‘Xwepo mu i teye ponhele yokudipayafana’

… Eengeleka otadi pula omatopokafano opambili

Omubishofi Lucas Katenda okwa ti ngee ohombo ya taalela omaudjuu itaa dulu okukandulwa po, okutopoka pambili okudufulife okudipayafana.

Katenda okwa popya ngaha konima onotwaveta yokuteya eehombo oyo kwa li ya yandjwa komutumba wopashiwana omafiku aa, oyo ya nuninwa okuxwepopeka eteyo leehombo nokuyandja omayambidido neameno kwaavo ve li meenghalo itadi nuwa omeva, mwa kwatelwa noihakanwa yomahepeko omomaumbo novalihomboli ovo ve li meehombo di na omaudjuu itaa dulu okukandulwa po.

“Eehombo nghee di li po ohadi tilika nale, ashike natango odi li omahangano pokati kovanhu. Ovanhu vahapu ohava dopa, ashike ngee omadopo oo a holoka, naa dimbulukiwe ndee taa longwa mo. Ngee pa holoka omaudjuu itaa dulu okukandulwa po, oshiwa okutopoka pambili ponhele yokudipayafana.,” Osho a ti ngaho.

Katenda okwa ti onotwaveta yokuteya eehombo otai vatele okuxulifa po eehombo omanga inapa holoka oshiponga.

“Oshixwepo vali shi dulife shikwao,” Osho a ti ngaho.

Omuxungimwenyo oo oukwatya waye itau hololwa, okwa ti oshimaliwa nondjila nefimbo olo hashi pula okuteya ohombo oi li oinima imwe oyo tai fininikile ovanhu meehombo nomomakwatafano opaihole e na omahepeko nokwa nyika oshiponga.

“Oshinima eshi shokukala mohombo i na omahepeko medina puhe na oshimaliwa shokuiteya ile molwefimbo olo hashi pula opo ohombo i teke otashi dulu okweeta oupyakadi ile nokuli omadilaadilo okulidipaya momunhu,” Osho a ti ngaho.

Sheikh Abdul Makali Shikongo, oo a kalela po Ovamosilema, okwa ti ovaleli vOvamosilema opo tava ka shakena ve likunde kombinga yonotwaveta ei.

“Okuteya ohombo okwa pitikwa membo ledina Qur’an, ashike omunhu okwa pumbwa okutala keembinga adishe ndee ta pitike ediminafanepo,” Osho a ti ngaho.

Mutjinde Katjiua, ohamba yongudu yopamufyuululwakalo imwe yOvaherero, oku li ominge nonotwaveta, okwa ti ohombo momufyuululwakalo wOshiafrika oya kwatela mo ekwatafano pokati keefamili ndee kashi shi ashike yovanhu vavali.

Oshinima eshi shokweendelelifa okuteya eehombo otashi teya po ashike ongushu yohombo nokuteya po ofamili,” Osho a ti ngaho.

Katjiua okwa ti oveta nai yandje oufemba kovanhu opo va hoolole ngee ova hala okulandula oveta yepangelo ile oyo pamufyuululwakalo meteyo lohombo yavo.

Okwa ti momufyuululwakalo wOshiherero omunhu ou a hala ohombo i teke oha futu mukwao eengobe 12 ongehandukilo.

“Okutukula omaliko ohaku ningwa she likolelela kutya onghalo oi li ngahelipi ashike ohaa tukulwa ngaa shi fike pamwe, omanga eumbo olo mulumenhu.”

Katjiua okwa ti oinima ei yokupula ovanhu opo va kale tava pewa eyambidido lopashimaliwa luhapu ihai longo naana shaashi ohai eta ashike omaupyakadi nomakondjifafano.

“Omolwashike omunhu e na okukala ta yambidida omunhu oo a wana okulikwafa yemwene omanga vehe li vali pamwe? Omayambidido aa otaa xulu nee ngee omunhu a hombolwa ile a hombola vali?” Osho a pula ngaho.

Ashike nande ongaho okwa ti okuyambidida ounona osha kala alushe oshinakuwanifa shovadali aveshe.

OMAIMBO

Minista wouyuki Yvonne Dausab okwa ti opaliamente inai pumbwa okuya moshipala onotwaveta yaye yokuteya eehombo fiyo kwa fatululwa oshitya ‘ovalihomboli’ ngaashi oshilyo shoSwapo Tjekero Tweya tashi pula.

“Itatu ka tambula ko onotwaveta ei fiyo omafatululo a tulwa paveta. Oupyakadi onotwaveta otai ti ovalihomboli nava filwe oshisho, ashike inai fatulula kondadalunde kutya ovalihomboli oolyelye. Ovalihomboli ava oolyeleye?” Tweya osho a pula ngaho oshivike sha dja ko.

Ashike nande ongaho, pefimbo opo Dausab kwa li ta popi mOkabinete oshivike sha dja ko, okwa ti efatululo loshitya ovalihomboli inali kwa telwa mo naana moveta yokuteya ohombo, shaashi omo li li nale mokatendo kohombo komomudo 1961.
Okwa ti minista woikwameni, omatembu neameno Albert Kawana okwa teelelwa a ka yandje omalunduluko monotwaveta yohombo momutumba wopashiwana.

“Paife otu na okatendo kohombo komudo 1961 oko taka longo natango. Efatululo lovalihomboli olo li li mokatendo omo inali lunduluka natango,” Dausab osho a ti ngaho.