Omupedu hamushangandjai woSwapo Uahekua Herunga okwa shiva omupedu pelesidente mukulu wongudu yoLandless People’s Movement (LPM) Henny Seibeb opo aa lukile kongudu tai pangele.
Metitano, Seibeb okwa li a tula okakalata kaye kakulu koukwashilyo woSwapo komalungula, momukalo wokudimbuluka efimbo kwa li e li oshilyo shongudu.
“Habana … Mboli inandi ekelashi okakalata kange koukwashilyo woSwapo oko kwa li ka shainwa komupedu hamushangadjai mukulu Nangolo Mbumba momudo 2009. Etse nokopi yange yongudu yovanyasha voSwapo yomudo 2001 oyo kwa li ya shainwa kuElijah Ngurare,” Seibeb osho a shanga ngaho.
Ashike nande ongaho Seibeb okwa lombwela oThe Namibian Oshoondaxa kutya ita popi nande oinima yokomalungula.
“Omolwashike tamu dengele nge mu pule nge okakalata kakulu oko nda tula komalungula ange? Otamu shikula nge ile oshike? Owa hala nokushiiva oinima oyo i li koWhatsApp yange? “Ame kandi shi omuleli woshilongo. Kandi li nande omelelo lasha. Ame omukwashiwana ashike wongaho. Ame omukulupe,” Osho a ti ngaho.
Herunga okwa ti Seibeb ka li nande a tewaatwa koSwapo ashike okwa li ashike a xulifa po oilonga, osho she mu pitika opo a waimine ongudu natango keshe efimbo olo a hala. “Ovanhu ava va pumbwa okulikundwa ngee nava aluke ovo vo kwa li va tewaatewa. Ongudu oya pumbwa okukala omutumba ndee tai likundu ngee tava alukile mongudu,” Osho a ti ngaho.
Ashike Herunga okwa ti okakalata koukwashilyo kaSeibeb kakulu inaka pumbiwa pamhito ei.
“Osha nyika oshiponga okupopya oinima ina pwa okuningwa.
Pamhito ei, itandi dulu okupopya ngee opu na eenghundafana ile kapu na sha,” Herunga osho a ti ngaho.
Natango omupopiliko woSwapo Hilma Nicanor okwa ti Seibeb ota dulu okuninga eindilo keshe fimbo ndee ta waimine ongudu. “Okwa kala oshilyo shongudu fiyo omomudo 2017, ndee tai apa kwa li a ya.
Okwa tambulwa ko, ngee okuudite a hala okwaaluka, omunhu oto dulu kutya okwa li ashike va ninga epuko eshi va fiya po ongudu,” Osho a ti ngaho. Nicanor okwa ti keshe omunhu ta tu kumwe noilalakanenwa yongudu ota dulu okuwaimina ongudu keshe efimbo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
