Ongudu yoLPM itai popile osho sha ningwa koUnam

Omuleli wovanyasha vongudu yoLandless People’s Movement (LPM) okwa ti ongudu yavo oyovakwaita tai kondjele ouyuki.

Eshi oshe ya konima oilyo yongudu kwa li ya pata omivelo doshiputudilo shopombada shedina University of Namibia konima eshi oSwapo kwa li ya ongala moshiputudilo nande omangudumano opolitika okwa li a indikwa pakafimbo moshiputudilo omo.

Ongudu yovanyasha okwa li ya yandja ouyelele koifokundaneki onguloshi yOmaandaxa konima oshilyo shongudu yoLPM Michael Amushelelo kwa li sha efwa kopolifi komina eshi kwa li sha mangwa po.

Okwa li a mangwa po Omaandaxa omutenya shaashi vati a ningila otuwa yomulihongi omahepeko.

“Itatu pitike ouvaya, okuhena owino nomukalondjiikilile vomahepeko wovanambelewa vokukalekapo elandulafano vaUnam – ovanhu ovo ve li momidjalo doilonga itava dulu okulongifa omakanya avo nove li neekela ashike meengonyo,” Ongudu osho ya ti ngaho.

Ovaanya enyamukulo laUnam kombinga yokukelela ovanhu va pite pomivelo, osho vati kwa li sha eta Amushelelo opo a undulwe.

Ova ti ovanambelewa vokukaleka po elandulafano vaUnam “eembwa dokuponokela depangelo loSwapo”.

Ongudu yovanyasha yoLPM okwa li ya waiminwa koshitaashi shopolifi kevava lovanyasha longudu yoPopular Democratic Movement.

Omukulunhu wopolifi moshitopolwahoololo shaKhomas Wilhem Steenkamp okwa li a koleka ekwatepo laAmushelelo Omaandaxa.

Omupopiliko waUnam Simon Namesho Omaandax okwa ti omulandu oo tau kelele ovalihongi va kufe ombinga moinima yopolitika moshiputudilo natango oo tau longifwa, nande nee okwa li kwa ningwa engudumano lopapolitika loSwapo oshivike sha dja ko.

Okwa ti oshiputudilo otashi ningi omakonakono oshiningwanima osho.

Opo ku monike oshilanduli shovalihongi ovo kwa li va kufa ombinga moshinima eshi, oshiputudilo otashi ka longifa omulandu oo womaliumbato oo a pitikwa nosho yo keshe tuu omulandu wa pamba oinima yoludi eli, Namesho osho a ti ngaho.

Kamusela woLPM Ivan Skrywer Omaandaxa okwa li a pula kutya omolwashike Unam ta yandje eetundi kombinga yopolitika, ashike ina hala ovanhu va ninge opolitika.

Skrywer okwa ti ongudu yovanyasha yoLPM oya nyolifwa moUnam noi li ongudu yovalihongi hai futwa.

“Ovo tava longekida oshinima eshi, ovo kwa li va yandja ouyelele oshivike sha dja ko kombinga yoshinima eshi,” Kamusela osho a ti ngaho.

Omukalelipo wewiliko lovalihongi vaUnam pelesidente Twapewa-Ashihe Mungoba Omaandaxa kwa ti otashi udifa nai eshi ovalihongi, unene ngaa eengudu dopolitika moshiputudilo, ve udite va tongolwa koshiputudilo.
“Hasho shi li ngaho.

Sho osho hatu kendabala neenghono adishe opo tu yeleke nawa oshinima eshi ndee hatu kendabala tu kwashilipaleke kutya ovalihongi aveshe ove udte va kwatelwa mo moshiputudilo kutya nee ove likombinga ilipipo,” Osho a ti ngaho.

Konima yoshoongalele shoSwapo Etitano, okwa li kwa ningwa oshoongalele newiliko laUnam.

“Opo ashike ku kwashilipalekwe kutya eembinga adishe novanhu aveshe otava dulu okuuya pamwe, tava kundafana ndee tava hange eudafano limwe,” Osho a ti ngaho. Ongudu yovalihongi vongudu yoAffirmative Repositioning nayo oya yandja omanyenyeto ayo kombinga yoikumungu yoSwapo moshiputudilo.