Okandidate youpelesidente yoSwapo Netumbo Nandi-Ndaitwah okwa yandja omaudaneko e li pombada okutunga omaumbo e li 10 000 kodula nokutota eemhito doilonga di li 256 000 ngee ovahoololi ove mu pe omhito a ye keumbo lopashiwana.
Okwa li ta popi poshoongalele shoSwapo shokushiivifila ovanhu kutya ongudu ngee ya findana otai ka ningila oshiwana shike mOvenduka mexuliloshivike.
Ashike nande ongaho, ovanandjadjukununi ova ti omaudeneko oSwapo itaa shiva okuningwa, tava denge omufindo kutya oshinima eshi Swapo ina dula nokushininga moule weedula 34.
Nandi-Ndaitwah okwe lipaka mo mokunghopaleka oNational Housing Enteprise’s (NHE).
“… opo kuvatelwe ongudu yakula yoiyemo, mwa kwatelwa okuungaunga nomilandu dokuninga omaindilo odo tadi kwashilipaleke kutya omunhu okwa pumbwa okuvatelwa.”
Nandi-Ndaitwah okwa ti eenhele di li 10 000 otadi ka kala nokuwapalekwa keshe odula opo pa dule okutungwa omaumbo ovanhu ovo ve na oiyemo i li pedu noyopokati, eshi otashi ka ningwa okupitila mokunghonopeka opolohalama yoBuild Together nokuyambidida oShack Dwellers Federation of Namibia (SDFN).
Kombinga yomeva moshilongo, oSwapo oya ti ongudu otai ka longifa oNeckartal Dam”.
Oshikako oshitivali shopoloyeka yoNeckartal irrigation oya kosha oshimaliwa shi fike peebiliyona N$2,4, omanga shotete sha kosha oshimaliwa shi fike peebiliyona N$5,6 momudo 2018.
Swapo okwa ti ota ka endelelifa onhele opo omeva taa kala taa dindilwa omongwa opo a dule okulongifwa nawa koshimaliwa shi fike peebiliyona N$3,5.
Nandi-Ndaitwah okwa pula opo ku kongwe omikalo diwa dokwaalula eedila dopashiwana.
Okwa udaneka yoo vali kutya ota xwaxwameke okutota po eefakitoli dipe, eenhele dokulonga oinima nosho yo omahangano opo a ete eemhito doilonga. Swapo okwa ti oku na omafaneko okuwede omwaalu wovanhu ovo ve na oilonga moNational Youth Service metanga leameno laNamibia, mopolifi yaNamibia nosho yo mopolifi yomayakulo evyulonghalo.
Ongudu tai pangele oya faneka okuyandja oshimaliwa shi fike peebiliyona N$85,7 moule weedula nhano opo yeendelelife okutota eemhito doilonga di li 256 000 opo ku dule ku vatelwe ovanhu ovo ve na omauhongelwe ashike kave na oilonga nosho yo Ovanamibia ovo tava kongo oilonga., osho ongudu ya udaneka ngaho.
Natango Swapo oku na ondunge yokuyambula po nokuwapaleka eefikola, eshi otashi ningwa pakutunga eefikola dovanhu ovo ve na omaupyakadi a yooloka, eengulu deefikola, oundjuwo, eelabolatoli, eehotela nosho yo oupale womaudano.
Kombinga yokuvatela ovalihongi nofuto yofikola, Swapo okwa hala okutalulula nawa oilonga yehangano olo hali futile ovalihongi ledina Namibia Students Financial Assistance Fund (NSFAF), opo li xwepopeke eyandjo lomayakulo neyambule po okufutila ovalihongi ovo va hala okutwikila, mwa kwatelwa yo novalihongi ovo va pumbwa efiloshisho le li kalekelwa.
Swapo ota lalakanene okutunga oipangelo yawana oshilongo ashishe nosho yo okuxwepopeka omikalo dokukonga oipumbiwa yopaunamiti ngaashi omiti noilongifo moshikondo shoundjolowele, osho sha udanekwa osho.
Mahongora Kavihuha Oshoondaxa okwa lombwela oThe Namibian kutya omaudeko oSwapo itaa dulu okuwanifwa po.
Elaka eli la longifwa otali kelele oSwapo shi litule mo.
“Kapu na onghatu yokolela opo keshe umwe ta dulu okupula ongudu tai pangele i kalele po osho ya udaneka … kakele ashike kokuninga osho tava ningi pakulongifa ‘okuxwaxwameka, nokutwomukumo’, oyo kai shi oitya tai ulike oilonga.”
Okwa ti okwa li a teelela va popya kombinga yoshikumungu sheependjela, oilonga oyo tai dulu okutotwa kutya oyoludi lilipi po nosho yo oikumungu i na sha neliko loshilongo.
Kavihuha natango okwa ti omafaneko oSwapo okulundulula oNSFAF “kali shi liwa”.
Omunawino moinima ya pamba omaxupilo Rowland Brown Oshoondaxa okwa ti omaudaneko oSwapo kee na ouningilo notaa eendulula omadilaadil akulu.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
