Ookalyamupombo taya kengelele ookastoma dhoFNB okupitila moe-Wallet

Ombaanga yoFirst National Bank (FNB) oya popi kutya uupyakadhi wonkalo tayi indjipala yookastoma tadhi kengelelwa dhi gandje oonomola dhawo dhopa- holamo dhokukutha ko oshimal- iwa ko-eWallet, kawu shi nande uunkundi wombaanga.

Shoka osha landula sho omasiku ga zi ko ookastoma dhoFNB dha zi mokalungu nokunyenyeta komb- inga yiimaliwa yawo mbyoka ya li ko-eWallet, ya kuthwa ko ku- walyewo.

Ookastoma dha yooloka odha yi kiikundaneki yopankalathano komalungula tadhi holola okwaau- vanawa kombinga yomulandu gwoFNB gwokugamenena po ii- maliwa yookastoma mbyoka taya tuminwa okupitila ko-eWallet.

Omulandu ngoka gwo-eWallet gwombaanga yoFNB ohagu longo pamukalo nguka kutya omuntu oha tuminwa oshimaliwa konomola yongodhi, nokuza mpoka [ngoka a tuminwa oshimaliwa konomola yongodhi ye] oha pewa nee ono- mola yopaholamo ndjoka ha ka dhengela meshina lyokugandja iimaliwa [ATM] opo a vule okuhila ko oshimaliwa she.

Ashike omathimbo ga piti uuna omuntu a tuminwa oshimaliwa ku- mukwawo pa-eWallet, oha haluka owala ongodhi ye tayi lopota kutya oshimaliwa shoka osha kuthwa, omaipulo oga kala po nee kutya osha kuthwa ko kulye, osho wo kutya opamukalo gu ni she ende opo shi kuthwe ko.

Oombaanga dha yooloka moshilongo, mwa kwatelwa yoFNB ohadhi kala nokulondodha ookas- toma dhawo dhi kale dha lungama molwashoka moshigwana omuna aakengeleli mboka taya longo omutenya nuusiku okungelela aantu iimaliwa yawo pamikalo dha yooloka mwa kwatelwa ngaashi ngoka gokutuminwa oshimaliwa pa-eWallet.

Omunambelewakuluntu gwo- shimpungu shomalanditho moFNB, Nangula Kauluma, okwa popi kutya uukengeleledhi owundji ohawu holoka omolwuunkundi mboka hawu kala pekwatonawa lyonomola yopaholamo ndjoka hayi longithwa kookastoma okukutha ko oshimaliwa shawo pokaATM, “uuna ookastoma dha kengelelwa koombudhi opo dhi gandje oono- mola dhawo dhopaholamo.”

Okwa popi kutya ombaanga yawo oyi na omulandu gwowina gwa tulilwa po okuyelithila ookastoma nkene dhi na okukala dhi igamena opo kaadhi gwile momake gookaly- amupombo nenge aakengeleledhi.
Nando ongaaka, okwa popi kutya ookastoma onkene dhi na onkandangala okudhana opo dhi shilipaleke kutya oonomola dhawo dhopaholamo ndhoka haya lon- githa okuhila ko iimaliwa yawo odha gamenwa nodha kalekwa paholamo. Kauluma okwa popi kutya mombaanga yawo kamu na omulandu gwokufuta ookastoma oshimaliwa uuna ye shi kengelelwa koombotsotso pamukalo ngoka ye etha [aakengeleledhi] ya ye momayalulo gawo gopambaanga.

“Okutala kaantu ya konda poom- iliyona 1,3 mboka haya longitha o-eWallet, onkalo yuukengeleledhi wokuya moo-eWallet dhaantu oyi li pombanda noonkondo,” osho a popi ngaaka.

Kauluma okwa popi kutya uuna oshimaliwa sha hilwa ko ko-eWal- let, itashi ti nande ohashi ningwa pethimbo okastoma ya gandja papuko onomola yawo yopaholamo komukengeleledhi.

