Endilo otali kaleke iihokolola yaLameck

EINDILO mompangu yopombanda okukondjitha etokolo lyomupanguli Maphios Cheda ngoka ina hala i ikuthe mo oshipotha shaangoka a li nale oshilyo shokakomitiye kiilonga yepangelo, Tekla Lameck nookuume ke Kongo Mokaxwa naYanga Fan, ngaashi a li a pulwa, ota li ka pulakenwa kompangu yopamdeelela.

MEtitano, Lameck nayakwayo mbaka yaali oya pewa uuthemba wokwiindila kompangu yopombandeelela kombinga yetokolo lya gandjelwe komupanguli Cheda moshipotha shawo mompangu yopombanda.

MuJune omumvo gwa yi, omupanguli Cheda okwa gandjele etokolo moshipotha shaafeekelwa mbaka yatatu konima sho a pulakene koombangi omilongombali. Lameck, Mokaxwa naYang kaya li ya nyanyukilwa etokolo lye, taya ti oye mwi ikwata, noya pula opo i ikuthe mo moshipotha shawo.

MuNovemba, Chenda okwe ekelehi eindilo lyawo. Etokolo lyomEtitano olye ya pe uuthemba opo ya kondjithe etokolo lyaCheda lyokweekelahi eindilo lyawo opo i ikuthe mo moshipotha shawo, moka ya li wo ya pula opo oshipotha shawo shi tamukulule ko, tashi tamukululwa komupanguli gulwe.

Cheda, mEtitano okwa ti oku uvithwa ko kompangu yopombandambanda kutya ompangu ndjoka (yopombandeelela) oyo nayi tokole ngele okwa longo tuu shu uka sho e ekelehi eindilo lyaambaka yatatu lyokwiikutha mo moshipotha.

Okwa ti oshipotha shika ta konaakona osha simana koshigwana noka shi shi oshipu, wo uuthemba waafeekelwa, mboka yaa na ondjo sigo oompaka, molwaashoka ina ya monika manga ondjo kompangu owu li pokati kamuhaka namuhaka.

Okwa gwedha po kutya nonando ka li a tsu kumwe nomadhiladhilo gawo, okwa li a kutha etokolo ndyoka a gandjele muJuni shi ikwatelela komatompelo gaa mbaka yatatu.

MuJuni, omupanguli Cheda okwa li e ekelehi omathaneko gaakalelipo yaafeekelwa opo ompangu kayi longithe uuyelele womayalulo gokombaanga ga gandjelwe kompangu kokakomisi kokulwitha iimbuluma.

Aafekelwa oya li ya holola kutya Cheda okwa li ta longitha uuyelele hawo e na okulongitha metamaneko, ta longitha uuyelele wekwatopo peha lyokulongitha mboka womuntu i ithanwa kompangu.

Lameck (54), Mokaxwa (36) naYanga (44) otaya tamanekelwa iipotha yekengelelo, moka mwa kwatelwa elando lyomashina gopaunongononi gokukonaakona goomiliyona US$55,3, dha li dhi thike poomiliyona N$477 kuuministeli wiimaliwa, kehangano lyokoChaina lyoNuctech, petameko lyo2009.

Otaku fekelwa kutya ondando yomashina ngaka oya londekwa owina opo ehangano lyaLameck naMokaxwa lyoTeko Trading li likole ko oomiliyona N$12,8 nonando inali dhana mo onkandangala yasha melando ndika.

Lameck naMokaxwa otaya fekelwa ya yuga ehangano lyoobesa dhoSwapo sho anuwa ya gwedhela oondando dhoobesa nomaloli ngoka ga landelwe koChina petameko lyo2007.

Lameck okwa li oshilyowiliki shehangano ndyoka, omanga Mokaxwa a li omuniilonga mehangano olyo tuu ndyoka.

Patamaneko, Lameck ina pewa epitikilo komupresidente opo a longe iilonga yilwe yi na ondjambi ponto yaambyoka yepangelo, nokwa taaguluka ngeyi oveta yokakomisi kokulwitha iimbuluma.

Aafeekelwa ayehe yatatu oya ti kaye na ondjo miipotha mbika noye li kondje yodholongo molwaashoka oyi ifutila mo, niihokolola yawo otayi ka pulakenwa mu6 Novomba.

Mbaka oya kalelwa po kuRaymond Healthcote naGerson Hinda, taya kwathelwa kuGerson Narib naSisa Namandje, omanga Jack Eixab Shakwa ta tamaneke.