OMUPRESIDENDE gwaZibwabwe Robert Mugabe okwa kundanekwa a ti okukalamwenyo kwe oku li momake gomushiti ihe ina komenda ko sha kuukolele moka e li sha landula komauvauvila kutya ote ehama.
Mugabe ngoka a wilika oshilongo shoka sha nkene ngaa sha mangulukile muukolono waBritain momumvo 1980 okwa tegelelwa a ka kale a gwanitha oomvula dhi li 90 muule womwedhi, uukolele we owa ninga owo oonkundathana dhaaZibwabwe mboka ye li oobiliona 13 nongundu yawo wo yopolitika yoZanu-PF. “Kandi shi kutya pakukalamwenyo onda thiki ko ngiini huka”, Mugabe a tumbula ndhoka pefumviko lyokamwayinakadhona ke Bridget, ndyoka lya ningililwe komukunda gwedhina Zvimba, gu li ookilometa 90 kUuninginino woshilandopangelo Harare shaZibwabwe.
“Ayihe oyi li momake gaKalunga”, Mugabe odho a lombwelele engathithi lyaanadiplomate yaaAfrica naamboka yokiilongo yokUuninginino. Okwa kundanekwa Robert Mugabe a kala nokunongona nokuyola nomukulukadhi gwe Grace ihe na tya ko sha kuukolele we moshipopiwa she oshile shoka a ningile pefumviko lyomumwayinakadhona nee hoka. Ngoka e li ngashingeyi omuleli omukuluntu okwa kundanekwa a kala noku ya koSingapore ihe aakwatheli ye inaya zimina oolopota ndhoka kutya ohaka pewa eyakulo lyopaunamiti lyokankela yoProstate. Omauvauvila okwa kundanekwa nee ga kala moHarare moka muule wiiwike iyali ya piti noyamwe oya kala taya ti ote ehama omanga yalwe ya kala tayi pula kutya okwa mana oondjenda dhe kevi ndika. Pefumviko nee lyomumwayinakadhona gwe mpoka, Mugabe okwa kundanekwa a li e shi pondola okugandja oshipopiwa she nokwa ningile omategu (omashendjo0 kutya ye sigo onena oha mete oshinano moomaila haangashi aaZibwabwe oyendji mboka haya mete mookilometa. Okwa tile sha kombinga yaaleli yopapolitika yaBritain mboka a ti okwi itaala oya li taya yambidhidha ongundu yompilameno momahogololo ngoka ga li 31 Juli ngoka a sindanene po nonando nee ompilameno ya kala tayi ti opwa longithwa uukengeleledhi. AaBritish sigo onena kaye shi kutya oya dhengelwe koshike momasiku 31 Juli”, Mugabe a ti ngaaka pakwatathano nomahogololo nee ngoka opo a sindanene.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
