Opolisi ya londodha oshigwana shi kotokele oombudhi

OPOLISI oya gandja elondodho koshigwana sha landula iiningwanima yomayugo mbyoka ya ningi omasiku tayi lopotwa.

OPOLISI oya gandja elondodho koshigwana sha landula iiningwanima yomayugo mbyoka ya ningi omasiku tayi lopotwa. Okuza iiwike ya piti oolopota dhopolisi odha kala noonkundana dhomayugo ngoka ga vuka ngashingeyi miitopolwa ya yooloka moshilongo.

Omupopiliko gwopolisi, Silas Shipandeni, oshiwike shika okwa koleke oshiningwanima shokavidio hoka taka ingaana komalungula komukulupe ta kengelelwa oshimaliwa she koombudhi mbali pethimbo a li ta hili oshimaliwa peshina lyoFNB, moshitopolwa shaHangwena.

Oshiningwanima shoka, osha ningwa mEtitatu lyoshiwike sha zi ko, lwopotundi 13h30, peshina lyoFNB ndyoka tali adhika poO'Save Mini Market moshitopolwa shaHangwena.

Poshiningwanima shoka, okavidio oku ulike nkene omukulupe a adhika i ipyakidhila nokutula mo onomola yopaholamo meshina opo a vule okupewa oshimaliwa shoka a pumbwa, ashike omulumentu ngoka a li e mu landula momukweyo okwe ya puye a fa te mu pukulula.

Kalyamupombo ngoka okwa shigi omukulupe nokudhengela mo oonomola meshina nokwa kutha mo okaboba komukulupe noya zi po ayehe nomukulupe peshina ndyoka – mbala, omulumentu omukwawo ngoka a zi konima okwa nukile peshina nokukutha mo oshimaliwa.

Shipandeni okwa popi kutya omukulupe ngoka oka kengelelwa oshimaliwa shooN$4 000.

“Oya kengelele omukulupe noye mu tula pokati, noya kutha mo oshimaliwa meshina, sho ye mu ningi iineya ya fa taye mu kwathele,” osho a popi ngaaka.

Gumwe gomaafekelwa mboka ya kengelele omukulupe okwa tulwa nale miipandeko.

Shipandeni okwi indile aakwashigwana ya kale aluhe ya lungama uuna ye li pomashina gokunana iimaliwa, nokwa pgwedha po kutya naya yande okupukululwa kaantu mboka kaaye ya shi.

“Ino itayela nande ndhoka to lombwelwa komuntu haaye sekuliti gwopeshina ndyoka, molwashoka oyendji yomaantu mboka ohaya kala ookalyamupombo ya hala okukengelela,” osho a popi ngaaka.

Shipandeni okwa popi kutya omukulupe gulwe natango omasiku ga zi ko okwa yugwa iinima ye megumbo, yongushu inaa yi tseyika.

“Iiningwanima yomayugo oya vuka. Inatu hala okumbandameka oshigwana, ashike otatu kambadhala owala oku ya londodha pakuyalombwela uushili kutya onkalo oya nayipala,” osho a popi ngaaka.

Okwa londodha wo oshigwana shi yande oku ulika iinima yawo yongushu mokati koshigwana, ngaashi okwe enda ye na uumbako komakutsi.

“Shika kashi shi owala oshinakugwanithwa shopolisi. Atuhe otwa pumbwa okuninga po sha,” osho a popi ngaaka.

Shipandeni okwa gwedha po kutya oshigwana nashi kale wo shi ikaleka kokule naantu mboka kaaye ya shi – kutya nee opethimbo lyomuteya nenge opethimbo lyuusiku.

“Uuna tatu tsakanene naantu, natu yandeni okuya momahokololo nayo, molwashoka oyendji ihaya kala lela shili nomalalakano gokupopya nane,” osho a popi ngaaka.

Shipandeni okwi indile oonakuninga iihakanwa ya kale aluhe haya ndhindhilike nawa ookalyamupombo uuna taya yugwa iinima yawo opo ya kale nuumbangi mboka tawu vulu oku ya tulitha miipandeko nuupu.

Pauyelele wolopota yopolisi yehuliloshiwike lya zi ko, omupopiliko gwopolisi moshilongo omupevikomufala Kauna Shikwambu, okwa popi kutya aalumentu yaali oya ponokele omukwashigwana positola yedhina Kamila Bottle Store ndjoka tayi adhika popepi nositola yEhafo Supermarket momudhingoloko gUupindi, mOshakati.

Aafekelwa mboka otaku hokololwa ya ponokele omukwashigwana ngoka noombele nomakende noye mu ningile omatilitho kutya otaye mu monitha oshiponga ngele okwa tindi okwi iyutha komalombwelo gawo.

Omukwashigwana ngoka okwa yugwa ongodhi ye yopeke, osho wo okandjato kiimaliwa hoka kali noodokumente dhe, nokwa yugwa wo oshimaliwa koomuma shooN$14 850.

Aafekelwa otaku hokololwa ya nukile motuukala ontokele yoNissan March, yonomola inaa yi tseyika.

Kapu na ngoka a tulwa miipandeko nenge shoka sha monika po sigo oompaka. Omakonakono gopolisi otaga pula komeho.

Shikwambi okwa koleke natango oshiningwanima shilwe sheyugo sha lopotwa momudhingoloko gwa Wanaheda mOvenduka.

Nakuninga oshihakanwa otaku hokololwa u ulikwa nondjembo, nokwa ningilwa omatilitho gokutsuwa nombele kombotsotso, noye mu kutha oshihauto she, shotuukala yoHonda Fit, noshimaliwa shooN$85 180.

Kapu na ngoka a tulwa miipandeko nenge shoka sha monika po sigo oompaka, nomakonakono gopolisi otaga pula komeho.

Onzonkundaneki ndjika, petameko lyoshiwike shika oya kundaneke kombinga yegumbo lyomuChina momudhingoloko gwaHochland mOvenduka ndyoka lya teywa nokuyakwa oshimaliwa shoomiliyona N$3,3.

Ookalyamupombo yahamano otaku hokololwa yi iteyele megumbo ndyoka ongula yEtitatu lyoshiwike sha zi ko nokuyaka mo iinima ngaashi oshimaliwa shoomiliyona N$3,3, ookompiyuta ndatu dhopeke osho wo oongodhi dhopeke dhi li ne.

Ashike aafekelwa yaali Frans Andreas (33) naFrieda Shengelao Eelu oya holoka mOmpangu yaMangestrata gwaVenduka, mOmaandaha sho ya tulwa miipandeko mehuliloshiwike.

Andreas naEelu oya tulwa miipandeko pomboloka yaShivelo pethimbo ya li mela lyondjila okuya konooli, noya adhika noshimaliwa koomuma shooN$200 osho wo oshimaliwa shoodola dhaAmerika U$2 000.