A lemanekwa kondjambameya moKavango

ESIKU ndyoka okwa li owala lya shi ngomasiku omakwawo gokuyula oohi momulonga gwaKavango, inali ka endela we nawa Jeremia Muyova, ngoka a kanitha okugulu nokweehamekwa kuulumentu sho a ponokelwa kondjambameya omanga a li mokawato ke, momasiku 9 Auguste. Muyova (43), omukalimo gwomomukunda Mashare moshitopolwa shaKavango Uuzilo, okwa ponokelwa kondjambameya omanga a li mokawato ta yulu oohi.

“Molwashoka kandi na iilonga, onda kutha okawato kandje nonete opo ndi ka yule oohi komulonga. Onda yi momulonga ndu uka kombinga yokuuninginino,” osho a lombwele onzonkundaneki ndjika ngaaka, moombete moshipangelo shepangelo shaRundu, moka e li ta mono uuhaku.

Moshipangelo shoka shaRundu Muyova, okweya mo okuza kokapangelo kaMashare Clinic hoka a thikile sho a monithwa oshiponga.

Okwa hokolola kutya omanga e li momeya ta dhuga owato ye, okwa mono aakiintu ye li kooha dhomulonga taya kwata oohi pokati koongamba dhomukunda Omashare nOkatongo, nokwa toka a ye ko.

“Omanga tandi dhuga ndu uka komeho, onda mono okawato kandje ka ndjekwa po, nonda tameke tandi ningine. Okuza mpoka opo nee nda dhimbulula kutya opu na ondjambameya yi li konima yandje, noya tameke tayi kondjitha ndje,” osho a popi ngaaka.

Muyova okwa tameke ta kugu a konge ekwatho, “ashike okwa li kwa tokelwa”.

Okwa popi kutya kali nande eshi ngele mpoka a li momulonga ngoka opwa gama oondjambameya.

“Kanda li nande ndi na shoka nda nongele,” osho a popi ngaaka.

Sho a ponokelwa, ondjambameya oye mu ehameke noonkondo mokugulu kokolulyo shoka she eta okugulu kwe ku tetwe ko koshipangelo.

Muyove okwa popi kutya okwa li wo e ehamekwa kuulumentu.

Ngashingeyi okwa popi kutya keshi kutya ota ka kala ta kwathele ngiini egumbo lye sho a lemana.

“Onda kanitha oshindji lela . . . Kandi shi kutya egumbo lyandje otandi ke li yambidhidha we ngiini. Onda kanitha okugulu nuulumentu wandje. Kandi shi kutya otandi ka hupa ngiini. Onda lemana,” osho a popi ngaaka.

Muyova okwa popi kutya oku na oyana yane yaamati nomukulukadhi, ngoka ihaa longo noha mono owala iilonga yokoonyala.

OMAKONAKONO

Uuministili wOmidhingoloko, Omakuti nOmatalelopo Romeo Muyunda okwa popi kutya omakonakono moshiningwanima shoka oge li metifa.

“Ondi na okumona uuyelele kombinga yaashoka okuza kuuministili, ashike paveta ndjoka yi li po, opu na omulandu gwa tulwa po uuna kwa ningwa omakonakono gomuule.

“Iipumbiwa ayihe oyi na okukala ya gwanithwa po okutala ngele onkalo ndjoka oye etithwa [koshiyamakuti] nenge pamwe uuhasha owala wa nakuninga oshihakanwa,” osho a popi ngaaka.

Muyunda okwa popi kutya omulandu ngoka gwa talululwa gwomaipumomumwe pokati kaantu niinamwenyo, nofuto yaamboka ya dhipagwa nenge ya monithwa iiponga kiinamwenyo otayi utha egandjo lyooN$50 000 uuna omuntu a lemanekwa, osho wo ooN$100 000 kaakwanezimo yanakusa ngoka a kuthwa omwenyo koshinamwenyo.

Oshiwike shoka Muyova a ponokelwa kondjambameya, kamatyona gwomimvo 15 okwa ponokelwa nokudhipagwa kondjambameya moshitopolwa shaKavango Uuninginino momukunda Osinzogoro pethimbo a li nookuume ke taya yulu oohi.

Olutu lwa nakusa Frans Ngongo (15) lwanima olwi itsuwika mOlyomakaya momukunda Okapako, omukaakena ashike omushona okuza mpoka a ponokelwa kondjambameya.

Olutu lwe okwa li lwa dhimbululwa kaakwanezimo ye pehala lyoshiningwanima.

Konima yoshiningwanima shoka, komanda gwopolisi yoshitopolwa shaKavango Uuninginino, komufala Julia Sakuwa-Neo, okwa londodha oshigwana kombinga yoondjambameya ndhoka dhi li momulonga gwaKavango, dha nika oshiponga.