‘Swapo na kale koshipundi sigo Jesus oteya’

Elaka ndyoka a popi olya fa naanaa ndyoka kwa li lya popiwa komupresitente omukulu gwa South Africa Jacob Zuma pethimbo a li koshipundi mo2008 sho a lombwele oshigwana kutya ongundu yawo yoAfrican National Congress (ANC), nayi kale tayi lele South Africa sigo Jesus a galuka – netumbulo ndyoka okwa tsikile nokukala teli dhenge omuthindo sigo opethimbo a kuthwa ko koshipundi.MOsoondaha, Kuugongelwa-Amadhila okwa popi kutya Swapo naye na kale oye ta lele sigo Jesus oteya.Ndhoka omuprima okwe dhi popi pethimbo a li ta popitha oshigwana poshituthityapulo shevalo eti62 lyongundu yoSwapo mOkatanga popepi nOshakati.Kuugongelwa-Amadhila okwi indile wo iilyo naalanduli yongundu yawo ya hangane yo ya tule uukuni kumwe opo kaaya ethe ongundu yawo yi sindwe nokudhinwa koongundu dhoompilameno.Kuugongelwa-Amadhila, ngoka ta fekelwa e na ompito onene yokukala gumwe gwomaamboka taya ka hogololelwa moonkatu dhuuleli pomahogololo gongundu yawo ngoka taga ka kala ko numvo, okwa popi kutya oshigwana nashi shilipaleke kutya ongundu yawo oya kalekwa koshipundi kutya nee otashi pula shike.Kuugongelwa-Amadhila okwa li wo a popitha iilyo yongundu yawo poshituthityapulo shevalo lyongundu yawo shoka sha ningilwa poshitayi shedhina Salomon Awala momukunda Aakweenyanga popepi nOngwediva mOlyomakaya ya zi ko moshitopolwa shaShana.“Natu mangeni uukuni kumwe. Inatu etha nande tu sindwe koongundu dhoompilameno. Inatu etha ongundu yoSwapo yi sindwe sigo Jesus ota galuka.”Okwa gwedha po nokwiindila iilyo yongundu osho wo aayambidhidhi, mboka ya li ya gongola momiti ndatu ominene ye li momizalo dhomalwaala gongundu, kayaa ethe oshikandjohogololo shawo shaKatana nenge iikandjogololo yilwe moshilongo yi ye momake goongundu dhoompilameno.OMAIYUVO GOOMPILAMENOOmupopiliko gwongundu yoLandless People's Movement (LPM) Eneas Emvula okwa tongonona etumbulo ndyoka lya popiwa komuprimainista 'ongeshekokalunga nolya pumbwa okukondemwa'.“Omupya omunene oongoka kutya ombimbeli, moka a fa omo a kutha omatumbulo ngoka, ihayi pitike 'eshekokalunga' ngaashi te shi ningi,” osho a popi ngaaka.Emvula okwa gwedha po kutya shoka Kuugongelwa-Amadhila a popi otashi ulike kutya ongundu yoSwapo oyi na ondjala yokutindila koshipundi nokwaataamba ko oshizemo shomahogololo gaayehe gomo2024.Okwa popi kutya ngele ongundu yoSwapo oya ka dhengwa momahogololo ngoka, otashi ulike kutya otashi vulika yi ka tameke omalugodhi nevundakano moshigwana.“Kapu na ongundu yompilameno yomokwiilongo; atuhe Aanamibia tuli kohi yoveta yimwe yomoshilongo, ngele Saara ota ti Swapo oye etameko nehulilo, nena ongundu ndjoka yoSwapo kayi na esimaneko lyoveta tayi wilike oshilongo. Sho osho ngiika tashi etitha oshilongo shetu shi kale monkalo moka shi li ngashingeyi,” osho a popi ngaaka.Pokati mpoka, omupopiliko gwongundu yo-Independent Patriots for Change (IPC) Immanuel Nashinge okwa popi kutya ongundu yawo kayishi yompilameno, ashike ongundu ya tega okuya koshipundi.Omupevipresitente gwongundu yo-Namibia Economic Freedom Fighter (NEFF) Longinus Iipumbu okwa popi kutya otashi kumitha oku uva Kuugongelwa-Amadhila ta popi kutya ongundu yoSwapo nayi kale kuuleli sigo Jesus ota galuka.“Otandi ipula kutya omolwashike omuntu gopondondo ye e na okupopya oshinima shi li ngaaka? Ishewe, aantu ngashingeyi oye wete ko, inashi fa nale sho okwa li owala hatu kala twa landula mo tatu ti 'viva, viva Swapo',” osho a popi ngaaka.Iipumbu, ngoka a yambuka momudhingoloko gwaKatana, okwa popi kutya etokolo lyaangoka ta telele oshilongo nali kale momake gAanamibia ngele oya pumbwa tuu shili okukala mepangelo lyawo nenge pamwe oshigwana osha loloka.“Aantu otaya tsikile okukala mondjala omolwelelo ndyoka lyi li koshipundi lyongundu yoSwapo. Onkene, ndhoka dha popiwa komuprimaminista odha pumbwa okwe ekelwahi,” osho a popi ngaaka.