Ehangano lepangele olo hali wilike omapashiyono moshilongo ledina Namibia Tourism Board of Namibia (NTB) ola teelela okulongifa oshimaliwa shi fike poN$60 000 mokulanda omindjalo dovanapolotika, ngashi pelesidente Nangolo Mbumba, omupedu pelesidente Netumbo Nandi-Ndaitwah novaholike vavo, opo va ye koshitufi osho tashi ka kala konooli yoshilongo.
Ovanhu vamwe ovo tava ka mona omauwa omindjalo omwa kwatelwa eeminista, ohamba yopamufyuululwakalo yAndonga, novakulukadi/ovashamane vavo. Okwa teelelike va ye koshitufi she dina Etotha Carnival mexuliloshivike eli twa taalela.
Ehangano eli okwa li la fininikwa opo li longife oshimaliwa shi fike pomiliyona oshinghwanyu mbali momutengenekwafaneko wokuninga omashiivifo oshitufi eshi.
Omikanda odo da monika koThe Namibian oda ulika kutya ondado yomindjalo kakwa li i li momutengenekwafaneko, noya ulika kutya opwa kala pu na ondunge yokuholeka oumbapila vomafutilo atya ngaha opo shiha monike pefimbo lomavalulo okomudo neudo.
Ouyelele ou owe ya konima ovakulunhuwiliki vehangano va nyenyeta kutya oshinima eshi otashi hepeke oimaliwa. Omupopiliko wehangano loNTB Flora Quest Etitatu okwa koleka kutya ehangano ola yambidida pelesidente novaenda va fimana, ta ti kutya kashi shi shipe okuyandja omaano kovaleli.
“Kashi shi oshinima shipe kutya ovaleli vetu otava pewa omaano,” Osho a ti ngaho.
“NTB ongevava leengeshefa depangelo okwa kala nokuyandja omaano kovatoolinghundana momalweendo oludi eli, nomomangeshefelo opaunyuni noitufi yomeendjila. Ehangano ola kala nokuyandja omaano oindjalomwa,” Quest osho a ti ngaho.
ONDJALA, OUDU WONDJALA
Oshinima eshi oshe ya pefimbo ombelewa yomuprima minista ya holola olopota yoshikukuta oyo tai ti etata lOvanamibia otali ka taalela omumbwe yoikulya okudja muJuli fiyo omuSeptemba odula ei. Natango, oshilongo osha lopota kutya ovanhu ve li 2000 ova kwatwa koudu wondjala.
Eenghundafana odo da li pokati kovanambelewa voNTB tadi pula opo oumbapila vomafutilo va kwatwe nawa, shaashi otashi ka eta omapulaapulo pefimbo lomavalulo okomudo okwa li da monika koThe Namibian.
Ewilikongudu lomatalelepo, oministili yomidingonoko, omifitu nomatalelepo, nelelo lopamufyuululwakalo lOndonga ovo oovene voshivilo. Qest okwa ti eyambidido eli ola kwatela mo eudafano pokati koNTB noministili yomidingonoko.
“Oshimaliwa eshi sha longifwa momashiivifo oshitufi eshi okwa li shi li koshi yomutengenekwafaneko oo kwa li wa nuninwa oshinima eshi, ashike kakwa li nande sha pitilila.
“Ethotha Carnival okwa li la tamekwa momudo 2023 kOndangwa. Onghee nee, ehangano loNTB ola tokola okukufa ombinga moshinima eshi shiwa. Osha longifwa ashike osho sha nuninwa, ndee keshe omapopyo taa popi oinima ya yooloka otaa pukifa noka e li mondjila,” Osho a ti ngaho.
Quest okwa ti omutengenekwafaneko otau wilikwa nawa opo kukwashilipalekwe kutya owa longifwa osho wa nuninwa. “Otu udite ko omalimbililo kombinga yoshinima eshi, ashike otwa hala okuyelifa kutya omutengenekwafaneko wetu otau kwatwa noukeka opo tu kwashilipaleke kutya owa longifwa momukalo uwa,” Osho a ti ngaho.
Quest okwa ti oshimaliwa shoinima ei osha dja momutengenekwafaneko woNTB oo u li po nale, oo kwa li wa wedelwa opo u dule okukwatela mo oinima ei ya fimana.“Ngaashi shito, otwe litula mo natango opo tu longife nawa eedjo detu odo da ngabekwa notu na okutwikila nokufimaneka omikalo diwa dokulongifa oshimaliwa shetu opo di yambule po oshikondo shomatalelepo.
“Pefimbo longhalo yomumbwe yoshimaliwa yopaife, ehangano loNTB ole li tula mo mokulongifa osho li na po,” Osho a ti ngaho.
“Omanga twa itave kutya omikalo diwa doukumwe nokulongifa oshimaliwa otadi dulu okuyambula po eliko, otwe litula mo mokukwashilipaleka kutya keshe oshimaliwa sha longifwa osha longifwa nawa nosha longifwa moinima ya yuka oyo hatu lalakanene,” Osho a ti ngaho.
Omupopiliko wapelesidente Alfredo Hengari, eshi kwa li a pulwa kombinga yomidjalo dokoshitufi eshi shEthotha Carnival okwa ti ombelewa yapelesidente kai na eshiivo kombinga yoshinima shi li ngaho.
“Onda hala okukulombwela kutya ombelewa yapelesidente kai na eshiivo lomidjalo da longekidilwa pelesidente ile omupedu pelesidente,” Osho a ti ngaho.
Natango omupopiliko welelo lOndonga Frans Enkali eshi a popya ponhele yohamba yaNdonga okwa ti inau da nande oshinima shi li ngaho. “Kakwa li nande nda lombwelwa kombinga yeyambidido lomudjalo, nonghee nee itandi popi nande okombinga yoshinima dihe shi shi,” Osho a ti
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
