Omukulukadhi a mwenene ekwatonkonga lyomwana

… opolisi yi indile aavali ye shi tye ko omolwonkalonawa yaanona

Omulonisikola moshitopolwa shaHangwena okwa li monkumwe sho a dhimbulula kutya gumwe gwomaalongwa ye okwa li a kwatwonkonga, ashike yina [yanakuninga oshihakanwa] ina lopota oshiningwanima shoka kopolisi.

Otaku hokololwa kutya peha lyaashoka, yina yakakadhona ngoka gwomimvo 10, okwa lombwele owala omwana opo i itule omongwa mpoka e ehamekwa.

Omulongi okwa hokolola kutya okwa li a dhimbulula epuko omolwezimba kwa li tali gunduka pokanona hoka omanga ye li mongulusikola.

Konima yomakonakono, kakadhona ngoka okwe mu lombwele kutya okwe ehamekwa kuukiintu we sho a zala ombulukweya yolyiina ya ponda.

Lwanima okwa popi oshili kutya okwa kwatwonkonga pamwe namukwawo gwomimvo hamano maandjawo, moshitopolwa shaHangwena.

Komanda ta kwathele gwoshitopolwa shaHangwena, Bennet Muyambango okwa popi kutya oshipotha shekwatonkonga inashi patululwa natango, ashike oshimpungu shEgameno lya pamba Uukwashikekookantu otashi ka shilipaleka kutya oshipotha osha patululwa.

Nakuninga oshihakanwa otaku hokololwa a lombwele omulongi gwe kutya okwa tseyithila yina kombinga yoshiningwanima shoka, ashike yina okwe mu lombwele owala i itule omongwa mpoka e ehamekwa.

“Sho osikola ya piti mo mEtitatu [lyoshiwike sha zi ko], ondi ithana kakadhona ngoka molwashoka okwa li nda dhimbulula kutya ita ende nawa naanasikola pamwe okwa li taye mu sheke, kutya ota zi ezimba,”

osho omulongi a hokolola ngaaka.

“Onde mu fala komulongi gwoshilongwa shiipambele yontseyo kombinga yonkalamwenyo ngoka a lombwele omulongwa ngoka e etelele meme gwe esiku lya landula,” osho a popi ngaaka.

Yina yanakuninga oshihakanwa otaku hokololwa naye a lombwele omulongi kutya iilalo yokanona oye etwa kokuzala oolyiina dha ponda.

“Otwe mu pula natango ngele okanona okwe ka fala ngaa koshipangelo ka ka mone epango nokwa yamukula kutya okwe shi ninga. Otwe mu pula e tu pe uumbangi mokakalata koshipangelo kokanona ashike ineshi ninga,” osho omulongi a hokolola ngaaka.

Osikola oya lombwele omukulukadhi ngoka a fale omwana kokapangelo kopopepi momukunda. Lwanima kakadhona ngoka okwa tuminwa koshipangelo shEenhana, hoka e li natango ta mono uuhaku.

Muyambango okwa popi kutya iiningwanima yomakwatonkonga oyi igalala moshitopolwa shawo, ashike olundji aavali ohaye yi mwenene peha lyoku yi lopota.

“Otashi uvitha nayi okutala aavali taya etha aanona yawo ye ehamekwe nokupiyaganekwa pamadhiladhilo okupitila momakwatonkonga, peha lyoku ya gamena. Otwa kala niiningwanima yaanona taya kwatwonkonga koohe ashike oohe onkene ye li nayo natango taye ya monitha iihuna.

Ashike nooyina yaanona mboka oya mwena owala. Aavali oya pumbwa okukutha ko oongaku omolwonkalonawa yaanona yawo,” osho a popi ngaaka.

Muyambango okwa popi kutya moshiningwanima shoka shokanona kadhimbululwa posikola, opolisi opo tayi ningi oonkambadhala dhokutula miipandeko omufekelwa. Kakadhona ngoka okwa popi kutya omulumentu ngoka ke mu shi.

“Pauyelele mboka twa yakula, kakadhona okwa popi kutya okwa kwatwa onkonga kaantu yaali keeyashi sha ningilwa mepya. Otwi ipyakidhila nomakonakono ngashingeyi,” osho a popi ngaaka.

Omunawino gwiipambele yopamadhiladhilo Shaun Whittaker okwa popi kutya olundji aakwatinkonga ohaya ningile omatilitho oonakuninga iihakanwa opo kaaya popye sha.

Onkene oonakuninga iihakanwa ohaya vulu okukala ye wete kutya ekwatonkonga oshinima inaashi puka.

“Aakuluntu oya pumbwa okukutha ko oongaku uuna aanona yawo ye ya lopotele kutya oya kwatwonkonga.

Otwa ndhindhilike onkalo yoku shi mwenena. Aavali olundji ohaya kala ya tila oku shi popya, nohaya kala nomaipulo gaashoka aantu taya ka popya uuna ye shi uvu. Omathimbo gamwe oonakukwatonkonga ohaya gandja iimaliwa opo ya mweneke oshiningwanima shoka,” osho Whittaker a popi ngaaka.
“Aavali naalongi: ngele omwa dhimbulula omainyengo taga limbilike mokanona, ngaashi
omayambandjodhi, okusitamena, okumbandama, okulilagana, uuwehame mepunda, okweehama kiilyo yopaumwene, nena iinima mbyoka nayi taliwe ko ongiinima iinene.

Ngele okanona oka lundulula omaihumbato gako nokukala ka tila uuna keli montaneho yomuntu gwontumba, nena aavali naya kale ye wete kutya opu na sha. Otu na oku shi uva ko kutya oyendji yomaalongi yuushadha mboka ihaya kala yokokule. Ohaya vulu okukala aakwanezimo nenge ookuume, aantu mboka ya thika po lela pokanona.”