Onkalo yaanegumbo ye li moluhepo ya nayipalekwa komvula

POOHA ashike dhomulamba guli konima yosikola moKatutura, mOvenduka, opwa kala egumbo lyomukokele Anna Hatzenburg naanegumbo lye ye li 21.

Hatzenberg, ngaashi naana oyendji haya tegeke omeya pethimbo lyomvula, oha longitha omayemele osho wo endoloma lyiiyagaya ezizi okutegeka omeya uuna shiyenga sha nangombe tayi ga dhenge pevi opo ashike a kale a kwashilipaleka kutya okwi imonena omeya ogendji pethimbo tayi ka sheka.

Omeya ngoka ha tegeke ohaye ga longitha naanegumbo lye okwi iyoga, okuyoga iikutu osho wo iikumbatha yawo. Ashike, nonande Hatzenberg oha kala a pumbwa omvula noonkondo, oshikando shika oye mu thigi itaa kotha we uusiku osho wo okukala nomalimbililo.

Omvula ondhigu ndjoka ya li ya loko mOvenduka ongulohi yOlyomakaya ya zi ko, oya li ya thigi ya yonagula egumbo lye, iinima yawo osho wo okuvunyagula ehala lyawo ndyoka lyi li mooha dhomulamba.

Oya li ya kanitha iikutu yawo oyindji mbyoka ya li ya tegelelwa okuyogwa sho ya li ya faalelwa komeya nokuya momulamba.

Okashina kokugandja olusheno hoka ka li ka landwa kuHatzenberg noyana okupitila moondooha ndhoka ya li haya toola nokulanditha, oka li ka yonwa komeya gomvula.

Emanya ndyoka haya longitha okunwitha omulilo oongodhi dhawo dhopeke, olya li lya yonagulwa komeya gomvula ndjoka.

“Kapu na ehala ndyoka lya kaha,” osho Hatzenberg a popi ngaaka, pethimbo a li tu ulikile omutoolikundana goshifo shika oshitosi osho wo olupanda lwombashu moondunda adhihe sho lwa yonagulwa kekunguluko lyomeya.

Iikuni mbyoka haya longitha okutema oya li ya tuta, onkene okukala kaaye na iikuni ya kukuta, Hatzenburg ina vula okutelekela aatekulu ye.

Pamwe noyana yaamati okwa li ya kambadhala okwo opaleka evi ndyoka lya li lya kungululwa nokuyonagulwa komvula taya kambadhala okuli lapela popepi, ashike ngele omvula oya tsikile natango okuga dhenga pevi nena evi ndyoka otali ka kungululwa po shoka tashi ke etitha ombashu yawo yi hokwe komeya nokufaalelwa. Hatzenberg, ngoka a li ashike e ya mOvenduka okukonga iilonga, okwa li a kala ke ena egumbo nenge mpoka ta zi mo-2016 konima sho omugandji gwiilonga ye a li a mana oondjenda nokwa li a nyengwa okumona iilonga yilwe.

Omukokele ngoka noluvalo lwe oya li ya kala pongalangala uule woomwedhi ndatu omanga inaa ya pehala mpoka ya kala ngashingeyi. Ehala ndyoka ye li ngashingeyi olyosikola , ashike Hatzenberg okwa li a pewa uuthemba kelelo lyosikola ndjoka opo a kale po.

“Otwe mu pe ompito yokukala po sigo opethimbo ta ka mona ehala li li nawa mpoka ta vulu okutula egumbo lye,” osho Gerson Kongora, omukuluntusikola gosikola yehala ndyoka a shanga ngaaka mombapila ndjoka ya gandja uuthemba kuHatzenberg.

Aanegumbo lyaHatzenberg pehala ndyoka oya tunga po oombashu ne, osho wo okandjugo hoka ha ka tilehile oonyata momulamba, naashoka oshe eta uupyakdhi wopaundjolowele kaanegumbo.

Okwi ikwatelela kuHatzenberg, omwana gosheeli gomukadhona, Caroline (28), osho wo mumwayina gonkelo mboka a li a kutha po konima sho yina golela a li a hulitha, Tommy (38), oya li ye ehama omukithi gwehuli. Omutekulu gwaHatzenberg, gomimvo ne okwa li naye a kwatwa koTB nokuza mpoka sigo opaife ota nyengwa okupopya.

Omwana gonkelo gwaCaroline okwa li a falwa koshipangelo uusiku mboka womvula onene ya loka molwaashoka okuna uupyakadhi wo-asthma.

Aanegumbo mboka oya li yu ulukile oThe Namibian omathano geyoka enene ndyoka lya li lye shi pondola okuya muyimwe yomoombashu.

Elago enene kapu na ngoka a li e ehamekwa.

Ngoka gamwe gomomaupyakadhi ya taalela pegumbo lye, ashike Hatzenberg okwa li a gwedha po kutya oyena ompumbwe onene yiikulya.

Uusila wepungu mboka ya li ye na owa li wa yi kohi yomeya.

Okwa ti ethimbo limwe oha longitha woo uusila mboka wepungu okuninga uukuki mboka ha landitha kuunona wosikola. Hatzenberg okwa ti okuhole pehala mpoka haya zi molwaashoka olyi li popepi nosikola yaanona ye osho wo okapangelo okashona, ashike okuna eikwato pomutima kombinga yegameno ngele okwa lokwa natango omvula onene.

“Kapu na uusiku mboka handi kotha nombili,” osho Hatzberg a popi ngaaka.