Ovanamibia otava ka kala nokufuta oshimaliwa shi li pokati koN$2,50 fiyo opoN$3 mondjele imwe yolusheno okudja muJuli, konima eshi ewilikongudu lolusheno ledina Electricity Control Board (ECB) la koleka ewedelo lolusheno neepelesenda 8 moshimaliwa shokomudo 2024/25 Etine loshivike sha dja ko.
Paife, eedola efela ohandi lande eendjele dolusheno di fike po40,2 dolusheno, ashike ewedelo olo la kolekwa otali ka eta opo Ovanamibia va kale tava lande eendjele 40 moshiwaliwa omo, omanga omaumbo oo a hepa haalande olusheno loN$50 taa ka mona ashike eendjele dolusheno di li koshi yo20.
Ewilikongudu loikwanghono ola ti oshinima eshi osha ningwa opo omahangano oo haa andjakaneke olusheno aha kanife oimaliwa.
Eendado dehangano ledina Cenored otadi i pombada neepelesenda 6, omanga doCenored Okahandja otadi i pombada neepelesenda 6,2 noCenored Omaheke tadi i pombada nopelesenda imwe oshinghwanyu nhano.
Erongo RED okwa li la pula opo eendado dalo di wedelwe neepelesenda 7,3 ashike okwa li ashike da wedelwa neepelesenda 6,6.
DoKeetmanshop Electricity Business Unit oda wedelwa neepelesenda 6,4, omanga Oshakati Premier Electricity ya pewa eepelesnda 6.
Elelodoolopa laRehoboth okwa li la pula li pewe ewedelo neepesenda 8,9 ashike okwa li ashike la pewa eepelesenda 6,4. Eedoolopa
dokoshitopolwahoololo shErongo natango otadi twikile nokukala di na olusheno li na ondilo.
Eendado edi dipe otadi ka ya moilonga okutameka mefiku lotete laJuli.
Ehangano olo hali andjakaneke olusheno koonooli yoshilongo ledina Northern Electricity Distributor (Nored) nelelodoolopa lodoolopa yaVenduka navo okwa li va ninga omaindilo, ashike, omahangano aeshe aa okwa pumbwa okuwanifa po oipumbiwa yonumba omanga eendado dao inadi pitifwa.
Omukulunhuwiliki woinima ya pamba omilandu moECB Petrus Johannes okwa ti Nored na yandje omikanda dopaife doshimaliwa omanga elelo lodoolopa yaVenduka la pulwa opo li yandje olopota nghee oshikondo shavo sholusheno hashi longo.
“Omahangano aeshe olusheno naa ninge omaindilo eendado dao konima ondado yaNamPower yokulanda olusheno lihapu ya shiivifwa. Ngee inave shi ninga, otashi dulika va ka kanife oshimaliwa shaashi otava ka kala tava landifa olusheno kondado ikulu omanga tave li lande keendado dipe,” Johannes osho a ti ngaho.
Okwa ti vali, okukwatela mo ovanhu ovo hava longo olusheno, omahango oo haa andjakaneke olusheno moshilongo okwa li a ninga oyoongalele meedoolopa da yooloka moshilongo okudja momafiku 21 Mei fiyo omafiku 07 Juni.
Okwa kwashilipaleka kutya okwa li kwa longifwa omadilaadilo ovalongifi volusheno kombinga yokukala tava mono olusheno noupu nokombilixa omanga kwa li inaku ningwa etokolo laxuuninwa.
Johannes okwa ti ewilikongudu lokwaandjakaneka olusheno moshilongo ola tokola kutya omalelo eedoolopa inaa dima oukefa vomalusheno opo va dule okwoongela eengunga doinima imwe ngaashi omeva.
“Nava mone va li omikalo dimwe dokwoongela eengunga odo di li paveta,” Osho a ti ngaho.
OPU NA OUPYAKADI
Omunawino moinima ya pamba omaxupilo Omu Kakujaha-Matundu okwa ti ovalongifi volusheno ova taalela efimbo lidjuu shaashi otava dengwa nale konghalo nokeendjambi inadi wana.
“Ovalongifi novanangeshefa otava mono oixuna aveshe. Eengeshefa ohadi kala moudjuu, tashi duli olo etomeno eshi ihadi kutu ovanhu vahapu, ile di wedele eendjabi. Ovalandi ovo eendjambi davo da kala efimbo lile inadi wedelwa ove udite lela oupyu weendado tadi i pombada,” Osho a ti ngaho.
Okwa ti NamPower na endelelife omikalo dokuyandja olusheno li na ombilixa.
“Ngee otwa twikile nomukalondjiikilile ou wokuwedela eendado, ovalandi otava ka kala vehe na vali nghee, ndee tava ningi osho sha ningwa kOvakenya,” Kakujaha osho a ti ngaho.
OTASHI ETA OUDJUU
Omunawino moinima ya pamba omaxupilo Josef Sheehama okwa ti ewedelo eli otali eta oudjuu.
“Ewedelo eli lolushelo oudjuu wongaho noli na okudenga oohandimwe neengeshefa shaashi eendado doipumbiwa nomayakulo otadi i pombada neenghono,” Osho a ti ngaho.
Sheehama okwa ti okuyapombada kwondado yolusheno otaku fininike eengeshefa opo di talulule ovanailonga vado notashi piyaaneke ewedelo leendjabi osho tashi dulika shi kume elinyengo loshimaliwa mongeshefa.
“Etokolo eli otashi dulika li ete ekanifo loilonga noli na omawii ahapu keliko laNamibia alishe,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
