AMTA a yambapaleke aaleli ye

OMUKULUNTUWILIKI gwehangano lya yama kepangelo tali nana nondatu pashimaliwa lyedhina

Agro-Marketing and Trade Agency (AMTA), Lucas Lungameni okwa kala ta futwa oshimaliwa sha pitilila noomiliyona N$ 3,1 okuza mo-2014 sigo 2018.

Aaleli aakuluntu yatano yomehangano AMTA oya li wo nayo ya futwa oshimaliwa sha pitilila

noomiliyona N$1,5 (komvula) kehe gumwe, okuza mo-2015.

Uuyelele mbuka owa shangwa momushangwa ngoka gwa monika koThe Namibian.

Omushangwa nguka otagu ulike wo kutya ewilikongundu lyehangano ndika olya li lya ningi etokolo opo kaa li pepaleke okontalaka yaLungameni omolwuulingilingi, omauvathano giifuta gaa fele osho wo iifuta yoondjambi dhaaleli yehangano dha pitilila.

Omushangwa nguka otagu ulike wo kutya Lungameni osho wo aaleli aakuluntu mehangano oya li ya futwa oshimaliwa shi vulithe shoka shu uthwa okufuta aaleli yomahangano ga yama kepangelo okuza mo-2014, sho ehangano lya totwa.

Omapulo ga li ga tuminwa Lungameni iiwike iyali ya piti osho wo oshiwike sha zi ko, ngele otaya ka futa iimaliwa mbyoka ya futwa ya pitilila nenge hasho, ine ga yamukula. Epangelo olya li lya toto po ehangano ndika nelalakano lyokuunganeka omalandithilo giilongomwa yomomapya osho wo okuyambidhidha iilongomwa yomomapya moshilongo.

Ehangano ndika oli na iitayi hayi landitha iilongomwa yuunamapya mOvenduka, mOngwediva osho wo koRundu, ashike ehangano ndika olya shituka ongehangano lyokuyambapaleka aaleli yalyo osho wo aanangeshefa yontumba.

Pamushangwa ngoka gwi itsuwa, Lungameni okwa kala ta kwata oshimaliwa shi thike po-N$840 000 komvula sho a tameke iilonga ye ko-AMTA mo-2014. Shoka otashi ulike kutya okwa tameke iilonga ye ta kwata oshimaliwa shi vulithe po-N$ 803 000 shoka shu uthwa okukwatwa komukuluntuwiliki ta lele ehangano lya yama kepangelo lyopamuthika gwa-AMTA.

Lwanima, ondjambi yaLungameni oya li ya gwedhelwa sigo opoomiliyona N$1,2 (komvula) momvula oyo tuu ndjoka mo-2014, shono tashi ulike kutya okwa tameke okukwata oshimaliwa sha pitila noo-N$ 445 000 komvula, shoka shi li kondje yomusindalandu ngoka gwa gandjwa kUuministeli wOmahangano gEpangelo.

Omvula ya landula ko, omukuluntu gwa-AMTA okwa li a futwa oshimaliwa shi thike pomiliyona N$ 1,4 komvula, shoka sha pitilila no-N$ 650 00.

Natango ondjambi yaLungameni oya li ya gwedhelwa mo-2017 noshimaliwa sha konda poomiliyona N$ 1,5 (komvula) shoka shu ulike kutya okwa futwa ondjambi ya pitilila

noshimaliwa shi thike po-N$ 700 000 omvula ndjoka.

Omukuluntuwiliki nguka okwa li a futwa natango ondjambi yi thike poomiliyona N$ 1,5 mo-2017 osho wo mo-2018.

AMTA okwa kala ashike i ikwatelela koshimaliwa tashi zi kepangelo okuza sho ehangano lya yama kepangelo lya totelwe. Ehangano ndika olya li lya pewa oshimaliwa shi thike poomiliyona N$ 30 oomvula mbali dha piti.

Ngaashi naanaa Lungameni a ningilwa, aaleli aakuluntu mehangano lya-AMTA nayo oya li ya futwa oshimaliwa sha pitilila.

Ehangano ndika olya li lya tameke naaleli yane mo-2014, mboka ya li ye na ondjambi yi thike poo-N$564 000 (komvula) kehe gumwe ashike ngaashingeyi oya londa noyi thike po-N$ 988 000 (komvula) mukehe omuleli.

Aaleli mbaka oyo nee Seth Awa-Eiseb (gwOshikondo shAaniilonga ), Reagan Kooper(gwiimaliwa), Alfeus Siyamaba (gwoshikondo tashi longo niilongomwa yomomapya) osho wo Wilhemina Handunge (Omuwiliki gwoshikondo shiipungulwa yoondjumbu dhokomangula).

Ondjambi yaAwa-Eiseb oya li ya gwedhelwa noshimaliwa shi thike po-N$ 222 000 okuya po-N$786 000 okuza momvula-2013 sigo omo-2014.

Ondjambi yaKooper nayo oya li ya gwedhelwa okuza po-N$ 564 000 momvula 2014/13 sigo opoo- N$ 988 00 omvula ya zi ko.

Okuza montengeneko yoshimaliwa shomvula 2015/16, aaleli aanene ya-AMTA mboka ye li kohi yomukuluntuwiliki oya futwa oondjambi dhi thike poomiliyona N$1,5 (komvula) kehe gumwe.

Omusindalandu gomahangano gepangelo otagu ulike kutya aaleli mbaka oya li ye na okufutwa oshimaliwa inaashi konda nokuli po-N$ 722 422 mo-2018/19.

Ominista yUunamapya nUunimuna Alfeus! Naruseb, okwa li a lombwele oThe Namibian oshiwike sha zi ko kutya aaleli mbaka yi ifutu yo yene oondjambi dha pitilila oye na oku shi hokolola.

!Naruseb okwa li a lombwele oshifo shika mEtine lyoshiwike sha zi ko kutya opu na omilandu ndhoka dhi na okulandulwa opo ngoka e na ondjo a pewe egeelo.

“Ngame inandi pa nande ogumwe uuthemba wokwiifuta oshimaliwa sha pitilila” !Naruseb ta ti.

Mombaapila ndjoka yomasiku 8 gaDesemba 2018, Jooste okwa li a yamukula kutya, “Moomvula ntano dha piti oondjambi dhaaleli ya-AMTA komvula odha gwedhelwa sha pitilila noonkondo okuyeleka naashoka ye na okufutwa,” Jooste okwa ti ombelewa ye inayi gandja nande elombwelo ku-AMTA a fute aaleli ye oshimaliwa shi vulithe pwaashoka shi li pamulandu.

“Okwaahalandula omilandu oshinima sha nika oshiponga,” osho a ti ngaaka. Minista Jooste okwa ti omakonakono goshimaliwa mo-2017 oga li gu ulike kutya AMTA okwa li ta longitha oshimaliwa sha pitilila.

“Oshimaliwa shoondjambi dhaaniilonga ya-AMTA oshi li oopelesenda-61 dhomiimaliwa mbyoka hayi gandjwa kehangano okuza kepangelo, shono tashi gandja lela efano ewinayi mokutala kutya epangelo ohali gandja oshimaliwa shika kaali na etegameno,” Jooste osho a ti.