Haulyondjaba a hala ya pewa ombili koshikondo shoondaadhi

Ngoka a li komufala mopolisi, omusamane Elias Haulyondjaba okwa hala oshikondo shopolisi yoondaadhi sha tseyika nawa Namibia Central Intelligence Service (NCIS) shi mu pe ombili, opamwe naangoka a li kolonela metanga lyegameno Kondjeni Haikokola osho wo nakusa Elobby Amundamba.

Haulyondjaba okwa popi kutya ayehe yatatu oya kala taya lundilwa komunambelewa gwoNCIS mombelewa yaNamibia ndjoka yi li mOndjiva moAngola kutya okwa li taya kambadhala okuyuga ko ehala lyokuumbugantu waAngola opo ye li ninge po lya Namibia.

Okwa popi kutya omalundilo ngoka oga ningwa mo2017 konima sho ayehe yatatu kwa li ya yi koAngola muSeptemba 2016 oku ka talela po Vietnam ano ehala ndyoka lya li okamba yetanga lyokakulumbwati oPlan tali adhika muumbugantu waAngola.

MoAngola, Haulyondjaba nookuume ke oya talelepo ombelewa yomukalelipo gwaNamibia moAngola noya tsakanene naangoka a li omukalelipo pethimbo ndyoka Kakena Nangula oku mu tseyithile elalakano lyawo lyokutalela po okamba yawo onkulu yuukwiita. Okwa hokolola kutya okamba ndjoka okwa li ya ponokelwa ketanga lyopolisi yaSouth Africa mo1978, naantu ye li po300, mwa kwatelwa nakomanda gwoPlan, Wilbard Nakada, oya hulithilile mo.

Haulyondjaba okwa popi kutya ehokololo ndyoka taya lundilwa kutya okwa li ya hala okukwata ko oshitopolwa shokuumbugantu waAngola olya thikithwa momakutsi gomupresitente Hage Geingob.

Pethimbo lyoshituthi shedhimbuluko eti-100 lyeso lyomukwaniilwa gwOukwanyama, Mandume yaNdemufayo, shoka sha ningilwe mombala yOukwanyama, mOmhedi, Geingob okwa nyana edhiladhilo ndyoka sho a popi tati: “Kapu na omakankameno ga sha kAanamibia opo ya popye kutya moAngola omu na ehala lyawo. Ngoka e na ondjodhi neitaalo ndyoka neli hulithe po ngashingeyi. Onkene, onda hala oku shi popya niitya yomuthindo kutya Namibia okwa simaneka ehala lyaAngola. Katu na nande elalakano lya sha okugwedhela oongamba dhetu dhiye meni lyaAngola, notwa nyanyukwa okutyapula pamwe ongaantu tuninathaneni ombili nekwatathano lyuushiinda.”

Haulyondjaba okwa popi tati: “Ashike nando ongaaka okwa li twa lombwelwa okuza konzonkundaneki yi shi okwiinekelwa kutya ngame, Elobby Amundamba naKondjeni Haikokola, otse kwa li twa hala okukwata ko oshitopolwa shokuumbugantu waAngola opo tu shi ninge oshitopolwa shaNamibia.”

Okwa popi kutya okwa li wo ya kwatathanwa nayo okuza ketanga lyoondaadhi lyopolisi yaAngola nokuningilwa omapulaapulo kombinga yoshinima shoka.

MuMaalitsa 2017, ayehe yatatu oya shangele ombapila minista gwomakwatathano gopaigwana Netumbo Nandi-Ndaitwah.

Mombapila ndjoka oya popi taya ti: “Okwa li hatu lala inaatu kotha okukondjitha emanguluko lyevi lyoomeme yetu. Oompangela dhetu dholugodhi lwekondjelomanguluko otwe dhi ningi moAngola. Ngashingeyi otashi uvitha nayi oku uva kutya anuwa otwa hala okukwata ko oshitopolwa shoshilongo shoka osho kwa li she tu edhilila ethimbo nuule.”

Haulyondjaba okwa popi kutya elundilo ndyoka olye ya piyaganeka nolya nyateka edhina lyawo.

Amundamba okwa mana oondjenda petameko lyomwedhi nguka nokwa fumvikwa pomawendo gomapendafule mEenhana.

Haulyondjaba okwa popi kutya oshinima shoka oye shi thikitha momakutsi gaangoka a li omukuluntu gwoNCIS, Philemon Malima, nokwe ya lombwele kutya omunambelewakalelipo gwaNamibia mOndjiva okwa gandja uuyelele wa puka.

Malima okwa popi tati: “Uuyelele mboka owa puka. Haulyondjaba, Kondjeni naAmundamba oye li aakondjelikalelipo. Itaya vulu okuninga iinima yoludhi ndoka.” osho a popi ngaaka.