‘Aafekelwa’ mboka ya dhipagwa oya li noombele osho wo oondjembo – opolisi

Oondjembo mbali, oombele niilongitho yokuteya omagumbo okwa li ya adhika moshihauto shaafekelwa yatano mboka taku hokololwa ya yahwa nokudhipagwa kaapolisi ongulohi yEtiyali lyoshiwike sha zi ko mOkahandja.

Momukanda gwolopota kombinga yaafekelwa mboka yeyugo, omupevindjayi gwetanga lyopolisi miipambele yiikonga yopolisi, Elias Mutota okwa popi kutya aapolisi mboka ya yaha nokudhipaga aagundjuka mboka oya patululilwa oshipotha shedhipago.

Omanga omufekelwa omutihamano ngoka a fadhukapo, okwa patululilwa oshipotha shonkambadhala yedhipago neyonagulo lyomaliko.

Olopota kombinga yedhipago lyaafekelwa mboka oya pitithwa kuMutota pwa pita hambala oshiwike, nomadhina goonakusa kutya oyo Abed ‘Koppe’ Andreas, Flavianus Kaluwapa Endjala, ngoka a tseyika nawa nedhina ‘Karlu’, Marius ‘Jackie’ Iipinge, Malakia Iiyambo Kotokeni, ngoka a tseyika nawa nedhina ‘Brown’, osho wo Erick ‘Akawa’ Martin.

Mutota okwa popi kutya aalumentu mboka okwa li ya tulwa miipandeko monakuziwa nokwa li ya mangululwa mo mondjeedhililo koboloha taya tamanekelwa iipotha 24, ya kwatela mo okuyaka kwa homatiwa, okuteya omagumbo nokuyaka, onkambadhala yedhipago, okwa adhika noondjembo kaaye na omikanda, okulongitha oondjembo shaali paveta, elongitho lyoonomola dhiifundja dhokiihauto osho wo okwiiyaka mondholongo (ano momake gopolisi).

Pauyelele wolopota ya pitithwa kuMutota, opolisi okwa li ya yakula uuyelele kombinga yeyugo kwa komatiwa ndyoka “kwa li tali ka ningwa kookalyamupombo ya nika oshiponga kofaalama yontumba yi li moshitopolwa shaKahandja,” ashike edhiladhilo lyokuyuga ofaalama ndyoka okwa li lya lundulilwa koku ka yuga ehala lyokundombola mOkahandja.

Uuyelele mboka, owe eta opolisi oyi landule aafekelwa mboka okuza pomboloka yopolisi yopokati kaKahandja naVenduka ya thinda kOkahandja, naafekelwa anuwa okwa li ya fadhukapo sho ya dhimbulula kutya oya lambwa kopolisi.

Mutota okwa popi kutya lwanima aafekelwa mboka oya ka monika pehala lyokundombola omashina popepi noombelewa dhamuni gwaKahandja, “nokuza mpoka oya landulwa momudhingoloko gwondolopa yaKahandja”.

Okwa gwedha po tati: “Pethimbo ndyoka aafekelwa otaku hokololwa yu umbu oshihauto shopolisi shoka kwa li sheya landula, naashoka osha hwahwameke oku umbathana ku tukuke pokati kawo nopolisi. Manga oshihauto shawo [shaafekelwa] inaashi thikama, aapolisi otaku hokololwa ya mono omufekelwa gumwe a nuka mo moshihauto shawo nokwa tondokele momulamba gu li popepi. Oshihauto osha ka thikama mondjila ndjoka yu uka kolukanda lwaNau-Aib olwaamba nositola yoombilitongo, mpoka opo nee opolisi ya nongele kutya moshihauto omuna aafekelwa yatano noya yahwa pethimbo lyokuumbathana.”

Sho moshihauto shaafekelwa mboka mwa hadhwa, omwa adhika iilongitho yokuteya omagumbo, oombele osho wo oondjembo mbali, osho Mutota a popi ngaaka.

Okwa popi kutya oshihauto shopolisi osha yahwa pethimbo lyokuumbathana, naapolisi yatatu mboka kwa li oyo taya umbathana naafekelwa inaya ehemakelwa mo.

Nonande omakonakono gomidhimba dhoonakusa mboka yatano oga manithwa, onkene taku ningwa omakonakono ga gwedhwa po kombinga yiihauto, oongodhi dhopeke osho wo oondjembo ndhoka dha longithwa opamwe wo niinima yilwe mbyoka ya adhika moshihauto, osho Mutota popi ngaaka.

“Omupya omunene oongoka kutya opo ashike ku yandwe okukala inaaku longithwa uuyelele wothaathaana
omakonakono ngoka itaga vulu okweendelelwa. Onkene, otatu indile oshigwana shi tu pe ompito yokutsikila nomakonakono, inaaga yiwa moshipala,” osho a popi ngaaka.

Okwa gwedha po kutya omufekelwa ngoka inaa dhimbululwa nokwa li a nuka mo mosheenditho tashi ende nokufadhukapo onkene ta kongwa kopolisi.