Ben Ulenga a hupu moshiponga shoshihauto

OMUPRESIDENDE gwongundu yopolitika yedhina Congress of Democrats (COD) okwa kundanekwa a hupu moshipango shoshihauto Osoondaha ongulonene konima sho etukutuku lye lyi idhengele mumwe neloli.

Uuyelele okuza kuMoses Khairabeb gwopolisi yoshitopolwa shOtjozondjupa owu ulike kutya oshiponga shoka osha ningwa pombali yokoongula dhOsoondaha.

Khairabeb okwa lombwele Nampa kutya oshihauto shoJeep Cherokee moka Ulenga a li osha li tashi zi kOtjiwarongo shu uka kOkahandja sho nee oshiponga shoka sha li sha ningwa. Amushangandjayi gwongundu ndjoka yoCongress of Democrats Tsudao Gurirab okwa koleke kutya Ulenga okwa li moshiponga na ye kwali ta hingi yemwene ashike okwa ti ita vulu we okugandja uuyelele wa gwedhwa po wu vulithe mpoka.

Khairabeb okwa ti Ulenga ina adhika po sho opolisi ye ke ya po na ina patulila oshipotha kopolisi.

Nampa okwa kundaneke kutya Ulenga oye a ka lopota oshiponga shoka kopolisi noku ka konga wo ekwatho noshihauto she osha hilwa po. “Sho ngaa kwali ku na ookilometa 60 okuza kOtjiwarongo oku ya mOkahandja okwa li eloli lya thikamekwa kombaana yokolumoho konima sho egulu lyokolulyo lyokomeho lya li lya topa noJeep Cherokee moka mwa li nee Ulenga ndjoka ya li tayi ziilile kOtjiwarongo oye ya nokwi ipuma nee moka.

Okwa kundanekwa ngaa omuhingi gweloli ndika a li a ninga ngaa onkambadhala oku ulikila aalongithi yopate ooyakwawo kutya komeho oku na oshiponga molwokugulu hoka kwa topa ashike sho aanambelewa yopolisi ye na sha noondjila oya adha endhindhiliko ndyoka omuhingi gwololi a li ta longitha lya tatulwapo.

Oonkambadhala okukwatathana nomusimanekwa Ben Ulenga paselefona ye inadhe e ta sha molwashoka anuwa okwa fa a ya pondje yoshilongo netukutuku lye lyoJeep Cherokee okwa kundanekwa li li kOtjiwarongo.