ELENGA enene lyoshigwana shaaHerero, Kuaima Riruako okwa kundanekwa a fumvikwa kengathithi pOkahandja mOsoondaha yehuliloshiwike twa zi.
Yamwe po yomwaamboka yi ile okugandja esimaneko lyawo lyahugunina kelenga enene lyaaHerero, Riruako oya zile koUnited States (US) osho wo nokOndowishi.
Elenga Riruako, okwa thigile po uuyuni mbuka omasiku sho ga li 2 Juni moshipangelo shaKatoolika kaRoma mOvenduka nokwa fumvikwa nee pomawendo gomapendafule goshigwana shoka shaaHerero mpoka pwa fumvikwa aaleli yalwe yomoshigwana shoka shaaHerero ngaashi Clemens Kapuuo nelenga Hosea Kutako, mboka ya kondja lela pethimbo ndiyaka lyuukoloni.
Poshituthifumviko opwa li omupresidende Hifikepunye Pohamba namee Penehupifo Pohamba, oministeli onkuluntu, Hage Geingob, aanambelewa mepangelo, aanapolotika naakalelipo yomalelo gopamithigululwakalo gi ili nogi ili.
Moshipopiwa she shoka sha leshwa komuprimaminista, Hage Geingob, omupresidende Pohamba okwa ti elenga Riruako olya li li itumba nezepo lye kali shi owala ekanitho kofamili ye, nokoshigwana shaaHerero, nokoNudo ihe ekanitho lela kuNamibia alihe.
Omupresidende Pohamba okwa ti elenga lyaaHerero, Kuaima Riruako itali dhimbiwa molwonkandangala ndjoka a dhana pokati kushoka sha kala pokati kaNamibia naNdowishi nosho nee shoka shokweeta ko omakolotse kOndowishi hoka.
Omuleli gwoRepublican Party yaNamibia, Henk Mudge okwa ti elenga Riruako otali kala nokuyuulukiwa moparlemende.
Omuwiliki gwoRepublican Party, Henk Mudge okwe shi yelitha wo nawa kutya elenga Clemens Kapuuo, elenga Kuaima Riruako nenge omuleli Dirk Mudge nenge omuleli gulwe po a kala ta wilike o-DTA inaya kala nokulongela kumwe nepangelo lyokatongotongo lyaSouth Africa.
Omusamane Zed Ngavirue naye okwa tanga nakusa Kuaima Riruako nokwa ti ishewe okuyele natango okutseyitha ngoka ta pingene po nakusa Kuaima Riruako nokwa ti shoka otashi ka ningwa pawiliko lyuuministeli womalelo gopaitopolwa.
Omupevikomishina gwopolisi moshitopolwa shOtjozondjupa, Gerhard Mavenjono okwa ti koshituthifumviko hoka okwa li kwa tumwa aapolisi ye li ethele limwe ya za miitopolwa shaKhomas nomwaashoka shOtjozondjupa.
Nakusa Kuaima Riruako okwa thiga ko omukulukadhi gwe naanona ye li omulongo nayahamano.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
