Oukadona ve li lwopo85 ova ya koshitufi shopamufyuululwakalo shOlufuko kOutapi opo va ka longekidilwe ondjila youmeme.
Oshitufi osha tamekele momafiku 21 Juni notashi twikile fiyo omefiku 01 Juli kendiki lOlufuko.
Oshinima eshi shOlufuko osha kala nale hashi ningwa komapupi nomapupi, tashi longekidile oukadona vashona okudja peedula 15 – 20 moumeme nomeehombo. Oidila yOlufuko ohai ningwa kovakulukadi vakula. Ashike nande oukadona ovo ve na okuya koshinima oku, oukadona ovo ve na omateelelo inava pitikwa nande opo va kufe ombinga moshitufi omu, nomukwateli komesho woshitufi eshi oha kwashilipaleke kutya oukadona ovo tava kufa ombinga mOlufuko inava ya nande nale moixulo.
Etitatu, omupopiliko wewilikongudu lodoolopa yaUtapi Joolokeni Haidula okwa ti oshinima eshi shokufukika oukadona osha nuninwa okukwatela po omufyuululwakalo, ngaashi sha kala hashi ningwa komapipi a dja ko.
Natango okwa ti oshinima eshi oshi li ongomukalo woukadona ve lihonge shiha pu kombinga yoinima oyo hai ningwa momifyuululwakalo davo.
“Odula ei, oshitufi osha nyolifa oukadona ve fike lwopo85 ovo tava ka kufa ombinga. Oshitufi osha tameka nawa lela, noilongadalwa ihapu tai ningwa,” Osho a ti ngaho. Haidula okwa pula ovanyasha noilyo yomomudingonoko opo va ye koshitufi ve ke lihonge osho hashi ningwa, vo ve ke lihonge yoo eenghedi nomaitavelo opa mufyuululwakalo.
Haidula okwa ti oukadona ovo tava kufa ombinga okwa li va hoololwa momalelo a yooloka opamufyuululwakalo konooli yoshilongo.
Oukadona, ve li novadali vavo, otava ka kala meumbo lOlufuko pefimbo loshitufi eshi. Omunhu ou ha longekida oukadona okwa ti, ovo tava ka kufa ombinga itashi ti otava ka hombolwa okudja opo, ashike otava ka pitikwa opo va shune kofikola va ka twikile elihongo lavo.
Ewilikongudu lodoolopa yaUtapi okwa li la tameka oshinima eshi momudo 2012, omo omukokoli pelesidente Sam Nujoma oye e li omuyambididi.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
