SWANU a ninga oshigongi mOshakati

ONGUNDU yopolotika yoSwanu mEtitatu lyoshiwike shika oya ninga oshigongi shawo mOshakati moka sha popitha iilyo naayambidhidhi yayo, sha ningilwa muKandjengedi mOshakati moshitopolwa shaShana noya dhiki wo epulakata hoka kwa shangwa edhina lyayo nelalakano lyokwiitseyitha koshigwana kutya oyo ongundu yotango yopolotika notayi tsikile nokuyakula oshigwana papolotika nopamona lyoshilongo, unene tuu tayi kambadhala okukutha oshigwana shaNamibia moluhepo moka shi li mo.

Oshigongi shika osha popithwa kuhamushangandjayi gwoSwanu tate Tangeni Iiyambo ngoka a li e ende pamwe nahamushanga gwoSwanu gwiinima yopondje tate Uateza Kazapua nosho wo omuunganeki gwoSwanu mOnooli tate Amuthenu Kambonde.

Iiyambo ta lombwele aanashigongi she kutya Swanu oku na omaipulo omanene kombinga yoluhepo olunene ndoka lu li mokati kAanamibia oyendji nosho wo omwaka omunene ngoka gwe ya moNamibia pokati kaayamba naathigona. Iiyambo ti indile koshigwana shaNamibia kutya oshinima shika osha nika oshiponga noshi na okukundathanwa nokukandulwa po meendelelo ngaashi tashi vulika. “Oluhepo lwopaukwaalukehe moNamibia oshinima she eta omaipulo omanene mokati komafamilia nomokati koshigwana ashihe. Unene oSwanu otayi ipula unene kombinga yoluhepo mokati kaanona moshilongo. Oofamili dha kalelwa kaanona yawo kaa ye nasha, shoka shi li oshiimbi oshinene kuyo okuninga omagumbo, oshoka kaye na sho taye ga ningi nasho. Omapekapeko oge she eta puuyelele kutya aanona/aagundjuka mboka ye li taya thithi omagumbo nenge uufleta kuyoyene, ohaya kala ye li monkalo yuundjolowele yi li hwepo shi vulithe mboka kaa ye na omahala ga longekidhwa gokukala mo. MoNamibia, moka mu na onkalo kayi na omagumbo, nenge ngoka ge li po itaga vulika okufutwa koyendji yomaagundjuka, oshe eta uupyakadhi uunene kaavali/ kaakuluntu, ye li naanona yawo momagumbo nonando oya koka taya vulu okukala nomagumbo gawo, molwashoka onkalo yokukala nomagumbo itaye yi vulu, kaye na iilonga noshimaliwa shokuvula okufuta omagumbo ya kale mo,” tate Iiyambo a ti ngawo nokutsikila ko tati yo moSwanu oye na po edhiladhilo ndika, unene taye li tula miilonga ngele oya hogololwa nokuya koshipundi shepangelo. Omathaneko nee ge niwe po koSwanu, ongashi kutya pu totwe okomisi ya kola yegameno lyaanona, etopolululo lyeliko, shi ikwatelela koompumbwe dhopetameko, ngashi omeya, iikulya, olusheno, uuhaku nomagumbo. Kutya ku tulwe melandulathano egandjo lyevi nelalakano lyokutunga omalukalwa pamalukanda. Kutya Namibia okwa pumbwa ombepo yokukwathelathana nokugandja ngele otwa hala shili oshilongo noshigwana shi ze mo muuthigona. Swanu okwa hala kehe omuntu a kale ha pewa omwaalu gwoshimaliwa shontumba, kutya nee oha longo nenge ka longa opo Aanamibia ayehe ya kale ye na okamaliwa kasha kokwiikwathela moompumbwe dhopetameko. Evi li konakonwe nawa kutya oli thike peni, nokupewe omahala mboka kaye na omahala, unene tuu kwaamboka aathigona. Kutya mboka yeb wetike kutya aathigonathigona ya kale taya pewa ekwatho lyopashimaliwa palandulathano lya uthwa po. “ Namibia oshilongo oshiyamba moka omukalimo kehe ta vuklu okutyapula uuyamba wa Namibia mbuka. Inashi pumbiwa nande omuntu a kalale nondjala molwashoka ke na sha shokulya nenge a kale ke na egumbo . Oshi li tashi sitha ohone sho tu na Aanamibia oyendji kaye na sho taa li nenge kaye na omagumbo, omanga oshilongo shi na uuyamba uunene,wa gwanena kehe gumwe. Oshilongo shi ana aagundjuka ya gwana okuninga omagumbo gawo, ihe itaya vulu oshoka kaye na iilonga noshimaliwaq shokuninga omagumbo gawo. Epangelo ndyoka li li koshipundi olya nyengwa, onkee nali ze ko ku ye ndyoka tali vulu okutopola nawa eliko lyoshilongo mokati koshigwana,” Iiyambo a ti ngawo nokutsikia ko ta ti oluhepo, uuhaku nelongo kayi li nawa, elongithonayi lyiimaliwa, uulingilingi naantu kaye li nawa ye li pomahala omawanawa giilonga, oyo naanaa tayi shunitha ehumokomeho lyaNamibia monima. Iiyambo ti indile koshigwana shaNamibia shi hogolole omupresidende gwaSwanu tate Usutuaije Maamberua a ninge omupresidende gwoshilongo momahogololo tage ya nosho wo ya hogolele ongundu yoSwanu oyo yi ye koshipundi, oshoka otayi ka ningila oshigwana uuwanawa wa tumbulwa metetekelo.