A tokolelwa omimvo 62 molwiimbuluma

OMUNIILONGA gwomomatungo kwa li, Pinias Kashawa, okwa monika ondjo miipotha ya yooloka yuulunga nomuyonena e ta tokolelwa egeelo lyokukala mondjedhililo uule womimvo 62 noomwedhi 4.Kashawa oku na omimvo 43.

Ngashingeyi oku li mondholongo, a kala mo uule womimvo hamano noomwedhi mbali lwaampoka.

Omulumentu nguka okwa mangelwe po mo2010, a adhikile popepi nehala a longela uushanda mOkuryangava.

Etokolo lyegeelo olya kuthwa mEtiyali, sha ningilwa mompangu yopombanda yomoshilandopangelo.

Sho e mu tseyithile egeelo lye, omupanguli Alfred Siboleka okwa lombwele Kashawa kutya ompangu oya hala, okupitila megeelo ndika, okuguna ayehe mboka ya hala okwiiteyela momagumbo gaantu noku ya longela omuyonena kutya uulunga itawu idhidhimikilwa nando.

Omupanguli okwa holola kutya, Kashawa, konima sho a monika ondjo, okwa ti ina ninga nando osha sha puka, nando okwa adhikile ta yaka komiya dhashinana sho dhe mu yaha mokugulu ongula yomasiku 17 Apilili 2010. Kashawa, konima yokuyahwa, okwa adhika nombistoli.

Okwa hokololwa kutya ombistoli ndjoka oya yakelwe megumbo lya teyelwe momasiku 12 Apilili 2010.

Kakele kiinima mbyoka ya yugwa kaantu nomegumbo ndyoka lya teywa mOkuryangava, Kashawa okwa adhika nekonde lyokuteta iitenda ndyoka lya longithilwe moshikonga shokuteya omagumbo ongulohi yokupendukila esiku ndyoka.

Kashawa okwa tokelwa ta teya omagumbo ongulohi yesiku a kwatwa po.

Konima sho a monika ondjo, omupanguli ta ti, Kashawa ini iyala nando ombedhi molwiilonga ye yuumpulu nomuyonena.

Okwa ondjo molwiipotha iyali yokuya nomuntu miihulo komatha, iipotha iyali yonkambadhala yeyugo, iipotha iyali yeteyo lyegumbo nelalakano lyokuyuga, oshipotha shimwe sheteyo lyegumbo nelalakano lyokuyaka, iipotha iyali yeponokelo komukalo gwokutilitha, iipotha yokukala niilwitho kayi na omukandapitkilo, okuponokela nokweehameka omuntu kolutu nosho wo okuulika omuntu ondjembo.

Kashawa okwa yahwa konima sho omukiintu omupolisi i ikanyuna oshimpulu shoka she mu ponokelele megumbo lye.

Oshimpulu shoka osha kwata koonkondo omukiintu gulwe iikando iyali, she mu kwatele megumbo.

Omukiintu ngoka a kwata koonkondo okwa li e na omimvo 19 pethimbo lyoshiningwanima.

Omupolisi okwa lombwele ompangu kutya oshimpulu osha fadhuka po nowili, ongodhi yopeke, okalyenge komothingo nombandi yiilonga yuupolisi.

Iinima ayihe mbika Kashawa okwe yi yugu omupolisi nomunegumbo lye, nokwa adhika nayo kolutu sho a monithwa oshiponga kopolisi.

Konima yiiwike iyali, Kashawa okwa lombwelele ompangu kutya okwa li ha longo momatungo, ihe okwa li ha yala uudhopi wopevi manga ina mangwa po.

Kashawa ta zimine wo kutya okwa li a tokolelwa egeelo moshipotha sheteyo lyegumbo nuulunga mo2006, sho a adhika nombistoli, ongodhi yopeke nosho wo elyenge.

Iinima ayihe mbika oya yakwa.

Nando okwa zimine egtokolo negeelo ndika, Kashawa okwa ti okwa tokolelwa egeelo molwashoka okwa landa ongodhi ya yakwa.

Omupanguli okwa tokololele Kashawa egeelo lyomimvo 15 mukehe oshipotha shomiipotha iyali yekwatonkonga, egeelo lyomimvo hamano molwiipotha iyali yonkambadhala yedhipago, egeelo lyomimvo hamano mukehe oshipotha shomiipotha iyali yeteyo lyegumbo nelalakano lyokuyuga nokudhipaga, egeelo lyomimvo 4 mondjedhililo moshipotha sheteyo nelalakano lyuulunga, egeelo lyomimvo hamano molwoshipotha shokukala nondjembo kayi na oombaapila.

Kashawa okwa tokolelwa wo egeelo lyomimvo mbali mondjedhililo molwoshipotha shokuponokela omuntu nelalakano lyoku mu ehameka, egeelo lyomimvo mbali molwoshipotha shokuulika omuntu ondjembo, nosho wo egeelo lyoomwedhi 4 molwoshipotha shokuningila ponokela omuntu pamukalo gwetilitho.

Molwashoka kapu na nando egeelo tali longelwa ko oshita nekwawo, Kashawa oku na okulongela ondholongo uule momimvo 62 noomwedhi 4. Oshikondo shokukwathela aakwashigwana paveta osha tumu omutseyiveta Ndapewa Shipopyeni a kalele po Kashawa, manga epangelo lya li lya kalelwa po komutseyiveta Palmer Kumalo.