshivike sha dja ko eshi kwa li ta yandje pambelewa omayakulo oipumbiwa ya yooloka kewilikongudu lodoolopa yaUtapi.

Omayakulo aa okwa kwatela mo omeva, omalambo onyata nolusheno, oo kwa li a yandjwa komalukanda e li atanho, Oukwa-Wananyanga, Okayekongwe, Okakwaka-Nakale, Nakayale Extnsion 2 noTobias Hainyeko ongushu yoshimaliwa shi fike peemiliyona N$11.

“Ohandi twikile okupula ookamusela vomalelo eedoolopa opo mu kufe omambale eni opolitika pomivelo dokamusela ndee tamu tula penya omayooloko eni opapolitika ngee mu li moyoongalele molwouwa woshiwana,” Uutoni osho a ti ngaho.

Okwa ti oo ashike omukalo tau dulu okuvatela omayakulo oshiwan a ye komesho.

“Onghee nee, natu, twikileni okuninga keshe shimwe osho hatu dulu okuninga tu longe oilonga yetu ngaashi oshiwana sha teelela ndee hatu kwashilipaleke eenghundafana dopayukililo noshiwana moikumungu i na sha neyambulepo leliko loshilongo,” Osho a ti ngaho.

Uutoni natango okwa holola ehandulaye kombinga yookamusela vamwe ovo ta ti otava dopa okulandula omilandu odo ve lihonga petameko loilonga yavo.

Okwa ti ookamusela vamwe ova dimbwa omadeulo avo oo va mona petameko loinga yavo nohava monika tava ningi omahololo madilaadilo pamwe noshiwana shi na sha nomayakulo opamufika, ponhele yokulonga mo oikumungu ei meedoolopa davo ndee tava yakula ovanhu ovo ve va hoolola.

“Olyelye mwa teelela a kandule po omaupyakadi oo e li meedoolopa deni ngee onye tamu eta omaupyakadi? Havo aveke ashike, ohandi lombwele ashike keshe umwe. Ovo kwa li nda pa ouyelele kombinga yoilonga, otava danauka nokwiididimika kwange,” Osho a ti ngaho.

Okwa weda po: “Paife otava ifana nge ndi uye ndi lidope mo. Ndi li dope mo ngahelipi? Omwa hoololwa mu kandule po omaupyakadi oshiwana, paife omwa hala Uutoni e uye ndee ta kandula po oupyakadi weni? Etumwalaka lange la yuka kuvo ole li kutya elididimiko lange otali ningi lishona.”