Ongudu yoNamibian Economic Freedom Fighters (NEFF) otai pula ngee omuprima minista Saara Kuugongelwa-Amadhila ota dulu ngaa okwiinekelwa nouyelele wepangelo ngee ota dulu “okuhekwa noupu ngaho”.Omupedu pelesidente wongudu Kalimbo Iipumbu okwa li a yandja oshinima eshi nomapulo akwao mopaliamente Etivali.
“Ohatu pula ngaha, shaashi owa yandja oshipatululo shoye kombudi oyo ihai tila ndee to kengelelwa. Paife otu na oumbada kutya oto dulu okuyandja ouyelele wepangelo, shaashi osha yela nawa kutya oumupu nokuhekwa, nomongodi ashike,” Osho a ti ngaho.
Oshivike sha dja ko oThe Namibian okwa li ya lopota kutya Kuugongelwa-Amadhila okwa kengelelwa oshimaliwa shi fike poN$159 000 kookalyamupombo omo kwa li mwa kwatelwa ombaanga yomonakadona.
Iipumbu Etivali okwa pula kutya omolwashike Kuugongelwa-Amadhila e na okutwikila nokukala melelo.
“Ove okwa li ominista yetu yoshimaliwa ndee paife ou li pomhito opo to dulu okuninga pelesidente waNamibia ngee opa holoka oshinima shonumba pupelesidente nomupedu pelesidente.
“Tu pa etomerno lakola kutya oshike u na okutwikila nokukala ponhele opo u li paife ngee kuudite efimano lokuholeka ouyelele oo wa tuvikilwa?” Osho a pula ngaho.
Iipumbu okwa lundila Kuugongelwa-Amadhila kutya ke shi okukwata ouyelele wopaumwene.
Omunawino meeveta di na sha noikwambaanga, Eben de Klerk, oshivike eshi okwa lombwela oDesert Radio kutya ovanamadina vahapu otava kengelelwa.
“Oshimbuluma shi nyanyaleka notwa etela onghenda omuprima minista nande haye auke a kengelelwa. Ovanamadina vahapu ova kala nokukengelelwa, ashike oshinima eshi oshuuditikiwe ko,” Osho a ti ngaho.
De Klerk okwa ti eembanga itadi pewa nande ombedi molwoimbuluma yoludi eli.
“Ombaanga kaya li mo nande mekengelelo eli yoo kai na nande eshi ya ninga sha puka noshimaliwa osho sha kana. Ombaanga ohai lombwele ovanhu alushe opo vaha yandje omauyelele avo opaumwene komunhu nande oumwe.
“Ookalyamupombo ohava yeke omunhu nawa, ohava kendabala okukupa ouyelele oo tau kwiitavelifa kutya otava popi oshili.
“Ngee tava denge ohava popi lela va fa va dja kombaanga, osho hashi shi ningi shidjuu opo ovanhu vaha mone kutya ookalyamupombo. Efimbo limwe ohava tumu outumwalaka nongodi yombaanga. Ovanhu vahapu ova kanifa oimaliwa yavo oyo kwa li va tuvikila molwomakengelelo,” Osho a ti ngaho.
Nande omupopiliko wopolifi yaNamibia omupedu komufa Kauna Shikwambi okwa koleka kutya oshibofa shomuprima minista otashi konaakonwa, okwa ti opu na oibofa ihapu yoludi eli tai konaakonwa.
Moibofa imwe ovafeekelwa ovamangwa po.
Okwa ti omakengelelo oshimaliwa unene ngaa okupitila komalungula okwa ya pombada neenghono.
“Ovanhu vahapu ova kanifa oimaliwa yavo oyo va longa noudiinini molwomakengelelo. Ohava longele kumwe unene nokulandula osho tava lombwelwa kookalyamupombo okupitila meengodi, ohava yandje omauyelele avo opaumwene noipatululo yeembanga davo,” Osho a ti ngaho.
Shikwambi okwa kunghilila Ovanamibia opo va kale va kotokela ookalyamupombo, ta ti oonakuningwa oihakanwa fimbo limwe ohava tumu oimaliwa yavo vehe na eshiivo, ile medina loumbada nengwangwano. “Ngee owa dengelwa komunhu uhe mu shi ta pula kombinga yoimaliwa nomauyelele oye ombaanga, ino pwilikina keengodi di li ngaho, nande otava ti nee owa findana, shaashi opo naana keshe shimwe hashi tamekele opo,” Osho a ti ngaho.
“Ngee owe va pwilikine ndee tava mono kutya owe litula mo, otave ku heke. Onghee nee, ino yandja ouyelele woye nande okomunhu ile u tume oshimaliwa komunhu uhe mu shi,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
