Omufekelwa gwepititho lyo-cocaine a tindilwa oboloha

Omunamibia ngoka ta fekelwa okupititha iingangamithi moSouth Africa, Pauline Mbangula, ota ningilwa omakonakono gokuya pambambo omilandu dhoveta yomatembu.

Mbangula okwa holoka mOmpangu yaMangestrata gwaKempton Park mOkapa, mEtitatu.

Epangelo olya tindi oku mu pa ompito yokwiifutilamo mondjeedhililo.

Pauyelele wonzonkundaneki yaSouth Africa yo-ENCA, Mbangula, ngoka a holoka mompangu keena omukalelipo gwopaveta, okwi indile opo kaathaanekwe molwashoka okuna uumbanda kombinga yegameno lye.

Okwa taalela iipotha yi na sha nokukala niingangamithi osho wo okupititha iingangamithi.

Opolisi yaSouth Africa oya popi kutya otashi vulika a kale a taalela iipotha yilwe ya gwedhwa po.

Pauyelele woENCA, omufekelwa ngoka okwa li niingangamithi yongushu yoo-N$800 000. Omukiintu ngoka gwomimvo 30 okwa tulwa miipandeko pokapale koondhila kopaigwana kaOR Tambo International Airport moJohannesburg mOsoondaha konima sho opolisi yaSouth Africa ya yakelwa ko kutya okwa humbanda iingangamithi yococaine mbyoka kwa li a holeka mepunda.

Okwa konakonwa komathano gokuminikila nokwa monika kutya okuna shili iingangamithi mepunda lye yoopela dhuusila wococaine dhi li 68.

Omupopiliko gwopolisi yaSouth Africa, Athlenda Mathe okwa lombwele onzonkundaneki ndjika mOmaandaha kutya omakonakono gopaunamiti oga koleke kutya iingangamithi ayihe mbyoka Mbangula kwa li a humbata oya kuthwa mo.

“Otaku tengenekwa dhi na ondjundo yoohalama 850,” osho a popi ngaaka.

Mathe okwa popi kutya omufekelwa ngoka okwa taalela iipotha yi na sha nokulonga osho wo okukala niingangamithi, notashi vulika iipotha yilwe tayi ka gwedhwa ko natango.

Mathe okwa popi kutya omukiintu ngoka gwomuNamibia, omutimulongo maafekelwa mboka ya kwatelwa pokapale koondhila moJohannesburg lwiikando ya yooloka muule owala woomwedhi mbali, taya kambadhala okupititha iingangamithi.

Okwa popi kutya omufekelwa ngoka omuNamibia a kwatwa mOsoondaha okwa li ta zi koBrazil.

Oongundu dhimwe dhopapolitika odha popi kutya onkalo yi li pombanda yaagundjuka mboka kaaye na iilonga oyo tayi etitha ya longe iimbuluma mwa kwatelwa okupititha iingangamithi.