Ovafimanekwa inava yako kEtotha Carnival

Pelesidente Nangolo Mbumba nomupedu pelesidente Netumbo Nandi-Ndaitwah ova dopa okuya kepatululo loshivilo shedina Etotha Carnival, nande okwa li kwa longekindwa oinima ya pula oshimaliwa shihapu ye vanuninwa.

Oshivilo okwa li sha ningilwa kekango lomongwa ledina Kangonde Salt Pan mOshikoto, okwa li sha tameka Etine loshivike sha dja ko nosha xula onghela.Oshimaliwa eshi sha longifwa mokulongekida oshivilo eshi okwa tengenekwa kutya oshi li lwopeemiliyona N$4, eedjo osho da ti ngaho nande omwaalu ou kakwa li tau dulu okukolekwa, mwa kwatelwa oshimaliwa shi fike poN$60 000 shoipumbiwa yokuyambula po, mwa kwatelwa omidjalo dovanapolotika ngaashi Nangolo Mbumba naNandi-Ndaitwah novaholike vavo.

Opolohalama yoshivilo otai ti, Mbumba oye kwa li a teelelika a kale omupopi a fimana pepatululo loshivilo lopambelewa Etitano. Hamushanga Alfredo Hengari Oshoondaxa okwa koleka kutya Mbumba ina ya ko koshivilo oko shaashi okwa li e na oinima imwe ya fimana oyo kwa li e na okufila oshisho.

Nandi-Ndaitwah okwa ti okwa li e na okuya koshoongalele shimwe sha li koSwakopmund ponhele yapelesidente Mbumba.

Oshivilo eshi shoCarnival osha ningwa palongelokumwe lelelo lopamufyuululwakalo lOndonga newilikongudu lomapashiyono moNamibia ongovakufimbinga vakula mokuhoolola onhele opo sha ningilwa.

Pakuweda po, oshivilo osha ningwa nomayambidido ovakufimbinga vamwe vakula. Odjo imwe oyo kwa li ya ya koshivilo oku oya ti, onhele yovafimanekwa okwa li ya yela nande okwa li kwa longifwa shihapu okulongekida onhele oyo, mwa kwatelwa neetenda da kufwa koBotswana.

Omupopiliko woministili yomidingonoko, omakuti nomatalelepo Romeo Muyunda okwaanya omapopyo kutya ovafimanekwa kakwa li va ya koshivilo eshi. Okwa ti ovafimanekwa vahapu okwa li va holoka koshivilo nomafano oo e li komalungula okwa li a fanekwa pefimbo lokulilongekida manga ovaenda inava fika.

“Omapopyo keeshi oshili, eenhele dokunangala okwa li adishe diha di. Pelesidente ina ya ko shaashi okwa li e na oinima ikwao ya fimana oyo e na okufila oshisho.

Kapu na oshinima shipe opo, ohashi ningwa noshito.,” Muyunda osho a ti ngaho. Muyunda natango okwa ti omapopyo kutya oimaliwa yovafuti voishoshela okwa li ya hepekwa moshivilo eshi kae shi oshili. “Eshi tu shi kapu na oshimaliwa sha hepekwa koshivilo eshi. Oipupulu ei otai andjakanekwa kovanhu ovo ve li ominge noshivilo eshi.”

Muyunda okwa ti oministili otai ka yandja kutya oya longifa shi fike peni konima yoshivilo sha pwa onghela nolopota ya xuuninwa ngee ya ningwa.

Oshivilo eshi sha longekidwa koministili yomidingonoko pamwe newilikongudu lomapashiyono moNamibia nelelo lopamufyuululwakalo laNdonga osha kala nokushekwa neenghono, nokuli opu na ovakulunhu vamwe mewiliko lehangano li na sha nomapashiyono moNamibia tava ti okuhepeka ashike oimaliwa.

Oshivike sha dja ko, omupopiliko wehangano loNTB Flora Quest okwa li a koleka kutya ehangano ola yambidida pelesidente novaenda va fimana, ta ti kashi shi oshinima shipe ngee ovaleli tava pewa omaano.

“Kashi shi oshinima shipe ngee omaano taa pewa ovaleli. NTB oku li oshitai sheengeshefa depangelo nokwa kala nokuyandja omaano monakudiwa,” Quest osho a ti ngaho oshivike sha dja ko.

Quest Oshoondaxa okwa ti omapulo naa yukifwe koministili.

Natango, minista womatalelepo Pohamba Shifeta okwa ti oshivilo eshi okwa li ashike ondjodi yongaho eshi kwa li va ya ko koshivilo shedina Makgadikgadi Epic momudo 2020 koBotswana.

“Tete eshi twa tameka ondjila yoshivilo eshi shEtotha Carnival, kakwa li shipu. Ondjila okwa li i yadi omainda, omalipulo nomashunomonima, okwa li pu na omafimbo amwe opo kwa li ondjodi ei tai monika ya fa itai dulu okuningwa,” Shifeta osho a ti ngaho.

Okwa ti Etotha Carnival otali lalakanene okuyambula po onghalo yovanhu vomoshilongo pakuyambula po oinyangadalwa ya pamba eliko, eemhito deengeshefa naikwao ihapu.

Otashi lalakanene nokunghonopaleka onghalafano moNamibia, unene ngaa koitopolwa yokonooli yoshilongo naikwao.
Okwa li sha ningwa koshi yoshipalanyole, ‘Safeguarding the Jubilant Pans to Enhance the Tang for our Future Geration’.