‘Omuprofeti’ ta fekelwa uukengeleledhi onkene e li mongali

Omulumentu ngoka hi ithana kutya omumbisofi nokuna egongalo tali ithanwa Jerusalem Ministry of God of all Nations moRundu, Jafet Johannes, ngoka ta tamanekelwa uukengeleledhi woshimaliwa, okwa kalekwa mondjeedhililo sha landula sho epangelo lya tindi a pewe oboloha.

Johannes okwa holoka mOmpangu yaMangestrata gwaRundu, mEtine lwoshikando oshitiyali, sha landula sho a tulw amiipandeko momasiku 26 Apilili numvo.

Otaku hokololwa kutya Johannes okwa patululilwa oshipotha sho a kengelele aantu oyendji, mwa kwatelwa Renilde Kudumo ngoka kwa li i itayelithwa kuye opo a gandje oshimaliwa shooN$289 000 shi tulwe mongeshefa yokomalungula yokwiindjipaleka anuwa oshimaliwa yedhina Trongrace.

Pethimbo a holoka lwotango mompangu, omasiku ga zi ko, epangelo okwa li lya tindi opo a pewe oboloha omolwuunene woshipotha a taalela, nolya popi wo kutya itashi kala muuwanawa woshigwana ngele okwa mangululwa.

Epangelo olya popi kutya onkene kwa tegelelwa Johannes a patululilwe iipotha ya gwedhwa po kaantu yalwe mboka a kengelela.
Epangelo olya gwedha po wo kutya oli na uumbanda kutya omufekelwa otashi vulika i idhope maagandji yuumbangi ngele okwa mangululwa.

Oshipotha she oshu undulilwa komasiku 29 Mei.

Hahende Samson Enkali gwehangano lyoohahende lyedhina Kadhila Amoomo Legal Practitioners oye kwa li a kalela po omufekelwa ngoka.

“Epangelo onkene tali tindi okugandja oboloha, notatu ka galuka nokugandja ehokololo lyetu kombinga yegandjo lyoboloha komuyakulwa gwetu,” osho Enkali a popi ngaaka konima yiihokolola yomompangu, mEtine.

Pokati mpoka, ongundu yaantu oyendji okwa li ya holoka kompangu esiku ndyoka ye li ompinge negandjo lyoboloha kuJohannes.

“Onda hala iimaliwa yandje, mbudhi gweye. Ngoye omukengeleledhi, ishewe omusita gwiifundja,” osho limwe lyomomapulakata ngoka kwa li ga humbatwa kaakwashigwana, lya shangwa ngaaka.

“JJ, galula iimaliwa yetu. Mukalekeni mondholongo sigo a galula iimaliwa yetu,” osho lilwe lya shangwa ngaaka.

MuJanuali, onzonkundaneki ndjika okwa li ya kundaneke kutya Johannes okwa landulwa kaantu oyendji mboka taya popi kutya oya kongelelwa kuye iimaliwa yawo omathele okupitila mongeshefa ndjoka yedhina Trongrace.

Gumwe gwomwaamboka ya kengelelwa, Helena Jacob, okwa popi kutya okwa li a gandja oshimaliwa shooN$10 000 mongeshefa ndjoka ya kwatelwa komeho kuJohannes, nelalakano a ka mone mo oshimaliwa oshindji.

Otaku hokololwa kutya oshimaliwa shi li poomiliyona N$14 shoka kwa li sha tulwa kaakwashigwana mongeshefa yoTrongrace okwa li sha kana.

Jacob okwa popi kutya okwa li a lombwelwa kuJohannes kutya konima yoomwedhi hamano oshimaliwa she otashi ka kala sha tana lela noondjele yoopelesenda 300, nongele okwa kwathele mokwe eta mo ookastoma mongeshefa ndjoka yoTrongrace anuwa ota ka gwedhelwa ko olupandu lwoopelesenda 20.

Otaku hokololwa kutya gumwe gwomookastoma ndhoka Jacob a li a kongele Johannes opo dhi waimine mongeshefa yoTrangrace okwa li a gandja nokutula mo oshimaliwa shooN$40 000, naashoka okwa li e shi ningi molwashoka okwa li e na omukuli palwe nokwa li nee a hala okumona oshimaliwa oshindji okuza moTrongrace opo a vule oku ka shunitha oondjo ndhoka e na.

MuJanuali Johannes okwa lombwele onzonkundaneki ndjika kutya ye ke na oondjo dhomuntu molwashoka kali nande a thiminike omuntu a waimine ongeshefa ndjoka yokwiindjipaleka oshimaliwa.

‘Omuprofeti’ ngoka okwa popi kutya okwa li a tameke okungeshefa eindjipalo lyoshimaliwa komalungula okupitila koTrongrace muSeptemba 2021 pethimbo a li koMalawi.

Okwa popi kutya aantu mboka ye li kongeshefa ndjoka yokwiindjipaleka oshimaliwa komalungula, Aauropa nokwa li ye mu longo nkene e na okwiindjipaleka oshimaliwa she uuna e shi tula mo.

Johannes okwa gwedha po kutya okuza sho a lombwelwa ngaaka okwa waimine okungeshefa kongesgefa ndjoka yokwiindjipaleka oshimaliwa nokwa ningi nokuli omunamiliyona muule ashike womvula ndjoka.

Sha landula oongeshefa dha yooloka tadhi popiwa dhokwiindjipaleka iimaliwa komalungula, ombaangawiliki moshilongo (Bank of Namibia) oya londodha aantu ya yande okuwaimina oongeshefa dholudhi ndoka, ndhoka inaadhi pewa nokuli omukanda gwopambelewa gwokungeshefa pamukalo ngoka notadhi uvanekele aantu oshimaliwa sha kola uuna we dhi waimine.

Oya londodha wo mboka taya longitha okutuminatha pamalungula iimaliwa, taya longitha uuyelele tawu zi kiikundaneki yopankalathano.

Bank of Namibia okwa popi kutya osha nika oshiponga okuwaimina oongeshefa ndhoka tadhi yelithile noku uvanekela aantu kutya iimaliwa yawo otayi tana uuna ya kutu aantu ye dhi waimine.

Aakwashigwana oya londodhwa wo natango kutya oongeshefa dhopamalungula ndhoka hadhi pula ofuto yoshimaliwa opo dhi waiminwe, odha nika oshiponga.