Ovanafaalama ovo oimuna yavo ya eta oipongayomeendjila nava futifwe oN$100 000 – PMD

Omutotiveta wongudu yoPopular Democratic Movement (PDM) Nico Smit okwa ti ovanafaalama ovo oimuna yavo ya eta oiponga yomeendjila nava pewe ehandukilo lokufuta oshimaliwa shi fike poN$80 000 ile N$100 000.

Ehandukilo e li nali yandjwe kovanaafaalama ovo inava longa nawa eedalate davo opo va kelele oimuna iha ye mopate, Smit osho a ti ngaho.

Oshinima eshi Smit okwa li eshi popya pefimbo opo kwa li ta kufa ombinga konotwaveta yomeendjila mopaliamente oshivike shinya sha landulwa kwaashi sha dja ko.

Onotwaveta, oyo ya totwa kuminista woilonga noyeendifo John Mutorwa, otai lalakanene oumwene weendjila nosho yo oukwatya woumwene weendjila notai pula kutotwe eenghono domawiliko eendjila, mokati kaikwao.

“Okatukulwa 30(4) konotwaveta ota ka popi kombinga yodalate oyo mwene wofaalama yomangeshefelo e na okutula kofaalama yaye ngaashi tashi pulwa koRoad Authority,” Osho a ti ngaho.

Smit okwa denga omufindo kombinga yefimano lonotwaveta, ta ti Ovanamibia vahapu ova ka nifa eemwenyo davo molwoiponga yomeendjila oyo ya etwa koinamwenyo oyo hai kala mopate.

“Ovanafaalama nava kalele po oshinima eshi shoiponga yeetuwa ya etwa koimuna yavo. Onghee nee, ehandukilo loshimaliwa shi li pokati koN$80 000 N$N$100 000 nali kwatelwe mo monotwaveta omu.”

Smit okwa ti ovanafaalama vakula nava tule ko eedalate keembinga adishe dopate.

“Neendjila odo di li keenhele dokomikunda nadi tulwe eedalate. Omolwashike eemwenyo dovanhu da fimana ashike meefalama domangeshefelo, ashike kashi fi meefaalama dishona? Ngee eengobe domunafaalama oda hangika mondjila ndee taku ningwa oshiponga, nashi kale oveta i li po kutya mwene woimuna oyo na kalele po keshe oshinima sha nyanaunwa,” Smit osho a ti ngaho.

Smit okwa denga omufindo kutya ovanafaalama nava kwashilipaleke kutya eedalate davo oda kola nawa opo di kelele oinamwenyo yavo iha kale tai endaenda mopate.

Ta yambidida edilaadilo eli, omunapaliamente woPDM Elma Dienda okwa ti ovashingi voihauto itava kala ashike nokupewa ombedi yokulyata oimuna oyo i li mondjila oufiku shaashi oimuna okwa li ya pumbwa okukala i li koyuunda yayo, unene ngaa eengobe.

Dienda nosho yo oilyo imwe yongudu okwa li va ya moshiponga shohauto omwedi wa dja ko omanga kwa li ve li mondjila yavo va yuka koshitopolwahoololo shaZambezi koshoongalele shoPDM.

“Mwene weengobe ile oimuna oyo na kwashilipaleke kutya oimuna yavo itai endaenda mopate oufiku. Nava kwashipaleke kutya ove i tula koshuunda. Ombedi otai kala yomushingi wohauto ngahelipi ngee ou na oimuna tai endaenda mopate oufiku?” Dienda osho a pula ngaho.

ITA YAMBIDIDA

Omutotiveta woSwapo Eliphas Dingara okwa kondjifa edilaadilo laSmit, ta ti oshinakuwanifa shomushingi opo aha lyate oimuna.

“Poshiponga, omunhu ou e li po omushingi ashike. Mwene woimuna oku li keumbo. Paife, olyelye ta kelele oshinima eshi ngee keshi omushingi?”
“Omushingi oye na fute ongobe oyo a lyata. Inatu ningeni eeveta odo tadi twike ovanhu omikundu,” Dingara osho ati ngaho.

Okwa weda po vali kutya oimuna ihai ka konga okulyatwa keetuwa ndee omushingi ashike e na oshinakuwanifa shokukelela oshiponga.
“Omushingi na kalele po oshiponga ndee ta futu keshe osho tashi futwa.

Longifeni omadilaadilo eni. Eendjila detu odiwa muAfrica nodi na omadidiliko omeendjila e ku kunghilile kombinga yoimuna opo u shinge nawa, oshike u na okushingilila ngee opu na omadidiliko tee ku lombwele kutya ponhele opo opu na eengobe?”
“Liufa komadidiliko omopate ndee to fiki nawa. Ino lyata oimuna. Ohatu mane po eengobe dovanhu ndee hatu va ningi ovafyoona,” Osho a ti ngaho.

OMADILAADILO

Oshilyo shoSwapo Natangwe Iithete osha ti kutya ngee oshinamwenyo osha eta oshiponga, itashi longifwa ongombangi momhangu.

“Sho osho twa pumbwa okulomgifa omadilaadilo etu kutya omushingi moshinima omu oye ashike ta dulu okudilaadila. Inatu lombwela ovanhu vetu kutya nava ye mopate ndee tava tameke okulyata oimuna ngaashi va hala,” Ithete osho a ti ngaho.

Okwa popya kutya onapo ei ya ufwa mopate o120km/h noihauto oya pumbwa okukala i na oukolele.

“Ou shi shi ngahelipi kutya mutu omushingi okwa li e li mongodi ndee ta lyata oshimuna? Paife omunhu wovanhu mwene woshimuna oo e li kokulekule oye na kalele po oshinima eshi,” Ithete osho a ti ngaho.