“Okugandja onomola yopa- holamo papuko otashi vulika shi kale sha ningwa pwa pita oomwedhi, ashike uuna oshimaliwa sha tulwa ko-eWallet ndjoka ya yiwa oonyala kaakengeleledhi, ohaya vulu okuyaka mo oshimaliwa shoye. Shoka ohaya vulu owala oku shi ninga molwashoka om- athimbo gamwe okwa li ya pewa onomola yoye yopaholamo ndjoka ho tuminwa kongodhi yoye,” osho a popi ngaaka.
Gumwe gwomookastoma dhoFNB, gwomOvenduka, Ezra Kaleb, noha longo osikola, okwa popi kutya omasiku ga zi ko okwa kanitha oshimaliwa shoka sha adhika shi li ko-eWallet ye.

Okwa hokolola kutya esiku ndyoka okwa adhika e li mela lyondjila okuya kokaATM, sho a yakula etumwalaka kongodhi kutya oshimaliwa shooN$5 000 shoka a tuminwa ko-eWallet, osha hilwa ko.

“Petameko okwa li owala ndi shi pamwe omashendjo. Kanda li ndi itayela kutya oshimaliwa shandje osha kuthwa ko owala ngaaka ku- walyewo, molwashoka onda li lela ndishi kutya onomola yandje yopa- holamo inandi yi gandja komuntu nande nande. Sho nda mono kutya oshimaliwa shoka osha kuthwa ko shili, onda dhengele mbala oFNB, nomuniilonga gwomombaanga ngoka a yamukula okwa lombwele ndje kutya nonande onda ka patulula oshipotha itashi kwatha sha mol- washoka oshiningwanima ngashoka nda ningilwa osha ningilwa wo aantu oyendji,” osho hokolola ngaaka. Kaleb okwa popi kutya oshimaliwa shoka sha yakwa ko ko-eWallet ye okwa adhika te ke shi landa po ominambo dhokanona ke osho wo iipumbiwa ye yilwe.

“Okwa li nda tokola okuya kom- baanga ndjoka, noya lombwele ndje kutya ongame ndi na epuko molwashoka otashi vulika nda gan- dja onomola yandje yopaholamo komuntu gulwe. Shoka okwa li sha geyitha ndje noonkondo. Ondu uvithwa nayi, molwashoka oshimaliwa shandje inandi shi mona sigo okeluwa ndika,” osho a popi ngaaka. Pelagia Joseph gwomoTsumeb ngoka a tseyika nawa komalungula nedhina ‘Mulongo Hipinge’, momasiku 21 Auguste okwa holola okwaauvanawa kiikun- daneki yopankalathano komalun- gula nkene oshimaliwa she shoka sha li ko-eWallet sha kuthwa ko kuwalyewo.

“Onda tuminwa oshimaliwa shooN$300 okuza kokastoma yandje lwopotundi 06h50, ashike lwopotundi 08h02 onda yakula okatumwalaka okafupi pangodhi okutseyithilandje kutya oshimaliwa shandje osha kuthwa ko. Sho nda tala ko-eWallet yandje onda mono kwa thigwa owala oosenda 35,” osho a popi ngaaka.

Joseph okwi indile ombaanga yoFNB yi kuthe ko oongaku opo yi humithe komeho omulandu gwegameno.

Okwa popi kutya sho kwa li a dhengele oFNB, okwa yamukulwa kutya oshimaliwa she osha kuthwa ko nale.

“Hangame andike nda kanitha oshimaliwa okupitila ko-eWallet. Aantu oyendji oya holola kutya oya ningilwa oshinima sha faathana paukengeleledhi, konima sho nda zi mokalungu okupitila komalungula kombinga yoshimaliwa nda kani- tha,” osho Joseph a popi ngaaka.
Omukalimo gwomOvenduka, Sam Johannes okwa popi kutya muFebuluali okwa li a tumine omuntu oshimaliwa shooN$500 ko-eWallet.

“Okwa li nda tumine omuntu e li mOvenduka oshimaliwa, nolwanima okwa popi kutya oshi- maliwa shoka ineshi mona. Sho nda dhengele oFNB, onda lombw- elwa kutya oshimaliwa shoka osha kuthwa ko nale, nosha kuthilwako mOshakati,” osho a popi ngaaka.

Johannes okwa popi kutya sigo oompaka keshi kutya oshimaliwa shoka osha kuthwa ko kulye, ishewe kapu na onkatu ya sha ya katukwa kombinga yoshinima shoka. Okwa popi kutya ngaaka ayehe yaali oya kanitha opamwe naangoka a li ta tumine oshimaliwa.