Diescho ta lopota Simataa koministeli onkuluntu

NGOKA a li nale omukuluntuwiliki gwoNipam, omusamane Joseph Diescho, okwa ti epangelo olye mu vunyagula nokuninga emanguluko nuunongo we ontselelandjambo.

Momukanda kagu na esiku ngoka a nyolela koministeli onkuluntu meme Saara Kuugongelwa-Amadhila, Diescho okwa ti okwa vunyagulwa nokusithwa ohoni kewilikongundu lyoNipam manga inali mu kutha miilonga omvula ya zi ko.

Okwa ti omunashipundi gwewilikongundu lyoNipam, omusamane George Simataa, okwe mu lundila noku mu ula nayi moshigwana, ta gwedha po kutya etokolo lyoku mu kutha miilonga inali kuthwa shi ikwatelelwa kiilonga ye, molwashoka inaku landulwa omilandu dhokukuutumbika omuniilonga uuna a pogola a vule okugunwa nokupulakenwa.

Diescho okwa tsikile ta ti okwa gandjele omikanda kuSimataa muAguste omumvo gwa yi, dhoka dha ningi onzo yomahepeko nethindilokongudhi lye nolyaaniilonga yalwe moNipam kewilikongundu.

Omukanda ngoka, Diescho ta shanga, ogwa totha mo omutyanayi nelaka lyapuka pailonga hali longithwa miigongi.

Okwa totha mo oshiningwanima shimwe, moka a li a lombwelwa koshilyo shewilikongundu kutya ewilikongundu otali vulu oku mu tidha miilonga, molwashoka ina kongwa kepangelo ihe olyo lyene lye mu kuta miilonga.

“Konima sho nda gandja olopota ndjoka, ewilikongundu olya tameke okwiingongosheka li kuthe etokolo lyokutula miilonga etokolo lya ngongwa nomatompelo gopapolitika,” Diescho ta shanga.

Ngele etokolo inali nwethwa mo papolitika, Diescho ta tsikile, ngeno ewilikongundu inali kutha etokolo lyoku mu sitha ohoni montaneho yaakwashigwana.

“Omukalo ngoka gwa longithwa kewilikongundu mokukutha omatokolo galyo ogwa holola puuyelele kutya ayihe mbika oya ningwa molwomishangwa dhandje, okafekela kokwaanuuyuuki nomadhilaadhilo gandje kombinga yopolitika moshilongo,” Diescho ta holola momushangwa gwe.

Omuprofesori okwa zimine kutya ini iyutha komalombwelo gomunambelewa ngoka a landulwa kuSimataa pailonga, omusamane Frans Kapofi, sho a li e mu lombwele a hulithe po okugandja omaiuvo ge miifokundaneki.

Diescho okwa ti elombwelo ndika olya li lya gandjwa owina opo a mwenekwe.

Okwa holola wo kutya Simataa naJerry Mwadinohamba, mboka ya kuutumbikile omutumba gwewilikongundu, oya li ye mu tindile a ka fumvike omonagona a valwa komumwayinamati, sigo ya tsilwa oongolo kuMabella Cupido ye mu pe ompito.

Diescho okwa ti shika osha li tashi ningwa nelalakano lyoku mu pa ompito a ye kefumviko ina pewa epitikilo, ya vule nawa oku mu katukila onkatu.

“Mu3 Desemba 2015, Simataa okwa li a lombwelele ndje mombelewa ye kutya omupresidente Hage Geingob okwe mu dhengela ongodhi okuza koParis, hoka a yile komutumba gu na sha nelunduluko monkalo yombepo, nokwe mu pula a gandje uuyelele kiikundaneki kombinga yoNipam nangame.

Onkene okwa pititha omulombo miikundaneki mu3 Desemba 2015 ina popya nangame, nokumona ndje ondjo miipotha inatu yi kundathana naye,” Diescho ta tsikile.

Diescho okwa ti sho a pewa ompito yokuhulitha po iilonga ye, Simataa okwa li e mu tseyithile kutya etokolo oli na tango okukundathanwa naGeingob ngele a galukile moshilongo.

Nando Dieascho okwa ti oministeli onkuluntu oya koleka kutya omukanda oye gu yakula, omupoliko gombelewa yoministeli onkuluntu, Saima Shaanika, okwa ti omushangwa ka li e gu mona, noku ukitha omapulo kuDiescho.

Mwadinohamba naye mOmaandaha okwa tile omushangwa ine gu mona nokwa pula e gu tuminwe pae-mail.

Simataa okwa tile oku li koIndia noku uvaneke okuyamukula komapulo ngele a galukile kegumbo.