Katti tashi vulika a kanithe egumbo lyongushu yooN$2m

EGUMBO lyomunangeshefa Knowledge Katti lyokoWalvis Bay lyongushu yoomiliyona N$2,2 otashi vulika li fandithwe ngele oongunga dhooN$160 000 dhoka tadhi patathanwa inadhi futwa.

Uuyelele mbuka otawu mbunyuka moondokumende dhoka dhi li mopangu yopombanda shi na sha nehangano lyedhina Erf 244 Walvis Bay CC, ndyoka olyo mwene gwegumbo lyokomunkulofuta moka mu na yina yaKatti.

Omishangwa dhompangu odhu ulike kutya omunambelewa omukuluntu mombelewa yaKatti, Jeremy Hangula, okwa landele ko ehangano lyedhina Erf 244 Walvis Bay CC kooyene yalyo Marion Bausch, ngoka a li mo noopelesenda 52,5%, naPatrick Suckley (47,5%) koomiliyona N$2,2 muMaalitsa 2013.

Ehangano ndika olyomwene gwehangano lyegumbo ndyoka tashi vulika li landithwe po.

Aanamadhina oya kala taa longitha oombwayelo dhomoveta opo ya yande okufuta iifendela yokongulu okupitila mokulanda iipambuliko momahangano.

Oondokumende ndhoka dhi li kompangu otadhi holola kutya pauvathano lyopakana, Katti okwa pingene po Hangula ongamwene gwehangano lyoErf 244 Walvis Bay Cc muKotoba 2013, hahende gwe ta ti, ta gwedha po kutya yina yaKatti, omunamimvo 68, meme Fransina oye e li megumbo moka. Katti opo ashike a dhimbulula kutya egumbo ndyoka a landa oli na oongunga inadhi futwa.

Ehangano lyoErf 244 Walvis Bay CC olya li li na oongunga dhehangano lyoRouco Auto Manufacturers manga Katti ine li landa ko.

Ehangano ndyoka ngashingeyi olya hala Katti a fute oongunga dhooN$160 000 lwaampoka, dhoka inadhi futwa kumboka ya li nale ooyene yehangano lyoErf 244 Walvis Bay CC, nongele inashi ningwa egumbo lye lyongushu yoomiliyona N$2,2 otali fandithwa po.

Aanambelewa mboka ye na uuyelele moshipotha shika oya ti ehangano lyoErf 244 Walvis Bay CC olya gandjele iilongithwe yi ka longithwe tayi futilwa, ihe inayi galulwa.

Aakalelipo yopaveta yehangano lyoRuaco Auto Manufacturers, Jan Olivier & Co, oya li ya nyolele ehangano lyaKatti omushangwa momasiku 28 Apilili 2017.

Momushangwa moka, Olivier okwa ti otaa ka katuka onkatu opo ku ka kongwe uuthemba wokufanditha po omaliko gehangano lyoErf 244 Walvis Bay CC ngele inaa yamukulwa muule womasiku gane okuza pesiku lyontumwafo ndjoka ya nyola.

Hahende gwaKatti Richard Metcalfe okwa yamukulile Olivier momasiku 11 Mei 2017, ta ti omuyakulwa gwe ke na mo sha moofuto oonkulu dhehangano ndyoka.

Metcalfe okwa ti Katti, paumwene nosho wo ongamwene gwehangano lyoErf 244 Walvisa Bay CC ina landa sha kehangano lyoRouco Auto Manufacturers.

Okwa pula Olivier opo a gandje uumbangi wu na sha noshikumungu shehangano lyoRouco Auto Manufacturers wi ihwapo.

Metcalfe, momukandagano ngoka a tumine kompangu yopombanda, okwa ti Katti ka li e na uuyelele kutya okwa tulilwa mo oshipotha sigo omomasiku 8 Mei 2017, pwa pita ashike oshiwike shimwe shoo Olivier a nyolele ehangano lye ontumwafo.

Erf 244 Construction

Metcalfe okwa ti Olivier okwa tanta omuntu a puka, molwashoka Katti kapu na nando ethimbo limwe a li nehangano lyedhina Erf 244 Construction CC.

Nando ongaaka, Olivier okwa ti ehangano lyoErf 244 Walvis Bay CC olya li hali ngeshefa tali longitha edhina lyoErf 244 Construction CC.

Otwa nothelwa ko kumboka ye na uuyelele moshinima shika kutya mboka ya li nale ooyene yalyo oya zimina oshinima shika mompangu yopombanda.

Metcalfe okwa nyenyeta wo kutya Olivier okwa hala okukengelea sho a kala ta pula Katti oshimaliwa. Olivier okwa tegelelwa a ka yamukule oshiwike tashi ya.

Metcalfe okwa ti otashi kala esithahoni ngele yina yaKatti okwa tidhwa mo megumbo moka molwoongunga dhoka tadhi ungaungwa nadho kompangu moshipotha shika, ta ti omunamimvo 68 egumbo okwe li longulula konima sho e li landa ko mo2013 opo li opalele onkalo ye yuukokele.

Ngashingeyi oku niwe omaipulo ngele Katti ka li a lombwelwa kutya ehangano ndyoka a landa oli na oongunga dhehangano lilwe. Otwa kundanekwa kutya Katti otashi vulika ka li e na uuyelele kutya ehangano ndyoka ta landa ko oli na omikuli.

Ngele osho shi li ngaaka, nena Katti ota ka pula mboka ya li nale ooyene yehangano, nenge hahende ngoka e mu landitha ehangano a fute oongunga ndhoka.