Ngoka a li omuyulihi i ikutha omwenyo mOhangwena

Ngoka a li omuyulihi, nokwa li oshitopolwa shongundu yaamboka kwa li haya longele mombautu yedhina Heinaste ndjoka ya li yehangano lyokoIceland lyedhina Samherji, otaku hokololwa i ikutha omwenyo momasiku 9 Juli.

Samherji, ehangano ndyoka kwa li lya futu oombumbo kaanambelewa yomoshikondo shoohi opamwe noominista shoka ngashingeyi tashi ithanwa Fishrot.

Noa Kandeu Nghidimbwa (31), pauyelele wolopota yopolisi, okwi itsiwika megumbo lyaandjawo komukunda Olyamunyandi moshitopolwa shaHangwena.

Kapu na ngoka ta pelwombedhi oshiningwanima shoka, nomakonakono gopolisi otaga pula komeho.

Nghidimbwa okuli oshitopolwa shongundu yaayulihi mboka kwa li ya kanitha iilonga sho ya lalekwa mo miilonga mo2019, konima owala yiiwike iishona manga onkundana yoFishrot inaayi etwa puuyelele. Ombauto ndjoka yedhina Heinaste lwanima oya kwatwa po mekwatathano noFishrot naayulihi mboka ya li mo oya tumwa komagumbo nokupewa kehe gumwe a pewa ooN$2 000.

Mo2020, Nghidhimbwa okwa ningi oshitopolwa shongundu ndjoka ya tameke okufutwa okashona kooN$4 000 komwedhi okupitila mopolohalama yepangelo yokukwathela aaniilonga yaayulihi mboka kwa li ya kanitha iilonga.

Pauyelele wa zi kumumwayinagona gwa nakusa, John Mweendobe, okwa hokolola kutya Nghidimbwa konooli okwa yi ko oomvula mbali dha piti sho mono kutya onkalo yopamahupilo otayi kanda omapunya okukala mOmbaye omange keena iilonga.

“Okukala ta hupile mooN$4 000 komwedhi uule woomvul ndatu oshinima osha li oshidhigu kuye molwashoka inashi eta po elunduluko lya sha monkalamwenyo ye. Okwa kala ta kongo iilonga ashike ineyi mona, sho osho nee she mu thiminike a ye kegumbo komukunda. Katushi kutya oshike a kala ta dhiladhila, ngaashi naanaa hakutiwa “omwenyo gwamukweni oshilongo shi ili,” osho Mweendobe a popi ngaaka.

Nghidimbwa okwa thigi ko omwana gumwe.

Ngoka a li omuniilonga pamwe naNghidimbwa, Immanuel Ipinge okwa popi kutya oku na uumbanda opo ooyakwawo mboka kwa li ya kanitha iilonga nayo yi ikuthe oomwenyo molwashoka oye li momapandaanda taya kongo iilonga ashike kaye yi wete.

“Aayulihi otaya dhengwa komadhiladhilo noonkondo. Okuya kegumbo hasho nokuli tashi tompola po sha, molwashoka otwa pumbwa tu kale tatu longo opo shi tukaleke twi ipyakidhila. Otwa pandula kokashona hoka hatu pewa komwedhi, ashike oshimaliwa shoka itashi eta po elunduluko lya sha monkalo yethimbo lyopaife ngele omuntu owa kala owala wu li megumbo,” osho a popi ngaaka.

Omumvo gwa zi ko, uuministili wOohi nOonzo dhomEfuta owa ningi onkambadhala yokukandulapo uupyakadhi wokwaana iilonga wa taalelwa kaayulihi sho wa popi kutya otawu moonkundathana nomahangano gokuyula oohi opo ga pewe ootona dhoohi dha gwedhwa po opo ya kuthe po aayulihi ya konda po600 mOmbaye opo ya monenwe iilonga tayi kalelele, okupitila momulandu gwopolohalama yepangelo yokukandulapo omukundu ngoka.

Opolohalama ndjoka otayi lalakanene okugandja iilonga tayi kalelele noondjambi dha kola kaayuli yoohi mboka ya gumwa.

OMAIKUTHO GOMWENYO MOHANGWENA

Oshiwike sha zi ko moshitopolwa shaHangwena omwa ndhindhilikwa oonkundana mbali dhomaikutho gomwenyo.

MEtiyali, Martina Tangeni Eelu (54), omukalimo gwomomukunda Onamugolo moshikandjohogololo shEenhana, otaku hokololwa i ikutha omwenyo, omanga mEtitatu, Pengevali Haiyaka (42) naye otaku hokololwa i ikutha omwenyo momukunda Okongo moshikandjohogololo shaKongo.

Opolisi yoshitopolwa shaHangwena natango otayi ningi omakonakono kombinga yeso lyaMalakia Heita Hamutenya (35), omukalimo gwomomukunda Onekwaya East moshikandjohogololo shaHangwena.

Pauyelele wa zi kuinspekta omukuluntu Victor Haludilu, Hamutenya okwa li a monika lwa hugunina ta nu omalovu puundingosho wu li popepi ongulohi yOmaandaha ga zi ko.

Hamutenya otaku hokololwa a li kohi yondhungo noonkondo sho a zi po puundingosho mboka namumwayina gwomushona osho wo ookuume.

Omanga ye li mela lyondjila okuya kegumbo, Hamutenya otaku hokololwa a kala ta punduka nokwi idhenga pevi lwiikando oyindji, shoka she eta e ehamekwa komutse.

“Mumwayina nookuume otaku hokololwa kutya kaya li taya vulu oku mu humbata ye mu thikithe kegumbo, onkene oye mu thigi po a lala mepola. MEtiyali, nakusa okwa adhika ta kondjo nomwenyo gwe kaakwashigwana mboka ya li taya ende po noya tseyithile opolisi. Opolisi oya thiki noye mu adha e li monkalo ombwinayi, lwanima okwa mana oondjenda pehala lyoshiningwanima.

Aanambelewa yuuhaku otaku hokololwa ya adha nale a hulitha sho ya thiki pehala lyoshiningwanima, nomudhimba gwe ogwa falwa kokila opo gu ka mone omakonakono netando,” osho Haludilu a popi ngaaka.