Ongudu yoNEFF oya kala nokutuhenuka – ECN

… Amushelelo okwa ti ongudu oya dopa okukalela po oimaliwa yoshiwana

Okakpmisi komahoololo kaNamibia oka ti okakala nokupula ongudu yoNamibia Economic Freedom Fighters (NEFF) opo i yandje oimikanda nghee ya kala nokulongifa oshimaliwa okudja ngaa omudo 2021.

Ongudu yoNEFF okwa li ya kufwa mo meengudu dopolotika kokakomisi komahoololo molweeshi inai ongela omikanda dayo odo tadi ulike nghee ya kala tai longifa oshimaliwa ngaashi oveta tai pula.

Omunambelewa wopaveta akula wokakomisi komaahoololo Alfeus Haufiku Etivali okwa lombwela oDesert Radio kutya okwa li va tameka okupula omikanda edi doshimaliwa koNEFF momudo 2021, nova kala ve na eenghundafana oikando ihapu nongudu okudja opo.

Omupedu wiliki wongudu yoNEFF Longinus Iipumbu, nande ongaho, okwa dama kutya ongudu oi na okulwifa etokolo lokakomisi komahoololo olo.

Haufiku Etivali okwa ti okakomisi komahoololo okwa li ka pa oNEFF efiku laxuuninwa momudo 2022, kwa li ngeno muMarsa wodula oyo.

“Okwa li tava nyenyeta kutya itava dulu okushininga mefiku laxuuninwa olo va pewa shaashi okwa li va pumbwa ouyelele uhapu, shaashi vati ei omhango ipe naikwao ihapu. Otwa ti oshi li nawa, natu ningeni oshoongalele,” Osho a ti ngaho.

Pefimbo loshoongalele eshi, Haufiku okwa ti, oECN okwa li ya fatululila eengudu edi da li di na omapulo oveta ei.

“Ndee efiku laxuuninwa tali undulilwa komesho opo va dule okwoongela omikanda davo doshimaliwa okudja ngaa momudo 2020 fiyo o2022.

Ashike natango vamwe ovo ashike va ongela vamwe inava ongela,” Osho a ti ngaho.

Okakomisi komahoololo oka ti opo ka dule okuvatela vali okwa li ka ninga oshoongaleleilonga muSeptemba 2022.

“Otwa tokola kutya otu na okulongifa okatendo oka152, oko taka popile okukufa mo ongudu oyo itai liufa komalombwelo meengudu dopolotika,” Haufiku osho a ti ngaho.

Onghatu ya shikula ko okwa li okupopya oshipala noshipala neengudu odo da pumbiwa, osho a ti.

“Okwa li twa hala okuuda kutya oupyakadi woye owa shike naana . . . Eshi okwa li nee muJuni 2023,” Haufiku osho a ti ngaho.

Ashike konima yaasho, oECN kakwa li ya mona enyamukulo, osho a ti ngaho.

“Okudja muJuni, natango kakwa li twa uda sha okudja kongudu yopolotika. Onda kala handi va dengela ame mwene . . . aaye, ohatu ya, aaye, ohatu ningi oshinima shimwe, aye . . .

“Osho osha eta opo okakomisi ka yandje omukanda momafiku 25 Apilili, oo wa yandja omafiku 14 keengudu edi mbali dopolotika opo di yandje omikanda odo kwa li inadi yandjwa okudja momudo 2020 fiyo 2023,” Osho a ti ngaho.

Momukanda oo wa leshwa koThe Namibia, oECN oya mona omikanda doshimaliwa doNEFF domudo 2020/21 no2021/22 momafiku 04 Juni.
Omikanda edi inadi yandjwa okwa li domudo 2022/2023 no2023/2024.

Ongudu yoNEFF oya ti okukufwa mo kwa yo meengudu dopolotika kaku li pauyuki, shaashi ECN inai liufa kewedelo olo la pewa ongudu opo i dule okwoongela omikanda dayo.

Omupedu wiliki wongudu Longinus Iipumbu Etivali okwa ti: “Otwa itavela kutya keshe Omunamibia okwa mona nghee oNEFF tai liumbatelwa. Otwa yuka komhangu shaashi etokolo loECN kali li paudemokoli nopamilandu doshilongo eshi.”

Konima yoshinima eshi, komufala, Michael Amushelelo, okwa fiya po ongudu.

A FIYA PO ONGUDU

“Kombinga yefiyepo longudu laAmushelelo: Inashi tu kumwifa nandenande, sho eshi itashi denge nande ongudu nai shaashi okwa li a waimina ongudu oyo a hanga nale i li ofika. Oufemba waye,” Iipumbu osho a ti ngaho.

Amushelelo Etivali okwa lombwela oDesert Radio kutya okwa li a uda nai neenghono eshi ongudu inai yandja omikanda doshimaliwa.

“Kashi djuu okumona omunhu a longe nokuwilika omambo oye. Opo tu kufwe mo meengudu dopolotika ngaho medina loshinima osho otwa dengwa ongonyo moshipala nai,” Osho a ti ngaho.

Amushelelo okwa ti osha nyika pange apa ongudu oyo ya hala okulela, ashike itai dulu okuliufa koveta.

Okwa ti efiyepo laye longudu okwa li la ningwa pamukalo.

Ashike okwa ti ina mona nande eumbo lopolotika natango.
EKALELEPO LOSHINIMA

Omundjadjukununi woikwapolotika Ndumba Kamwanyah oshivike sha dja ko okwa ti eengudu dopolotika odi na okukala tadi dulu okuholola nokukalela po nghee da longifa oshimaliwa shoshiwana.

“Ove na okushi kalela po osho. Ashike ngee oda dopa okushininga oshi na oilanduli,” Osho a ti ngaho.

Okwa pula vali ngee oshinima eshi eengudu dopolotika ohadi shi ningi ngaa alushe.

“Inandi mona ongudu yopolotika mopaliamente tai ongele omikanda dayo doshimaliwa, unene ngaa taku tiwa nadi nyanyangidwe moifokundaneki.

Mutu pamwe osha ningwa ngaa. Mutu inandi shi lesha,” Osho a ti ngaho.

Kamwanyah okwa ti oshinima eshi otashi ulike nghee eengudu tadi ka ungaunga noinima yepangelo.

“Kashi shi nande eenghundana diwa kutya eshi ku na ashike eemwedi dishona tu ye komahoololo oupelesidente nomutumba wopashiwana ove lihanga ve li moupyakadi u li ngaha. Ou na okulonga nawa ngee to kendabala okukufa ko epangelo koshipundi,” Osho a ti ngaho.