Iihokolola yaafekelwa omolwekanka lyokwaana iilonga yi li ko muAuguste

Iihokolola yaafekelwa yatatu mboka ya tulwa miipandeko oomwedhi mbali dha piti, mekwatathano nekanka lyi li ompinge nonkalo yokwaana iilonga moshilongo, otayi ka tameka mompangu yamangestrata gwaVenduka moKatutura, muAuguste.

Aafekelwa yatatu, oshilyo shongundu yoPopular Democratic Movement megumbo lyopashigwana Inna Hengari, oshilyo shongundu yoNamibia Economic Freedom Fighters (NEFF) Michael Amushelelo osho wo omunandjungu Dimbulukeni Nauyoma oya holoka uunambo mompangu komeho ga mangestrata Linus Samunzala noya lombwelwa kutya iihokolola yomatamaneko gawo otayi tameke momasiku 25 Auguste.

Hengari, Nauyoma naAmushelelo oya tulwa miipandeko momasiku 21 Maalitsa sho taku hokololwa ya kwatele komeho ehololomadhiladhilo kombinga yokwaana iilonga moNamibia, nonande okwa li ya tseyithilwa kopolisi opo ya konge esiku lilwe moka taya ka ninga ehololomadhiladhilo ndyoka.

Oya taalela iipotha ya kwatela mo okuhwahwameka omalugodhi mokati koshigwana, okwe eta olugodhi moshigwana osho wo eyono lyomaliko.

Pethimbo ya holoka mompangu uunambo, hahende Kadhila Amoomo, ngoka a kalela po Nauyoma naAmushelelo, okwa tseyithile ompangu kutya Amushelelo okwiitulilwa mondholongo [mondunda oye awike], naashoka otashi mu gumu pamadhiladhilo osho wo ompito ye yokugandja omalombwelo koohahende ye.

Amoomo okwa gwedha po kutya ota ka pula elelo lyondholongo li mu kuthe mo mondjeedhililo moka i ikalekelwa.

Hengari okwa li a mangululwa mo mongali konima yomasiku gatatu sho ya tulwa miipandeko, sho a pewa oboloha yooN$5 000.

Konima sho a kala iiwike iyali mondjeedhililo, Nauyoma naye okwa pewa oboloha yooN$5 000, momasiku 3 Apilili.

Ashike nando ongaaka, Amushelelo, okwa tindilwa ompito yokwiifutila mo sho a holoka momasiku 20 Apilili ta kondjitha okupewa oboloha.

Pethimbo lyiihokolola mbyoka yonkambadhala yokupewa oboloha, Amushelelo ina holoka komeho gompangu a gandje eipopilo lye yemwene, ashike okupitila momukanda gweipopilo gwa pewa ompangu, okwa popi kutya ye opamwe naNauyoma okwa li owala taya thindikile ongundu yaahololimadhiladhilo ndjoka kwa li yu uka komagumbo, noyi iyadha taya tulwa miipandeko kopolisi.

Momukanda ngoka Amushelelo okwa popi kutya etulo miipandeko lye kali li paveta, nokuwete aluhe ha kala owala a ninga oshihakanwa shopolisi ongiikonene okupitila meipopilo lyopolisi kutya ita landula ooveta nomilandu.

Hahende Amoomo okwa popio kutya nonande epangelo onkene tali tindi okupa Amushelelo oboloha, otaya tsikile nokukondjitha opo a mangululwe mo mondjeedhililo sho taya ka yapukila Ompangu yoPombanda muJuni.

OKWIIKALEKELWA MONDHOLONGO

Hahende okwa popi kutya Amushelelo okwi ikalekelwa mondholongo molwashoka anuwa okuniwe uumbanda kutya ngele okwa tulwa mumwe naamboka ye li mondholongo, ote ke ya kwata ko papolitika.
Pokati mpoka, ongundu yoNEFF oya kondema oshikondo shondholongo yezulonkalo sho taku hokololwa shi ikalekela Amushelelo mondholongo.
Okupitila momukanda gwiikundaneki, ngoka gwa pitithwa mOmaandaha, oNEFF oya popi kutya etokolo ndyoka lya ningwa okutula Amushelelo meikalekelo otali limbilike noyi indile a mangululwe mo.

“Otashi uvitha nayi noonkondo okutala omilandu ndhoka dha tulilwa po omuntu ngoka ‘oshimbuluma’ a longo, okukala owala u unganeka ehololomadhiladhilo lyokwaana iilonga,” osho omukanda gwa popi ngaaka.

NEFF okwi indile epangelo li ninge omakonakono gomuule kaage na olugamambinga kombinga yoshikumungu sha Amushelelo ngoka a kalekwa mondjeedhililo ethimbo nuule, osho wo ku taliwe kombinga yetokolo lyokukala ye mwiikalekela mondholongo.

“Otashi ehameke okutala aanandjungu ya tulwa miipandeko nokweedhililwa sho taya kondjitha elunduluko lyopankalathano omanga pu na aantu mboka ya longa iilonga yi ngulutila, ngaashi omadhipago nomakwatonkonga, taya pashiyona ashike momapandaanda ya manguluka,” osho NEFF a popi ngaaka.